Նախատեսվում է ծառայության վայրում ծառայողական բնակարանով չապահովվելու դեպքում պայմանագրային զինծառայողներին փոխհատուցում տալ

Ազգային ժողովը մարտի 4-ի նիստում առաջին ընթերցմամբ քննարկել է «Զինվորական ծառայության և զինծառայողի կարգավիճակի մասին» օրենքում առաջարկվող փոփոխությունները: Նախաձեռնությունը հեղինակել է «Պատիվ ունեմ» խմբակցության պատգամավոր Թագուհի Թովմասյանը:

Օրենքը սահմանում է, որ ծառայության վայրում ծառայողական բնակարանով չապահովվելու դեպքում այլ բնակարան վարձակալելու դիմաց Կառավարության սահմանած կարգով և չափերով պայմանագրային զինծառայողներին տրվում է դրամական փոխհատուցում:

Թագուհի Թովմասյանին հայտնի են բազմաթիվ դեպքեր, երբ զինծառայողները մի շարք պատճառներով չեն կարողանում պայմանագիր կնքել այն սեփականատերերի հետ, որոնց տունը վարձակալում են: Փոխարենը զինծառայողները վարձավճարի փոխհատուցում ստանալու նպատակով համապատասխան հանձնաժողով են ներկայացնում այն սեփականատիրոջ հետ կնքված պայմանագիրը, որի տանը չեն ապրում:

Պատգամավորի գրությանն ի պատասխան` Դատախազությունից հայտնել են, որ 81 քաղաքացու նկատմամբ հարուցվել է քրեական գործ` խարդախության հոդվածով: «Ստացվում է, որ զինծառայողը վարձով ապրելու համար դատվում է խարդախության հոդվածով»,- մտահոգություն է հայտնել Թագուհի Թովմասյանը:

Իրավիճակը կանխելու նպատակով հեղինակն առաջարկում է զինծառայողից այլևս չպահանջել նոտարական վավերացմամբ վարձավճարի պայմանագիր: Միայն սեփականություն չունենալու մասին Կադաստրի կոմիտեի տեղեկանքը պետք է բավարար լինի այդ փոխհատուցումից օգտվելու համար: Հեղինակը կարծում է, որ պետությունը պետք է ընդգծված վերաբերմունք ցուցաբերի զինծառայողների նկատմամբ` հաշվի առնելով նրանց տրվող աշխատավարձի չափը:

Թագուհի Թովմասյանը նշել է, որ խնդիրը քննարկվել է շահագրգիռ բոլոր կողմերի հետ:

Գլխադասային` ԱԺ պաշտպանության և անվտանգության հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Գուրգեն Մելքոնյանը: «Մեր երկրի պաշտպանության հետ կապված բոլոր հարցերը մեզ համար չափազանց կարևոր են, և դրանց բազմակողմանի ուսումնասիրությունն անհրաժեշտ ենք համարում»,- ընդգծել է պատգամավորը:

Կառավարության տեսակետը բարձրաձայնել է ՀՀ պաշտպանության նախարարի տեղակալ Արման Սարգսյանը: Նա, ներկայացնելով կառավարության տեսակետը, նշել է, որ առաջարկվող փոփոխությունները չեն բխում օրենքի 65-րդ հոդվածի կարգավորման էությունից: Հոդվածի կարգավորման նպատակը ոչ թե պարզապես դրամական փոխհատուցում տրամադրելն է, այլ` բնակարանային պայմանների բարելավման կարիք ունեցող զինծառայողներին աջակցելը: Կառավարությունը ծրագրում է համալիր լուծումներ տալ զինծառայողների` բնակարանով ապահովման գործընթացին և այս պահին առաջարկում է ձեռնպահ մնալ կարգավորումների ընդունումից:

ԱԺ «Պատիվ ունեմ» խմբակցության անունից ելույթ է ունեցել Թագուհի Թովմասյանը: Նա անդրադարձել է առաջարկվող փոփոխությունների վերաբերյալ պատգամավորների ելույթներում հնչած մտահոգություններին: Պատգամավորը փաստել է, որ նախաձեռնության վերաբերյալ պատգամավորներն որևէ առաջարկ չեն ներկայացրել:

Սեյրան Օհանյանը, ներկայացնելով ԱԺ «Հայաստան» խմբակցության տեսակետը, նշել է, որ հեռանկարային լուծումը` զինծառայողներին հավելավճարների տրամադրումն է:

ԱԺ «Քաղաքացիական պայմանագիր» խմբակցության դիրքորոշումը բարձրաձայնել է Արթուր Հովհաննիսյանը: Նա նշել է, որ խմբակցությունը կարևորում է զինվորականներին վերաբերող ցանկացած նախագիծ, սակայն ներկայացված նախաձեռնությամբ չի լուծվում ոլորտում առկա խնդիրը: