Շիրակի մարզում անասնագլխաքանակի պատվաստումները կատարվել են թերացումներով, անճշտություններ են հայտնաբերվել հաշվառման գործընթացում

Այսօր մարզխորհրդի հերթական նիստում քննարկված հարցերի մեծ մասը վերաբերել է  գյուղատնտեսության ոլորտին: Լավ նորությունն այն էր, որ մարզի ջրամբարներում կուտակված ջրի պաշարները բավարար են, ու առայժմ շատ քիչ ծավալի ոռոգման ջրի պահանջ կա։ Նախորդ տարվա նույն ժամանակահատվածի համեմատ՝ հաջողվել է  կուտակել  մոտ երկու անգամ ավելի  ջուր, միայն  Վարդաքարի ջրամբարում դեռ անհրաժեշտ ծավալ չկա։ Հավաստիացում եղավ, որ ոռոգման եռուն սեզոնին ջուր կհասնի բոլոր հողօգտագործողներին, անկախ նրանից, որ հացահատիկային կուլտուրաների փոխարեն այս տարի մարզում ավելի շատ կարտոֆիլի ցանք են կատարել, ինչի արդյունքում ջրի ծավալային պահանջարկը կավելանա։

Մարզի անասնագլխաքանակի լրացման հարցը ևս պակաս կարևորներից չէ, այդ թվում և ժամանակին պատվաստումները։ Սննդի անվտանգության և տեսչական մարմնի  մարզային կառույցի ղեկավարը խոսել է սիբիրախտի և դաբաղի դեմ պատվաստումներից ու փաստեր ներկայացրել թերացումների պատճառների մասին։ Համայնքներից տարեսկզբին ներկայացված անասնագլխաքանակի մասին տվյալներում կան անհամապատասխանություններ։

«Համայնքների կողմից գլխաքանակի հաշվառումները սխալ են կատարվել, ինչ թվեր որ տվել են, սխալ է, գլխաքանակի մեծ տարբերություն կա, դրանից բացի, այս պահի դրությամբ սիբիրախտի և դաբաղի պատվաստումները հիմնականում Ախուրյանի տարածաշրջանում 40-50 տոկոս պակաս է կատարվել, նույնը՝ Ամասիայում և Աշոցքում, Գյումրիում ունենք թերացումներ մոտ 40 տոկոսի չափով»,- նշել է  ՍԱՏՄ Շիրակի մարզային կենտրոնի տնօրեն Արտուշ Հովհաննիսյանը։

Փոխարենը այլ հիմնավորումներ ներկայացրին համայնքների ղեկավարները, նշելով, որ անհամապատասխանություններն առաջացել են հիմնականում այն պատճառով, որ համայնքներում անասնաբույժներն ու վակցինատորները տարբեր մարդիկ են, և հենց այստեղից էլ խնդիրն առաջացել է։

«Որոշակի անհամաձայնություններ ունեմ, մենք առաջարկեցինք, որ համայնքներում մեր նշանակած անասնաբույժները լինեն նաև վակցինատորներ, բայց դա չընդունվեց։ Հիմա Վանաձորից եկել է վակցինատորը, որը Արևիկ գյուղում պետք է վակցինացիա կատարի, մենք իր հետ մի երկու հոգի էլ մարդ պիտի դնենք, որ տները ցույց տա, իսկ, օրինակ, Ազատանում մենք նման խնդիր չունենք, երկու գործընթացն էլ իրականացնում է նույն մարդը։ Եկեք ընդունենք, որ այս մոտեցումը սխալ է, վակցինատոր են դառնում մարդիկ, որոնք ընդամենը մեկ շաբաթ կամ 15 օր ուսուցում են անցնում»,- ասել է Ախուրյան խոշորացված համայնքի ղեկավար Արծրունի Իգիթյանը։

Բուն պատճառները հստակեցնելու համար հաջորդ շաբաթվանից համայնքներում կսկսվեն ստուգայցեր, որի ընթացքում կպարզվեն անասնագլխաքանակի  տարբերության և պատվաստումային գործընթացի հետ կապված անհամաձայնություններն ու խնդիրները։