ՀՀ-ն ՆԱՏՕ-ի հետ գործակցում է «նաև» Ադրբեջանի բանակը ճանաչելու համար. ԱԱԽՔ-ը պարզաբանել է իր խոսքերը

Հայաստանի ազգային անվտանգության խորհրդի քարտուղարը պարզաբանել է ռուսական «Կոմերսանտում» հրապարակված իր խոսքերը, ըստ որոնց՝ ՆԱՏՕ-ի հետ Հայաստանի համագործակցությունը հիմնավորվում է նաև նրանով, որ ՀՀ ԶՈւ զինծառայողները կարողանում են ստանալ նույն գիտելիքները, ինչ ՆԱՏՕ-ի հետ համագործակցող ադրբեջանցիները։

«Իսկ դա, իր հերթին, օգտակար է Արցախյան հակամարտությունում Ադրբեջանին արդյունավետությամբ հակազդելու համար։ Ադրբեջանական սպաները ուսանում են Թուրքիայում (ՆԱՏՕ-ի անդամ-խմբ)։ Մենք ցանկանում ենք հասկանալ այդ կառուցվածքը, հասկանալ, թե ինչպես է աշխատում ադրբեջանական բանակը»,- ըստ «Կոմերսանտի» հարցազրույցի ընթացքում հայտնել էր Գրիգորյանը։

Այսօր ԱԱԽ քարտուղարն իր ֆեյսբուքյանը էջում գրառում է կատարել, ըստ որի՝ «Կոմերսանտի» երեկվա հոդվածում հրապարակվել էր իր խոսքի մի մասը, իսկ այսօր այդ մասը թարմացվել է։

https://www.facebook.com/armengrigoryanSC/posts/827543277451144

Համեմատելով հոդվածի՝ երեկ հրապարակված ու այսօր թարմացված տարբերակները՝ ShantNews.am-ը հայտնաբերեց, որ Արմեն Գրիգորյանի խոսքում ավելացվել է միայն «այդ թվում» արտահայտությունը։

Դրանից բացի՝ տեքստում ավելացվել է անվտանգության խորդհրդի քարտուղարի ևս մեկ միտք, ըստ որի՝ ՆԱՏՕ-ի գագաթնաժողովներին Հայաստանի մասնակցությունը առաջին անգամ չէ, այդպիսի նախադեպեր եղել են նաև 2014 և 2016 թվականներին։ Ինքը՝ Գրիգորյանը, սակայն, իր գրառման մեջ ավելի ուշ ներկայացրել է իր խոսքերի ամբողջական տարբերակը.

«Հայաստանը զարգացնում է իր հարաբերությունները ՆԱՏՕ-ի հետ արդեն գոյություն ունեցող ձևաչափերում` Հայաստան-ՆԱՏՕ Անհատական գործընկերության գործողությունների ծրագրի և Պլանավորման և վերանայման գործընթացի շրջանակներում: Մենք նաև Աֆղանստանում և Կոսովոյում մասնակցում ենք ՆԱՏՕ-ի խաղաղապահ առաքելություններում: Ադրբեջանի ռազմական կարողությունները հասկանալն էլ է կարևոր, քանի որ ադրբեջանցի սպաներն իրենց փորձառությունն են անցնում Թուրքիայում, որը ՆԱՏՕ-ի անդամ երկիր է»։

Նշենք, որ ՆԱՏՕ-ի հետ Հայաստանի համագործակցությունն Ադրբեջանի բանակի ուսումնասիրությամբ պատճառաբանելը վրդովմունք էր առաջացրել հայկական սոցցանցային տիրույթի մի հատվածում։

Պատճառն այն է, որ ՀՀ-ՆԱՏՕ համագործակցությունը ներառում է ոչ միայն զինվորականների ուսուցում, այլև խորհրդատվություն Հայաստանի անվտանգային միջավայրի գնահատման, բարեփոխումների անցկացման, թափանցիկության ու բարեվարքության ամրապնդման, միջազգային խաղաղության հաստատման (խաղաղապահություն) և մի շարք այլ ոլորտներում, որոնք ներկայացվում են Հայաստան-ՆԱՏՕ Անհատական գործընկերության գործողությունների եռամյա ծրագրերում։