Առաջարկվում է պարտադիր զինծառայությունից ազատել պատերազմի և ՀՀ պաշտպանության ժամանակ զոհված զինծառայողների հարազատ եղբայրներին կամ որդիներին

Ազգային ժողովը մարտի 4-ի նիստում առաջին ընթերցմամբ քննարկել է ԱԺ պատգամավոր Հայկ Սարգսյանի հեղինակած ««Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին» օրենքի նախագիծը:

Առաջարկվում է պարտադիր զինվորական ծառայությունից ազատել պատերազմի և ՀՀ պաշտպանության ժամանակ զոհված զինծառայողների հարազատ եղբայրներին կամ որդիներին:

Հայկ Սարգսյանի խոսքով՝ գործող կարգավորումներով զինծառայությունից ազատվելու պարտադիր պայման է նաև ընտանիքում միակ արու զավակ լինելը:

«Հանուն հայրենիքի կյանքը զոհաբերած մեր հայրենակիցների ընտանիքների նկատմամբ խորին հարգանքը և բարոյական պարտքը մեզ պարտավորեցնում է պարտադիր զինվորական ծառայությունից ազատելու հնարավորություն տալ նրանց ընտանիքի մյուս անդամներին»,- ընդգծել է պատգամավորը:

Անդրադառնալով այն մտահոգություններին, որ փոփոխությամբ կընկնի զինված ուժերի մարտունակությունը կամ լրացուցիչ անվտանգային խնդիրներ կառաջանան՝ հեղինակը պարզաբանել է, որ նման խնդիր չկա, քանի որ օրենքի շահառուների թիվը քիչ է. առաջիկա զորակոչի ընթացքում օրենքից կօգտվի 10, 2022թ. ձմեռային զորակոչին՝ 17, 2023թ. ամառային զորակոչին՝ 11, իսկ 2023թ. ձմեռային զորակոչին՝ 14 զորակոչիկ:

Հայկ Սարգսյանը տեղեկացրել է, որ այս պահին պարտադիր զինվորական ծառայության մեջ գտնվող 16 զինծառայող զորացրվելու հնարավորություն կունենա:

Կամավորական ճակատ մեկնած և զոհված, ինչպես նաև անհետ կորած կամ անհայտ բացակայող ճանաչված զինծառայողների ընտանիքների անդամները ևս կօգտվեն օրենքի հնարավորությունից:

ՀՀ պաշտպանության նախարարությունն առաջարկել է տարբերակել հայրենիքի պաշտպանության ժամանակ զոհված և ծառայության ընթացքում մահացած զինծառայողների եղբայրներին և որդիներին, ու օրենքը տարածել միայն պաշտպանության ժամանակ զոհված զինծառայողների ընտանիքների անդամների վրա: Հայկ Սարգսյանը տեղեկացրել է, որ ընդունել է ՊՆ առաջարկը:

Հարակից զեկույցում ԱԺ պաշտպանության և անվտանգության հարցերի մշտական հանձնաժողովի անդամ Վահագն Ալեքսանյանը ներկայացրել է հանձնաժողովի դրական եզրակացությունը:

ՀՀ պաշտպանության փոխնախարար Արման Սարգսյանի խոսքերով՝ իրենց առաջարկների մասով կա փոխհամաձայնություն նախաձեռնողի հետ, ուստի գործադիրը կոչ է անում ընդունել նախագիծը՝ ներկայացված առաջարկների հաշվառմամբ:

Պատգամավորներն իրենց ելույթներում կարևորել են օրենսդրական առաջարկը և ընդգծել դրա անհրաժեշտությունը հատկապես զոհված զինծառայողների ընտանիքների հոգեբանական ու սոցիալական խնդիրների հաղթահարման տեսանկյունից: Բարձրացվել է օրենքից օգտվողների համար ուսումնական դասընթացների կազմակերպման հարցը, որպեսզի վերջիններս զինվորական ծառայության հմտություններին տիրապետեն: Առաջարկվել է առարկայական արտոնություններ սահմանել այդ խմբի զինծառայողների համար, օրինակ՝ ծառայությունն անցնեն կենտրոնական ապարատում կամ իրենց բնակավայրին մոտ զորամասում:

«Հայաստան» խմբակցության տեսակետը ներկայացնելով՝ Սեյրան Օհանյանը կարծիք է հայտնել, որ յուրաքանչյուր բարեփոխում պետք է համահունչ լինի բանակում իրականացվող բարեփոխումներին: Խմբակցության ղեկավարի գնահատմամբ՝ հեռանակարային ռազմավարական խնդիր է քննարկվում և պետք է մտածել պետության ընդհանուր պատրաստության մասին: Նա մտահոգիչ է համարել այն, որ արտոնություններ տալը կարող է լրացուցիչ ծանրություն ստեղծել բանակի համար:

Եզրափակիչ ելույթում Հայկ Սարգսյանն անդրադարձել է պատգամավորների հարցադրումներին ու մտահոգություններին: