Նախկին Արփի համայնքը փաստաթղթերը, գրասենյակային գույքը, գյուղտեխնիկան չի հանձնում Ամասիա խոշորացված համայնքին

Ամասիա խոշորացված համայնքին նախկին Արփի համայնքի փաստաթղթերի հանձնման-ընդունման գործընթացը ձգձգվում է։

Դեկտեմբերի 5-ի ընտրություններից հետո «Քաղաքացիական Պայմանագիր» կուսակցության թեկնածուները վայր են դրել իրենց մանդատները և բողոքարկել ընտրությունների արդյունքները։ Արփի համայնքի նախկին ղեկավարը, ով բողոքարկողներից մեկն է, հրաժարվում է նոր համայնքապետին փոխանցել համայնքի փաստաթղթերն ու գույքը։

Ընտրություններից մոտ երեք ամիս անց այս խնդիրը դեռ լուծում չի ստացել։ Շիրակի մարզպետարանի  տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանն այս մասին նշել է․

«Թեկնածուների առաջադրել է կուսակցությունը և եթե կուսակցությունը չի բողոքարկել ընտրությունների ելքը, ապա դրանով հարցը փակվում է, Ամասիայում եթե ասում են, որ բողոքարկել են, ապա կոնկրետ մարդկանց անձնական  հարցն է։ Բայց էս պարագայում համայնքում աշխատանքները դանդաղում են, գոնե Արփիի տարածաշրջանի մասով խոչընդոտներ կան»։

Այս գործընթացը չկարգավորվելու պատճառով նաև խնդիրներ են առաջ գալիս բնակիչների հետ աշխատանքում։ Փաստաղթղերը մնացել են նախկին համայնքապետարանում, նոր ձևավորված համայնքը այնտեղ նույնիսկ աշխատակիցներին չի կարող դիմել որևէ հարցով։

Համայնքի ղեկավարի լիազորությունները  դեկտեմբերի 17-ից օրենքի ուժով դադարեցված են, ով իր հետ աշխատանքից ազատել է նաև մյուս աշխատակիցներին։

«Բոլոր համայնքներին մենք ենք գրություն, մեթոդաբանություն ուղարկել, որ ինչ-որ ժամանակ կա հատկացված, աշխատակազմերը պետք է ազատվեն աշխատանքից։ Փետրվարի 25-ին նոր լրացել է իրենց աշխատանքի ժամկետը և՛ հայեցողական պաշտոնների, և՛ աշխատակազմերի։ Իրենց մոտ ժամանակից շուտ, իր հետ հավասար բոլորին ազատել են։ Մնացել էր մի հոգի՝ հաշվապահը և հիմնականում նոր համայնքապետի կապն իր հետ էր։ Գործ է հարուցված համայնքի սեփականությունը չհանձնելու հետ կապված։ Ամենամեծ խնդիրը էդ համայնքի բնակավայրերում վարչական նստավայրեր և վարչական ղեկավարներ նշանակելն է, այս պահին դեռ չի հաջողվել լուծել։ Այնտեղ բավականին գյուղատնտեսական և շինարարական տեխնիկա կա, որոնք օգտագործվելու են, արդեն գարուն է, բայց քանի դեռ հանձնված չէ համայնքը չի կարող օգտագործել», – նշել է Արամ Անտոնյանը։

Արփի համայնքից Ամասիային ընդհանրապես ոչինչ չի հանձնվել՝ փաստաթղթեր, գրասենյակային գույք և տեխնիկա։ Ընդունման-հանձնման հանձնաժողովը գնացել է իր գործառույթներն իրականացնելու, սակայն տեղում լարվածություն է եղել և գործընթաց չի կատարվել։

«Մենք հանդիպել ենք նաև նախկին համայնքի ղեկավարի հետ, փորձել ենք բացատրել, որ դու սխալ ընթացքի վրա ես, այլևս հարցը փակված է, նոր տեղական ինքնակառավարման մարմիններ են ձևավորված։ Բացատրել ենք նաև, որ դու դատարան ես դիմել, այդ պրոցեսը երկար է, մինչև կլինի որոշում դու պարտավոր ես համայնքի գույքը հանձնել նոր համայնքի ղեկավարին, համայնքը պարտավոր է էդ գույքով ծառայություն մատուցել բնակիչներին։ Էդ գույքը որևէ մեկի սեփականությունը չէ, պետք է ծառայի համայնքի բնակիչներին, ով էլ որ համայնքի ղեկավարը լինի», – ասել է Արամ Անտոնյանը

Ըստ  Արամ Անտոնյանի, այս հարցում մարզպետարանը որևէ լիազորություն չունի, միջամտել չի կարող։ Իրենց գործառույթն այս պարագայում կարող է լինել միայն փաստաթղթերի տրամադրումից հետո, նոր համայնքապետարանի հրավերով, ստուգել փոխանցված փաստաղթերի ամբողջականությունը։