Գյումրիում ՎԶԵԲ և սուբվենցիոն ծրագրերով փողոցաշինական աշխատանքների ընթացքը դանդաղել է

Գյումրիում ՎԶԵԲ և սուբվենցիոն ծրագրերով հիմնանորոգվում է 31 փողոց և երկու հրապարակ: Շինաշխատանքներն ավարտված են միայն 14 փողոցներում՝ այն էլ անցած տարվանից մնացած։ Փողոցաշինության տեմպերը կրկին դանդաղում են: Պատճառներն էլ անփոփոխ են՝ նախագծային փոփոխություններ, չնախատեսված աշխատանքներ ու եղանակային պայմաններ: Գործն անավարտ է, շատ փողոցներ դարձել են անանցանելի: Փողոցաշինության ժամկետների ու մինչ ավարտը ժամանակավոր  լուծումներով երթևեկելի վիճակի բերելու հարցերն են այսօր քաղաքապետարանում քննարկել շինարարական ընկերությունների ղեկավարները:

Քաղաքապետարանի ձեռքի տակ է այն փողոցների ցանկը, որտեղից բնակիչների դժգոհություն են ստացել: Փողոցները քանդել են, գործը կիսատ թողել, անձրևներից հետո էլ անանցանելի վիճակ է ստեղծվել:

«Ես չգիտեմ, թե մրցութային փաթեթներում ինչ պայմաններ են սահմանված, բայց շինարարը պարտավոր է ապահովել բնակչի ազատ տեղաշարժը: Եթե կան փողոցներ,որտեղ շինաշխատանքները ձգձգվում են, պետք է շեբենապատեն: Շինարարներն ունեցել են և՛ շինանյութի, և՛ աշխատուժի խնդիրներ: Կենտրոնական հրապարակում աշխատող բանվորներից երկուսը անձնական պատճառներով աշխատանքի չէին եկել , աշխատանքը լրիվ կանգնեց: Շինարարն ասում է , որ չեն գտնում փոխարինողներ: Լավ մասնագետներ քիչ կան »,- լրագրողներին ասել է Գյումրիի փոխքաղաքապետ Ռուբեն Սանոյանը:

Անավարտների ցանկում են Բուլվարային թաղամասի, Աթոյան, Տոլստոյ և Մազմանյան փողոցներն են: Վերջինն անավարտ է անցած տարվանից: Մազմանյան փողոցը ՎԶԵԲ-ի ծրագրում է: Այս ու ևս 14 փողոցների շինարարությունն անցած տարվանից փոխանցվել էին այս տարի: 14-ի շինարարությունն ավարտվել է։ Մազմանյան  փողոցում դեռ անելիքներ կան:

«Նախագծով նախատեսված չէր կոյուղու անցկացում: Շինաշխատանքների ընթացքում պարզ էր դարձել, որ կոյուղին անհրաժեշտություն է: Կատարվեցին նախագծային փոփոխություններ: Թվով 10 փողոցներում կառուցվեց նոր կոյուղատար համակարգ: Այդ պատճառով էլ այդ փողոցների շինարարությունը տեղափոխվեց այս տարի: Հիմա մեկ փողոցի շինարարություն է մնացել անավարտ: Խոսքը Մազմանյան փողոցի մասին է: Աշխատում են այն շահագործման հանձնել մինչև նոյեմբերի 15-ը »,- ասել է «Բիլդեր Քոնսթրաքշն» շինընկերության ղեկավար Կամո Գևորգյանը:

Կոյուղատար ցանցի նորացման պատճառով մոտ 3 ամիս ձգձգվել են աշխատանքները Գարեգին Առաջին փողոցում: Սա սուբվենցիոն հայտով նորոգվող փողոց է: Նույն ծրագրում նաև կենտրոնական հրապարակն է ընդգրկված: Շինաշխատանքներն այստեղ էլ դանդաղում են: Շինարարը հետիոտնային քարե անցումներ կառուցելու համար նախ շինանյութի խնդիր է ունեցել, ապա նաև՝ աշխատուժի:

Եվս մեկ հրապարակ էլ ՎԶԵԲ ծրագրով է հիմնանորոգվում: Խոսքը կայարանամերձ հրապարակի մասին է:Ծրագրի այս տարվա փուլում է ընդգրկված, բայց շինաշխատանքներ չկան: Շինարարը բացատրում է՝ կայարանամերձ հրապարակի դեպքում պատճառը նախագծային փոփոխություններն են:

Քանդած փողոցներում անձրևներից հետո անանցանելի վիճակ է ՝ ցեխ ու ջրափոսեր: Շինարարներին քաղաքապետարանը պարտավորեցնում է ժամանակավոր լուծում գտնել: Մինչ փողոցների ասֆալտապատումը խճապատել կամ հետիոտնային անցումներ կառուցել:

Ընդհանուր ՎԶԵԲ-ի ծրագրում ընդգրկված 23 փողոցներից 14-ի շինարարությունն է ավարտվել, իսկ սուբվենցոն հայտերով 8 փողոցի և մեկ հրապարակի աշխատանքներն ընթացի մեջ են: Դրանցից ոչ մեկը ավարտական փուլում չէ: Բոլոր այս փողոցների համար վերջնաժամկետը տարեվերջն է: ժամկետների հստակեցումը շինարարները և քաղաքապետարանում նշում են «եթե»-ով՝ մինչև տարեվերջ գործը կավարտեն, եթե եղանակները թույլ տան ու չնախատեսված աշխատանքներ չառաջանան:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։