Երևանում տեղի ունեցավ Արամ Մանուկյանի արձանի բացման արարողությունը

Հուլիսի 17-ին՝ ժամը 18:00-ին, Երևանի Հանրապետության հրապարակին հարող հատվածում տեղի է ունեցել Հայաստանի Առաջին Հանրապետության հիմնադիր, ներքին գործերի նախարար, քաղաքական ու ռազմական գործիչ Արամ Մանուկյանի արձանի բացման արարողությունը, որին մասնակցել են ՀՀ վարչապետ Նիկոլ Փաշինյանը և ՀՀ նախագահ Արմեն Սարգսյանը:

Բացման պաշտոնական արարողությունը մեկնարկել է Ամենայն Հայոց կաթողիկոս Գարեգին Բ-ի հնչեցրած աղոթքով, որից հետո ելույթով է հանդես եկել ՀՀ վարչապետը:

«ՀՀ մեծարգո՛ նախագահ, վեհափա՛ռ Տեր, ԱԺ մեծարգո՛ նախագահ, սիրելի՛ ժողովուրդ, ՀՀ հպա՛րտ քաղաքացիներ: Ո՞վ է Արամ Մանուկյանը, թերևս սխալված չեմ լինի, եթե ասեմ, որ ի դեմս նրա՝ գործ ունենք մեր նորագույն պատմության մեծագույն առաքյալի հետ, որովհետև նրա կյանքը և գործունեությունը նման են ոչ թե մի մարդու կյանքի և գործունեության, ով ծնվեց, ապրեց և մահացավ, այլ ով ծնվեց՝ իրականացնելու համար մի մեծ առաքելություն և ի վերջո իրագործեց այդ առաքելությունը: Դա իսկապես մի մեծագույն առաքելություն էր՝ գտնել հաղթանակ՝ պարտությունների տեղատարափի ներքո, գտնել հույս՝ հուսահատության հեղեղի մեջ, գտնել ուժ, երբ թվում է, թե թևերդ թուլացած են, երբ թվում է, թե ծնկներդ ծալված են, երբ թվում է, թե ողնաշարդ կոտրված է: Արամ Մանուկյանը լիարժեք, լիովին կատարեց իր առաքելությունը, նա երբեք ու երբեք չապրեց իր համար, իր ընտանիքի համար, իր հարազատների համար, նա ապրեց իր ժողովրդի համար, նա պայքարեց իր ժողովրդի համար, նա հաղթեց իր ժողովրդի համար, և նա մահացավ՝ իր գաղթած, կոտրված, անտուն ժողովրդից իրեն փոխանցված հիվանդության արդյունքում, և նա ամբողջացրեց իր առաքելությունը: Եվ այդ առաքելությունն իր գոյությամբ, ես հավատում եմ, որ նա սերմանել է այս հողի մեջ, մեծ հավանականությամբ, նա քայլել է այն տեղերով, որտեղ մենք հիմա կանգնած ենք: Եվ մենք ունենք մեր առաքելությունը՝ ՀՀ պետական այրերը, հանրային այրերը, բոլորը, ՀՀ քաղաքացիները, և այդ առաքելությունն է՝ լինել արժանի Արամ Մանուկյանին, լինել արժանի նրա առաքելությանը և ապրել այնպես, որ ունենանք իրավունք՝ ամեն անգամ Արամ Մանուկյանի արձանի դիմացով անցնելիս՝ ուղիղ նայելու նրա աչքերի մեջ և ասելու, որ մենք տերն ենք Ձեր առաքելության, Արա՛մ Մանուկյան, և Ձեր գործը կիսատ չէ, և Ձեր ոգին կենդանի է, և Ձեր հաղթանակը կենդանի է, և հայ ժողովուրդն այլևս հաղթանակած է հավիտյան: Եվ ուրեմն, կեցցե՛ ազատությունը, կեցցե՛ Հայաստանի Հանրապետությունը, կեցցե՛նք մենք և մեր երեխաները, որ ապրում ենք և ապրելու ենք ազատ և երջանիկ Հայաստանում»,- ասել է ՀՀ վարչապետ Նիկոլ Փաշինյանը:

Բացման արարողության ավարտին՝ արարողությանը ներկա պաշտոնյաները ծաղիկներ են դրել Արամ Մանուկյանի արձանին: