Քննարկվել են օրենսդիր մարմնի կարողությունների հզորացմանն ուղղված ծրագրերը

Ազգային ժողովի ինստիտուցիոնալ կարողությունների զարգացման շրջանակում երկրի օրենսդիր մարմինն արդյունավետ համագործակցում է միջազգային գործընկեր կազմակերպությունների հետ: Խորհրդարանի հետ համագործակցության ծրագրերը, ակնկալվող արդյունքային ցուցանիշները, ինչպես նաև առաջիկայում իրականացվելիք միջոցառումները քննարկվել են նոյեմբերի 5-ին տեղի ունեցած Խորհրդարանական աջակցության գործընկերների պարբերական համակարգող ժողովի ընթացքում, տեղեկացնում է ԱԺ պաշտոնական կայքը:

Ողջունելով հյուրերին՝ ԱԺ աշխատակազմի ղեկավար-գլխավոր քարտուղար Վահան Նարիբեկյանը կարևորել է Հայաստանի Ազգային ժողովի հետ համագործակցության ծրագրերի արդյունավետ իրականացումը, որն անհրաժեշտ է աշխատակազմի հմտությունների զարգացման, փորձի փոխանակման համար: Ըստ Վահան Նարիբեկյանի՝ նման համատեղ ծրագրերն օժանդակում են ՀՀ ԱԺ աշխատակազմի օրենսդրական ու վերլուծական կարողությունների կատարելագործմանը: Նա պատրաստակամություն է հայտնել աջակցելու, որպեսզի արդյունավետ համագործակցությունը շարունակական լինի:

ՄԱԶԾ-ի «Նոր Հայաստան` ժամանակակից խորհրդարան» ծրագրի տեխնիկական գծով գլխավոր խորհրդատու Բիլիանա Լեդենիկանը դրական է գնահատել արդեն իսկ ձևավորված արդյունավետ փոխգործակցությունը և կարևորել դրանց շարունակականության ապահովումը:

Միջազգային կազմակերպությունների հայաստանյան գրասենյակների ներկայացուցիչները մանրամասն անդրադարձել են նախկինում իրականացված և առաջիկայում նախատեսված ծրագրերի բովանդակությանը: ՀՀ խորհրդարանի հետ իրականացվում են բազմաթիվ ծրագրեր՝ դասընթացներ ԱԺ մշտական հանձնաժողովների և աշխատակազմի համար, փոխանակման ծրագրեր, սեմինարներ, օրենսդիր մարմնի և պատգամավորների գործունեության արդյունավետությանն ուղղված միջոցառումներ եւ այլն:

Քննարկվել են մի շարք ուղղություններով համագործակցության նոր հնարավորությունները: Անդրադարձ է եղել ԱԺ աշխատակազմի կարիքներին ու առաջնահերթություններին:

Հյուրերը խորհրդարանի կարողությունների հզորացմանը և խորհրդարանական շրջանակներում իրականացվող բարեփոխումներին տարբեր ձևաչափերով աջակցության պատրաստակամություն են հայտնել:

Համակարգող ժողովին մասնակցել են Միջազգային հանրապետական ինստիտուտի (IRI), Ընտրական համակարգերի միջազգային հաստատության (IFES), Ազգային ժողովրդավարության ինստիտուտի (NDI), ԵՄ կողմից ֆինանսավորվող Թվինինգ ծրագրի, Գերմանիայի միջազգային համագործակցության ընկերության (GIZ), Եվրոպայի անվտանգության և համագործակցության կազմակերպության (OSCE), Կանադայի խորհրդարանական կենտրոնի, Միավորված ազգերի կազմակերպության զարգացման ծրագրի (ՄԱԶԾ), ԱՄՆ Միջազգային զարգացման գործակալության (ԱՄՆ ՄԶԳ) ներկայացուցիչները: