«Դահուկային սպորտի ֆեդերացիայի անցած տարի տված դահուկները արդեն մաշվել էին և այստեղ բերելու իմաստ չկար». լեռնադահուկորդ Աշոտ Կարապետյան

Հարավային Կորեայի Փհենչան քաղաքում Ձմեռային 23-րդ Օլիմպիական խաղերում Հայաստանը ներկայացնող լեռնադահուկորդ Աշոտ Կարապետյանը անհարմար իրավիճակի մեջ է հայտնվել:

SHANTNEWS-ի հետ զրույցում լեռնադահուկորդը նշեց, որ առաջին օրը մարզումների ժամանակ նա նկատել է, որ իր դահուկը վնասված է, իսկ հաջորդ մարզումի ժամանակ այն լրիվ կոտրվել է.

«Դրանք իմ ընկերոջ դահուկներն էին, և ես դրանցով մարզվում էի արդեն 4 տարի: Իսկ իմ դահուկները, որոնք անցած տարի են ինձ տվել մաշված են և դրանցով հանդես գալ կամ մարզումներ անել հնարավոր չէ: Նպատակահարմար տարբերակը այս դահուկներն էին, էն էլ սրանք էլ էստեղ ջարդվեցին: Իսկ ինչ վերաբերում է իմ մարզահագուստի հետ կապված խնդրին, ապա ասեմ, որ ֆեդերացիան իմ անունը ուշ է ուղարկել միջազգային օլմպիական կոմիտե և իմ չափսերով մարզահագուստ չեն հասցրել կարել: Իմ մարզահագուստի վրա չկա Հայաստան նշում և օլիմպիական նշանը»:

Աշոտ Կարապետյանը իր խոսքում ասաց, որ բազմիցս ֆեդերացիայում ասել է, որ իր մոտ նորմալ մարզագույք չկա: Իսկ մեր այն հարցին, թե արդյոք ստեղծված իրավիճակը ազդել է իր մարզական պատրաստվածության վրա, նա պատասխանեց, որ Հայաստանի դահուկային սպորտի հետ եղած կոնֆլիկտները, իհարկե, ազդել են, բայց նա չի ցանկանում իրենց պատճառով իրեն վատ դրսևորել Օլիմպիադայում.

«Հայաստանի դահուկային սպորտի ֆեդերացիան հենց սկզբից բոլորին դահուկ տվեց, իսկ Հայաստանի առաջին համարին չտվեց՝ պատճառաբանելով, որ ես վիզայի խնդիր ունեմ: Բայց հետո ես իմ փաստաթղթերի խնդիրները լուծեցի և Օլիմպիական խաղերից դեռ երեք ամիս առաջ ասացի, որ Թուրքիա եմ մեկնում մրցաշարի ինձ դահուկ է պետք, բայց իրենք էլի չտվեցին: Հետո Իրան եմ գնացել մրցաշարի ու էլի դահուկ չեն տվել: Հիմա էլ էկա հասա էստեղ, ոնց որ էլի չեն ուզում տան»:

Լեռնադահուկորդը տեղյակ է արդեն, որ ՀԱՕԿ-ը դահուկներ է գնել և մինչև վաղը դրանք կհասնեն արդեն Փհենչան: Նա նշում է, որ այնուամենայնիվ, դժվար կլինի հարմարվել նոր դահուկներին.

«Հիմա ինձ մի քանի օր է մնացել, իսկ դահուկների համար անհրաժեշտ է որոշակի ժամանակ և շատ մարզումներ, որպեսզի հարմարվեմ դրանց: Ես էլի եմ ասում, որ չափազանց լուրջ արդյուքններ չեմ կարողանա ապահովել, և ես այստեղ չեմ եկել մեդալ նվաճելու համար: Ես դեռ 18 տարեկան եմ, և այստեղ ինձանից փորձառու 24-27 տարեկաններն են ներկայացնում մյուս երկրները: Ես ուղղակի ցանկանում եմ Օլիմպիական խաղերին մասնակցել, բարելավել իմ սեփական ցուցանիշները և իմ երկիրը պատշաճ ներկայացնեմ»:

Նշենք, որ Աշոտ Կարապետյանը Օլիմպիական խաղերում ելույթ է ունենալու փետրվարի 22-ին հատուկ ոլորավայրէջք ոճում: