Հանրային քննարկում Գյումրիի պատմական միջուկի փողոցների վերակառուցման ծրագրի շուրջ․ մեկնարկի ժամկետներն առայժմ հստակեցված չեն

Համաշխարհային բանկի միջոցներով պատմական միջուկի փողոցների վերակառուցման աշխատանքների մեկնարկի հստակ ժամկետներ դեռ չեն նշվում, նախագծող ընկերության պատասխանատուները սա պայմանավորում են  ընթացող նախապատրաստական աշխատանքներով։ Այսօր քաղաքապետարանում երրորդ հանրային քննարկումն է անցկացվել ծրագրի շուրջ, որտեղ բնապահպաններն ու նախագծողները ներկայացրել են շրջակա միջավայրի վրա ազդեցության գնահատման և փորձաքննության եզրակացությունները, խոսել են առկա ռիսկերից ու նախագծային մանրամասները քննարկել։

Ընդհանուր 7  կմ երկարության փողոցների կամ 50 հազար քառակուսի գծամետր տարածքների հիմնանորոգում․․․ Սա Համաշխարհային բանկի միջոցներով  իրականացվելիք այն աշխատանքներն են, որոնք ներառված են «Գյումրի քաղաքի զբոսաշրջության ենթակառուցվածքների և ճանապարհների վերակառուցում» ենթածրագրում։

Վերակառուցումն ու հիմնանորոգումները վերաբերում են հիմնականում պատմական միջուկի փողոցներին՝ Աճեմյան, Հանեսօղլյան, Ջիվանի, Աբովյան, ինչպես նաև Տերյան, Նալբանդյան փողոցներին, Հաղթանակի պողոտային և Սուրբ Ամենափրկիչ եկեղեցու հարակից պուրակին։

Շինարարության ընթացքում փողոցները միակողմանի կփակվեն, բայց զբոսաշրջիկների ու քաղաքի հյուրերի շրջայցերը պատմական միջուկ չի արգելվի։ Շրջակա միջավայրի ազդեցության վրա ռիսկերի կառավարումը նաև ենթադրում է շինարարության ընթացքում վերահսկողական հստակ գործառույթի իրականացում, որին և վերաբերում էր քաղաքապետի խորհրդականի հարցադրումը։

«Փորձից ելնելով՝ ես մտածում եմ, որ դուք այսքան լավ նախագիծը, որ անում եք, հետագայում նույն որակի հեղինակային հսկողություն իրականացնելո՞ւ եք, թե՞ ոչ, եթե ոչ, ապա ստանալու ենք նույն պատկերը՝ պարզապես թղթի վրա։ Խոսքով լավ-լավ բաներ եք գրում, շինարարությանը չեք հետևում, և ամբողջ քաղաքը ծածկվում է ցեխի ու փոշու մեջ, մարդկանց շատ լուրջ անհանգստություն եք պատճառում»,- ասել է Գյումրիի քաղաքապետի խորհրդական Ալբերտ Մարգարյանը։

«Հալդի քոնսալթ» ՍՊԸ բնապահպան Վիկտոր Բախտամյանը վստահեցրել է, որ շինարարության ընթացքում լինելու է վերահսկողական եռաստիճան համակարգ։

«Շինարարությունն ունենալու է տեխնիկական վերահսկող, թիմում լինելու են համապատասխան մասնագետներ, որոնք հսկելու են արդեն շինարարական աշխատանքներում ներգրաված մասնագետներին։ Ունենալու ենք նաև Տարածքային զարգացման հիմնադրամի համապատասխան մասնագետ, որը և ստուգելու է նախորդ երկու վերահսկողներին»,- նշել է բնապահպանը։

Նախագծային գործընթացներից ու վերահսկողական մեխանիզմներից բացի, պատմական միջուկի ենթակառուցվածքների վերակառուցման ծրագրում առաջնահերթ են դիտվում նաև հին ճարտարապետական շենքերի հիմքերի ուսումնասիրությունները։ Սա ևս հանրային քննարկման մասնակիցների կարևոր շեշտադրումներից էր։

Վերակառուցվող բոլոր փողոցներում ջրատար խողովակները, մալուխները լինելու են ստորգետնյա, փողոցները պահպանելու են իրենց նախնական ճարտարապետական տեսքը։ Արդեն հստակեցված է՝ հին բազալտե բրուշատկաները փոխարինվելու են նորերով, հները հնարավոր է՝ օգտագործվեն երկրորդական փողոցների կամ անցուղիների սալապատման համար։

«Ինչի համար են փոխվում հին քարերը նոր քարերով, որովհետև հին քարերն արդեն իսկ բավականին մաշվածություն ունեն և ոչ մի ձև չեն համապատասխանում շինարարական նորմերի պահանջներին, բայց որպես  երկրորդային ճանապարհի համար՝ օգտագործման պիտանի են, հնարավոր է օգտագործել»,- նշել է «Հալդի քոնսալթ» ՍՊԸ տնօրեն Դավիթ Հովսեփյանը։

Հաղթանակի զբոսայգուն հարակից փողոցների հիմնանորոգման ընթացքում, ըստ նախագծի, հեղեղատարների նորացում չի նախատեսվում, այս ծրագրում ներառված չէ նաև Հաղթանակի պողոտայի այգու բարեկարգումը։ Ըստ նախագծողների՝ հեղեղատարները ծրագրում չներառելու պատճառով տեղումների ժամանակ  փողոցները ջրածածկ չեն լինի։ Նախագիծը պատրաստ է, բայց շինարարության մեկնարկի հստակ ժամկետներ դեռ չեն նշում։

Շինարարության մեկնարկից առաջ նախագծող ընկերության ղեկավարը հայտնում է վերջնաժամկետների մասին։ Եվս մեկ հանրային քննարկում է սպասվում, որից հետո շինընկերության ընտրության մրցույթ է կայանալու։ Այս ընթացքում նախագծողները քաղաքապետարան են ներկայացրել նաև սուրբ Ամենափրկիչ եկեղեցու հարակից պուրակի ու շատրվանների հիմնանորոգման նախագիծը, որն արժանացել է հավանության։