Շիրակի մարզի խոշորացված համայնքների աշխատակազմերի ձևավորումն ու վարչական ղեկավարների նշանակումը դեռ չի ավարտվել

Համայնքների խոշորացման արդյունքում Շիրակի մարզում ձևավորվել է 6 համայնք։

Դեկտեմբերի 5-ի ընտրությունների արդյունքում խոշորացված բնակավայրերում հայտնի են նաև համայնքների ղեկավարները, որոնց ընտրել են ավագանիները։ Սակայն մինչ օրս  լիարժեք ձևավորված չեն խոշորացված համայնքների աշխատակազմերը։

«Ինքը ահագին բարդ պրոցես է, ավագանու նիստերով էաշխատակազմերի ձևավորումը՝ կառավարչական հիմնարկի ձևավորումը, հաստատումը, ռեգիստրում գրանցումը, նոր կնիքների ձեռքբերումը։ Այսինքն բավականին երկարատև պրոցես է, նաև դրան գումարած հաստիքացուցակներ կազմելիս համայնքները թերացել էին, ինչ-որ բան ճիշտ չէին արել, հիմա աշխատել ենք էդ ուղղությամբ, ինչ-որ բաներ փոխել ենք տվել։ Պաշտոնների անվանացանկերը հաստատվում են տարածքային կառավարման և ենթակառուցվածքների նախարարի հրամանով։ Հիմա այս պահին հաստատման փուլում մնացել է միայն Ախուրյանը։ Դրանից հետո էլ ենթադրվում է, որ ժամանակավոր պաշտոնակատարների նշանակումով աշխատակազմերը կսկսեն գործել, մինչև համայնքային ծառայողի մրցույթների կազմակերպումը»,- այս մասին նշել է Շիրակի մարզպետարանի տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանը։

Նոր ձևավորված համայնքներում բնականոն աշխատանքային պրոցեսին անցնելու համար, բացի աշխատակազմերի հաստատումից, անհրաժեշտ է նաև ունենալ համայնքների կազմերի մեջ մտնող բնակավայրերի վարչական ղեկավարների նշանակումը։

Վարչական ղեկավարը նշանակվում է համայնքի ղեկավարի կողմից, իսկ մինչև այդ ավագանու կողմից սահմանվում են վարչական ղեկավարների նստավայրերը, ավագանին պետք է որոշի նաև թե որ բնակավայրերում պետք է ունենան վարչական ղեկավարներ։ Հնարավոր է, ավագանու որոշմամբ երկու բնակավայր ունենա մեկ վարչական ղեկավար։

Մարզում, ըստ բնակավայրերի, լինելու են 97 վարչական ղեկավարներ, այս պահին նրանցից մոտ 50-ն են նշանակված։

«Օրենքով նախատեսված է՝ մինչև 500 հաշվառված բնակիչ ունեցող բնակավայրերում կարող են ունենալ վարչական ղեկավար կամ չունենալ, դա արդեն համայնքի ավագանին է որոշում։ Իսկ 500-ից ավելի հաշվառված բնակիչ ունեցող բնակավայրում արդեն իսկ պետք է լինի վարչական ղեկավար», – ասել է Արամ Անտոնյանը։

Բոլոր բնակավայրերում վարչական ղեկավարների չնշանակվելու պատճառներից մեկը նաև օրենքով սահմանված բարձրագույն կրթության անհրաժեշտությունն է։

Միավորումից հետո նախկին գյուղապետարանների շենքերը պահպանվելու են, դրանք համայնքային սեփականություն են, այն բնակավայրերում, որտեղ կնշանակվեն վարչական ղեկավարներ, նրանք գործունեություն կծավալեն հենց այդ շենքերում՝ որպես վարչական կենտրոններ։ Որոշ դեպքերում նրանք կունենան նաև փոքր աշխատակազմ։

«Վարչական ղեկավարների հետ օրենքով նախատեսված են օպերատորներ, որոնք նույնպես քաղաքացիական ծառայողներ են, աշխատելու են ամբողջ տեղեկատվական բազայի հետ, բնակչությանը տեղում սպասարկելու են։ Մեծ բնակավայրերում նախատեսված են էլի հաստիքներ, օրինակ հարկային գործակալներ, այսինքն, ապահովելու են բնակավայրի հարկային եկամուտները», – նշել է Արամ Անտոնյանը։

Վարչական ղեկավարները նաև խորհրդակցական ձայնի իրավունքով, իրավասություն ունեն մասնակցելու տվյալ համայնքի ավագանու նիստերին։

Համայնքներում աշխատակազմերի ձևավորման և վարչական ղեկավարների նշանակման հստակ ժամկետներ սահմնված չեն, սակայն որքան գործընթացն արագ է կատարվում, այնքան դա օգուտ է համայնքին։

Շիրակում համայնքների միավորումը երեք փուլով է տեղի ունեցել, առաջին փուլում՝ 2016 թվականին, միավորվել էին Ամասիայի և Աշոցքի նախկին տարածաշրջանների 44 համայնքներ, ինչի արդյունքում ձևավորվել էին 4 համայնքներ։ Երկրորդ փուլը 2017-ին է եղել, երբ միավորվել են Ախուրյանի տարածաշրջանի 23 գյուղեր և Անիի նախկին տարածաշրջանի 17 գյուղեր։ Իսկ երրորդ փուլը 2021 թվականին էր, երբ միավորվեցին 40 համայնքներ, և հիմա արդեն Շիրակի մարզում կա 6 համայնք, որոնցից չորսում տեղական ինքնակառավարման մարմինների ընտրություններ անցկացվեցին 2021-ի դեկտեմբերի 5-ին։