Ծանրամարտի Եվրոպայի առաջնության չեմպիոններն ու փոխչեմպիոնները պատրաստվում են աշխարհի առաջնությանը

Հայաստանի  ծանրամարտի հավաքականը Եվրոպայի առաջնությունից վերադարձել է 40 մեդալով։ Մեդալների հաշվարկով առաջատարն է Ֆինլանդիայում անցկացված մինչև 20 և 23 տարեկանների Եվրոպայի առաջնությունում։ Տարբեր քաշային կարգերում մեր հավաքականի ծանրորդներից ինը հռչակվեցին Եվրոպայի չեմպիոններ:

Գյումրեցի ծանրորդները երկու օր առաջ են վերադարձել ու առանց դադարի վերսկսել են մարզումները: Հայաստանի հավաքականի առաջին ոսկե մեդալը նվաճեց Գառնիկ Չոլակյանը, 2022-ի գարնանը  աշխարհի առաջնությանն է մասնակցելու: Մինչև 20 տարեկանների պայքարում, 55 կգ քաշային կարգում, Գառնիկը երկամարտում գրանցեց 230 կգ արդյունք՝ միավորներով հետ թողնելով երկու թուրք մարզիկներին:

81 կգ քաշային կարգում  ոսկե մեդալակիրը Ռաֆիկ Հարությունյանն է, նա անպարտելի էր հրում վարժությունում: Ընդամենը մեկ մոտեցմամբ կարողացավ գլխավերևում պահել 190 կգ ծանրաձողը և առաջին անգամ հռչակվեց Եվրոպայի չեմպիոն:

Մեկ տարվա դադարից հետո  մինչև 20 և 23 տարեկանների Եվրոպայի առաջնությանը փայլուն հանդես եկան նաև գյումրեցիներ  Արա Աղանյանն ու  երիտասարդների աշխարհի գործող չեմպիոն Գարիկ Կարապետյանը: Միջազգային կարգ  սպորտի վարպետ Արա Աղանյանն առաջնությանը մասնակցում էր փոխված քաշով: Ծանրորդներն այս առաջնության արծաթե մեդալակիրներն են՝ Եվրոպայի փոխչեմպիոնները:

Եվրոպայի առաջնության եզրափակիչ ելույթում 109 + քաշային կարգում երեք ոսկե մեդալներով առաջնության բացարձակ չեմպիոն հռչակվեց գյումրեցի Վարազդատ Լալայանը:

22-ամյա ծանրորդը երկամարտի 447 կգ արդյունքով նվաճեց մինչև 23 տարեկանների չեմպիոնի կոչումը, այս տարիքային խմբում սահմանել է երեք ռեկորդ՝ պոկում, հրում վարժություններում և երկամարտում, այսպիսով՝ թարմացնելով մինչ այս  ցուցաբերած իր ռեկորդը:

Առաջնության բրոնզե մեդալակիրը  Գյումրիի ծանրամարտի մարզադպրոցի սան Գևորգ  Ղահրամանյանն է: Հայաստանի հավաքականն իր նվաճած 40 մեդալներով զբաղեցրեց առաջին հորիզոնականը, շրջանցելով  մյուս պետությունների մեծաթիվ հավաքականներին։

Հայկական ծանրամարտում սերնդափոխություն է, հավաքականների կազմում  երիտասարդ մարզիկներ են, որոնք մեծ ներուժ ունեն։

«Մեր Հայ գենի ու որակի մասին ենք խոսում՝ տարիներով, տասնամյակներով ցույց ենք տվել, որ ուժեղ ենք։ Գյումրիից մասնակիցների քանակը, որակն ավելի բարձր է, դա արդեն միանշանակ մեր հողի ու ջրի արժեքն է»,- նշում է ՀՀ վաստակավոր մարզիչ Կարեն Կարապետյանը։

«Սերնդափոխությունը շատ լավ է գնում, մենք շատ ուժեղ պոտենցիալ ունենք։ Փոքր Հայաստան է, բայց մեծ ուժով։ Դա գալիս է երկար տարիների քրտնաջան մարզումներից, շատ մեծ աշխատանք են կատարում թե՛  անձնական մարզիչները, թե՛ հավաքականի մարզիչներն ու ֆեդերացիան, դրա համար էլ  միջազգային մրցաշարերում մեր ծանրորդները միշտ փայլուն ելույթներ են ունենում»,- ասում է Գյումրիի Օլիմպիական հերթափոխի մարզական քոլեջի մարզիչ Ալեքսան Կարապետյանը։

Հայաստանի ծանրամարտի կանանց հավաքականի գլխավոր մարզիչ Արտաշես Ներսիսյանը ևս խոսել է  կանանց հավաքականում արժանի սերնդափոխությունից։ Երկարատև դադարից հետո հայ ծանրորդուհիները միջազգային հարթակներում  հաղթական ելույթներ են ունենում: Եվրոպայի առաջնությանը Լիանա Գյուրջյանն ու Մարգարիտա Առաքելյանը դարձել են չեմպիոններ, իսկ Մելինե Խաչատրյանը՝ բրոնզե մեդալակիր: Հիմա էլ պատրաստվում են դեկտեմբերին կայանալիք աշխարհի առաջնությանը:

«Ծանրամարտի աղջիկների հավաքականում էլ  արժանի սերնդափոխություն է եղել։ Դեկտեմբերի 10-ից մասնակցելու ենք մեծահասակների աշխարհի առաջնությանը։ Ես պլանավորում եմ 2-3 մարզուհիների մասնակցություն։ Եվրոպայի մրցաշարում մեր հաղթանակներն էլ փաստեցին, որ հայ ծանրորդուհիները կրկին ուժեղագույնների շարքերում են»,- նշում է Հայաստանի ծանրամարտի կանանց հավաքականի գլխավոր մարզիչ Արտաշես Ներսիսյանը։

Պատանի ծանրորդները այս օրերին մասնակցում են Սաուդյան Արաբիայում  ընթացող  պատանիների  աշխարհի առաջնությանը: Հայաստանն այս  մրցաշարում ներկայացնում են նաև գյումրեցի մարզիկները, որոնք Եվրոպայի  գործող չեմպիոններ ու փոխչեմպիոններ են։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։