Արթուր Դավթյանը ներկայացրել է ՀՀ դատախազության 2021թ. հաշվետվությունը

Քրեական հետապնդման մարմինների համար հաշվետու տարին աշխատանքի ծանրաբեռնվածության և բարդությունների առումով արտառոց տարի է եղել. հայտնել է ՀՀ գլխավոր դատախազ Արթուր Դավթյանն ԱԺ պետական-իրավական հարցերի մշտական հանձնաժողովի ապրիլի 22-ի նիստում` ներկայացնելով «Հայաստանի Հանրապետության դատախազության 2021թ. գործունեության մասին» հաղորդումը, տեղեկացնում է ԱԺ կայքը։

2021թ. ընթացքում Հայաստանի բոլոր նախաքննական մարմինների վարույթում քննվել է շուրջ 44.751 քրեական գործ: Նախորդ տարվանից 10.000-ով ավելի: «Ընդ որում, դատախազական ծանրաբեռնվածությունը 44.751 քրեական գործի նկատմամբ հսկողություն իրականացնելիս 1 դատախազի հաշվով կազմել է շուրջ 123 քրեական գործ: Քննիչի միջին ծանրաբեռնվածությունը հանրապետությունում եղել է 76 քրեական գործ»,- հայտնել է ՀՀ գլխավոր դատախազը:

Վերոնշյալ քրեական գործերի քննության ընթացքում դատախազական ներգործության միջոցները ծանրաբեռնվածության մեջ ոչ միայն չեն զիջել թվային ցուցանիշներով, բովանդակային արդյունավետությամբ, այլև կրկնակի աճ են գրանցել: «Տարվա ընթացքում կայացվել է շուրջ 9000 դատախազական ակտ: Էապես ավելացել են դատախազական ցուցումների թվերը: Դատախազների կողմից տրվել է 5300 ցուցում, որը կրկնակի գերազանցում է նախորդ տարվա ցուցանիշը»,- ընդգծել է Արթուր Դավթյանը:

Հաշվետու տարում դատախազության համար շարունակել է առաջնային մնալ կոռուպցիայի դեմ պայքարը: Տարվա ընթացքում կոռուպցիոն բնույթի հանցագործություններ կատարելու համար քրեական հետապնդում է իրականացվել 1698 անձի նկատմամբ, ինչը 300-ով ավելի է նախորդ տարվանից:

«Այդ 1698 անձանցից մոտ 600-ը պաշտոնատար անձինք են: Տարվա ընթացքում հաջողվել է քննությունն ավարտել և դատի տալ մոտ 433 անձի` կոռուպցիոն հանցագործություններ կատարելու համար: Տարվա ավարտի դրությամբ ընթացիկ քրեական գործերով բացահայտված` պետությանը պատճառված վնասը կազմել է 443 միլիարդ դրամ: Միայն նախորդ տարվա ընթացքում փաստացի քննության փուլում վերականգնվել է 7 միլիարդ դրամի վնաս: Այս քրեական գործերի մեծամասնությունն արդեն երկար ժամանակ քննվել էր: Ակնհայտ է, որ պետությանը պատճառած վնասի հաշվարկը, դրա պարզումը, ապացուցողական հիմնավորումը ժամանակատար են և պայմանավորված են նաև փորձաքննությունների նշանակմամբ, ուստի դեռևս մեկ տարի առաջ հարուցված քրեական գործերով արդյունքը տեսնում ենք ավելի ուշ: Իսկ այս տարվա առաջին եռամսյակում արդեն ունենք պետությանը պատճառված վնասի 19 միլիարդ դրամի վերականգնում: Սա վկայում է, որ ավելի վաղ հարուցված քրեական գործերը մոտենում են հանգուցալուծմանը»,- շեշտել է գլխավոր դատախազը:

Պետական շահերի պաշտպանության ոլորտում ներկայացվել է շուրջ 77 հայց` 626 միլիոն դրամ հայցագնով, որից 39-ը բավարարվել է դատարանների կողմից, և 264 միլիոն դրամ վերականգնվել է:

Գլխավոր դատախազը, անդրադառնալով դատախազության ապօրինի ծագման գույքի բռնագանձման ուղղությամբ կատարած աշխատանքներին, նշել է, որ համապատասխան վարչությունը ձևավորման առաջին օրվանից ծանրաբեռնված և մեծածավալ աշխատանք է իրականացրել: Տարվա կտրվածքով վարչության վարույթում գտնվել է 279 անձի վերաբերյալ ուսումնասիրություն: Տարեվերջին ավարտված են եղել 14 անձի վերաբերյալ ուսումնասիրություններ, որոնցով բացահայտվել է ենթադրյալ ապօրինի ծագում ունեցող 94 անշարժ գույք, 23 շարժական գույք, 23 ընկերությունում մասնակցություն և 27 միլիարդ դրամ գումար: Այս պահին դատարան ներկայացվել է 6 հայց:

Արթուր Դավթյանը նշել է, որ դատախազության հաջորդ առաջնահերթությունը եղել է 2020թ. 44-օրյա պատերազմին առնչվող քրեական գործերի քննությունը: 2021թ. ընթացքում վարույթում քննվել է 44-օրյա պատերազմում հանցագործությունների վերաբերյալ 2150 քրեական գործ. տարվա ավարտի դրությամբ քրեական հետապնդում է իրականացվել 800 անձի նկատմամբ: «55 անձ արդեն իսկ այդ քրեական գործերով դատի է տրվել, ունենք համապատասխան դատավճիռներ. արդեն իսկ ավարտված քրեական գործերով պարզվել է, որ, ցավոք, պատերազմական գործողությունների ընթացքում մեր Զինված ուժերի ներկայացուցիչներ, բազմաթիվ սպաներ, այդ թվում` բարձրաստիճան սպաներ, մարտական ծառայության պարտականությունները պատշաճ չկատարելու դրսևորումներ են ունեցել, որոնցով այդ անձանց նկատմամբ ունեցել ենք քրեական հետապնդումներ, ունենք նաև դատի տրված անձինք, մնացյալ գործերով նախաքննությունը շարունակվում է»,- ընդգծել է նա:

Ինչ վերաբերում է Ադրբեջանի ռազմաքաղաքական ղեկավարության կողմից կատարված հանցագործություններին, այդ առումով ևս արդեն իսկ քննության արդյունքներով դատախազությունն ունի պատկեր` օբյեկտիվ ապացույցներով փաստագրված: Դա վկայում է այն մասին, որ Ադրբեջանի ռազմաքաղաքական ղեկավարության զինծառայողները թույլ են տվել միջազգային մարդասիրական իրավունքի կոպիտ խախտումներ, կոնկրետ դեպքերում կանխամտածված թիրախավորվել են բնակավայրերը, քաղաքացիական անձինք, իրականացվել է քաղաքացիական անձանց սպանություն, խախտվել են պատերազմ վարելու կանոններ, արգելված զինատեսակներ են կիրառվել, թիրախավորվել, վնասվել ու ոչնչացվել են հայկական պատմամշակութային արժեքներ և ազգային ատելության հողի վրա իրականացվել են բռնություն գործադրելու, խոշտանգման, սպանության գործողություններ:

Գլխավոր դատախազի խոսքերով` ծավալուն հաղորդման մեջ ներկայացված են դատախազության ինչպես ձեռքբերումները, այնպես էլ բացթողումները:

Հանձնաժողովը տարեկան հաշվետվությունն ընդունել է ի գիտություն: