Արջերը նորից վնաս են հասցրել Ամասիա միավորված համայնքի մեղվապահների տնտեսություններին

Արջերը նորից վնասներ են հասցրել Ամասիա խոշորացված համայնքի բնակավայրերի տնտեսություններին: Ամասիայի տարբեր բնակավայրերի 10-նյակ  տուժած տնտեսություններ ահազանգել են  Շրջակա միջավայրի նախարարություն, մարզպետարան ու պատկան այլ կառույցների։

Ամասիայի բնակիչ Մերուժան Ավագյանը մեղվի փեթակները տան բակում առավոտյան հայտնաբերել է կոտրված վիճակում: Արդեն երրորդ անգամ գիշերով իրենց բակ մտած արջը փեթակները բացելուց ու կողաշրջելուց հետո կոտրել է մեղվաթերթրիկները և ամբողջությամբ կերել ամբողջ ձմեռ դրանց վրա կուտակված մեղրը:

«Էս փեթակի մեջի մեղուները սառել են, էս ռամկեն, որ մասը որ մեղուն  մեղր էր կուտակել,կ ծիկ էր կազմել, լրիվ կերել է, մնացածը՝ կոտրել ու թողել:Նույնը էն փեթակի դեպքում է արել, ոչ մի մեղվաթերթ ամբողջական չի թողել»,- ասում է մեղվապահ  Մերուժան Ավագյանը:

Արջն իր գործողությունները կատարել է անձայն, ընդամենը մի քանի մետր հեռավորության վրա գտնվող տանը ձայներ չեն լսել: Փեթակները կոտրելուց ու քաղցը հագեցնելուց բացի, ոչնչացրել է բոլոր մեղվաընտանիքները:

Ձորամերձ տարածքում ապրող մեղվապահի ենթադրություններով՝ արջն իրենց  բակ է  հասել Ախուրյանի կիրճի տարածքից: Առավոտյան ձյան վրա նկատելի են եղել կովկասյան գորշ ցեղատեսակի արջի թաթերի հետքերը, հայտնաբերել է նաև մեղրաթերթերի մնացորդներ:

Մարտի 27-ին էլ արջը մտել էր Դավթյանների տան բակ, վնասել 10 փեթակներից 9-ը: Ավագյանների ընտանիքի նման Դավթյաններն էլ զրկվել են մեղվապահությամբ զբաղվելու հնարավորությունից:

Տնտեսություններ մտնող արջին որսացել էին տեսախցիկները, բնակիչներն են տեսել ու նկարահանել, թե ինչպես է օրը ցերեկով կարմիր գրքում գրանցված կովկասյան գորշ արջը տան բակերով շրջում ու սնունդ է ման գալիս։

«Իմացանք, որ գորշ արջ է, կարմիր գրքում է գրանցված: Մեզ ասացին, որ հանկարծ վնաս չտանք իրեն, որովհետև չի թույլատրվում, քրեական գործ կհարուցեն: Շատ վտանգավոր է, տունն այս տարածքից ընդամենը 10-15 մետր է հեռու, երեխաների համար էլ է վտանգ ներկայացնում»,- ասում է արջի արկածներից  տուժած Ամասիա համայնքի բնակիչ Արտյոմ Դավթյանը:

Ոչ միայն բնակիչների արձանագրած կադրերը և միաժամանակ տարբեր տնտեսություններում արջի վնասումները մարդկանց ենթադրել են տալիս, որ արջը միայնակ չի գործում և նրա հետ շրջում են քոթոթները: Արջից կամ արջերից տուժած բնակիչներն անհանգստացած են, որ հնարավոր է սոված լինելու դեպքում հարձակվեն նաև մարդկանց ու ընտանի կենդանիների վրա, կովկասյան գորշ արջը վտանգավոր է դարձել Ամասիայի մի քանի համայնքների համար: Խնդրի շուրջ ShantNews.am-ը պարզաբանումներ է ստացել  շրջակա միջավայրի նախարարությունից։

«Նախարարությունը արջին քնեցնելու համար չունի այդ միջոցները, տարբեր կառույցների հետ հիմա բանակցությունների փուլում ենք, թե ինչպես կարելի է այդ խնդիրը լուծել: Նախարարությունն ինքը լիազորված չի դա անելու: Շատ վտանգավոր է իսկապես, հուսով եմ, որ խնդիրը շուտափույթ լուծում կստանա»,- նշել է շրջակա միջավայրի նախարարության փորձագետ Տաթևիկ Ցյուրքերը:

Նույն պատասխանը մեղվապահները ստացել էին, երբ իրենք էին ահազանգել նախարարություն։ Փորձագետի փոխանցմամբ մասնագետները փորձում են պարզել, թե ինչպես և որտեղից են այս տարածքներում հայտնվել  արջերը, սա ըստ նախարարության պատասխանատուի, հյուսիսային  բնակավայրերի համար արտառոց երևույթ է համարվում։