«Հատուկ դասարան»-ը վերադառնում է. հեռուստադիտողին նոր անակնկալներ են սպասվում

«Հատուկ դասարան» հեռուստասերիալը վերադառնում է: Այդքան սպասված երկրորդ եթերաշրջանը շուտով դարձյալ կլինի «Շանթ»-ի եթերում կամ, եթե այլ կերպ ասենք, ուսումնական տարին նաև «Հատուկ դասարան»-ում է սկսվել, բայց դեռ միայն՝ նկարահանման հրապարակներում: Որպեսզի հեռուստաէկրաններին հեռուստադիտողները նորից իրենց սիրելի հեռուստանովելը դիտեն նույն որակով ու նույն էմոցիաներով, բայց որքան հնարավոր է շուտ, ստեղծագործական թիմը վաղ առավոտից մինչև ուշ երեկո ակտիվ նկարահանումներ է իրականացնում:

Օր առաջ հեռուստանովելը պետք է եթերում լինի. սա հեռուստադիտողների պահանջն է, ինչն էլ հեռուստաընկերությունն իրականացնում է: SHANTNEWS.am-ն այցելել է նկարահանման հրապարակ, հետևել նկարահանումներին ու նաև դերասանների հետ զրուցել:

Անի Պետրոսյանի հետ զրույցը նկարահանումների արանքում, կարճատև դադարի ընթացքում ենք հասցնում: Կարապետյանին մարմնավորող դերասանուհին, պարզվում է, ինքն էլ է հեռուստասերիալի հավատարիմ հեռուստադիտողներից: Ասում է՝ սերիալներում նկարահանվելու ընթացքում սովորաբար միայն այդ սերիալների առաջին մի քանի սերիան է դիտում, որ հասկանա՝ կերպարը մարմնավորելիս ի՞նչ սխալներ է թույլ տալիս և ինչպե՞ս պետք է շարունակի կերտել իր դերը: «Հատուկ դասարան»-ը, սակայն, գրավել է առաջին իսկ սերիայից: Դիտել է բոլոր 100 սերիաները: Սյուժեն շատ հետաքրքիր է՝ նկատում է Անին:

Ուսուցչի դերում, սակայն, Պետրոսյանը ինքն իրեն երբեք չի պատկերացրել, բայց, ասում է՝ ինչպես գիտեք, դերասանուհին ամեն դեր էլ պետք է կարողանա կերտել: Սերիալում ամենակարևորը, ըստ Անիի, այն է, որ հեռուստադիտողին փորձում են ինչ-որ բան սովորեցնել։

«Ի՞նչ ենք փորձում սովորեցնել. մարդկային լինել, հանդուրժող լինել, իրար սիրել և ամենակարևորը՝ կարողանալ ներել, որ հետևանքները վատ չլինեն: Ավելի ճիշտ՝ սովորեցնում ենք, որ մարդ մարդու նկատմամբ պետք է մարդ լինի, այլ ոչ թե գայլ»,- նշում է դերասանուհին:

Այս հեռուստասերիալում նաև ուսուցչի կերպարն է արժևորվում՝ սա ևս կարևոր հանգամանք է Անիի համար: Դերասանուհու խոսքով՝ իրենք փորձում են ամեն ինչ անել՝ ցուցադրելու համար, որ ուսուցիչն ամենաառաջնային մարդկանցից մեկն է երեխաների կյանքում: Հիշում է, թե ժամանակին, երբ ինքն է աշակերտ եղել, ինչպես էին իրենց էլ ասում՝ ձեր դասղեկը ձեր երկրորդ մայրն է:

«Ես իմ դասղեկից շատ գոհ եմ, ընկեր Գալոյանից, եթե նա ողջ է, ես կուզեմ, որ ինքը սա լսի, ես իրեն շատ վաղուց չեմ տեսել: Երկրաշարժի ժամանակ ինքն է ինձ փրկել, իր ընտանիքին թողել է ու մինչև վերջին վայրկյանն ինձ հետ է եղել, որ իմ ծնողները մոտենան ու ինձ տանեն: Այնպես որ, ուսուցիչնե՛ր, ես ձեզ բոլորիդ սիրում եմ ու հուսամ, որ էս դերն այնպես կկատարեմ, որ շատ չեք ջղայնանա ինձ վրա»,- ժպիտի տակ թաքցնելով հուզմունքը՝ ասում է դերասանուհին ու անմիջապես դարձյալ կերպարանափոխվում ու ուսուցչուհի Կարապետյանը դառնում, որովհետև դադարը նկարահանման հրապարակում երկար չի կարող տևել, պետք է հեռուստանովելը որքան հնարավոր է շուտ հասնի հեռուստադիտողների դատին:

Նկարահանումները նաև դպրոցում են շարունակվում:

Ձեզ արդեն ծանոթ դերասաններին նորերը կմիանան: Փակագծերը, սակայն, հիմա չենք բացի, այդ մասին՝ առաջիկայում: Մինչ այդ Հայկ Դարբինյանին ենք հանդիպում: Երիտասարդ դերասանը հեռուստանովելում Ալեքսանդրին՝ Սաշին է մարմնավորում: Սաշի կերպարը սերիալի բացասական կերպարներից է: Այդ կերպարն էլ, սակայն, իր առաքելությունն ու ասելիքն ունի:

«Սաշն այն մարդն է, որին պետք է սիրել: Եթե իրեն տան այն վերաբերմունքը, որը ստանում են մյուս աշակերտները, գուցե ինքն այսպիսին չլիներ: Մենք համոզվել ենք և դեռ կհամոզվենք, որ Սաշը շատ ավելիին է ունակ, բայց չի անում: Իրականում Սաշը շատ ավելի խղճով է, քան հեռուստադիտողը պատկերացնում է: Բոլորն էլ ունեն ուղղվելու հնարավորություն և Սաշն էլ բացառություն չէ, վերջիվերջո, մեր հեռուստասերիալի գլխավոր ուղերձներից մեկը հենց դա է, որ բոլորին պետք է տրվի երկրորդ հնարավորություն»,-ասում է Հայկը:

Մեր իրականության մեջ էլ կան Սաշի նման կերպարներ, որոնք սիրո պակասից, հոգատարության պակասից դառնում են այնպիսին, ինչպիսին Սաշն է՝ կարծում է Հայկ Դարբինյանը: Դերասանը վստահ է՝ այդպիսի մարդիկ անպայման փոխվում են, պարզապես նրանց սեր ու հոգատարություն է պետք:

Ըստ դերասանի՝ «Հատուկ դասարան»-ի հանդեպ հատուկ վերաբերմունք է դրսևորվում նաև ստեղծագործական անձնակազմի կողմից: Շատ մտերմիկ մթնոլորտ է տիրում թե՛ նկարահանման հրապարակում, և թե՛ հրապարակից դուրս՝ ասում է Հայկը: Զրույցը դերասանը ցանկանում է հեռուստադիտողներին ուղղված խոսքով եզրափակենք.

«Ես նաև խնդրում եմ մեր աշակերտներին, ուսուցիչներին, որ իրենց մեջ գտնվող Սաշին չանտեսեն, փորձեն սեր տալ, գուցե դրա բացակայությունն է, որ դրդում է իրենց նմանվել մեր հեռուստասերիալի Սաշին: Ուղղակի սեր ու հոգատարություն տվեք, ես վստահ եմ, որ նրանք ձեր աչքի առջև կփոխվեն ու կդառնան ավելի լավը»:

Հեռուստասերիալը եթերում կհայտնվի հաշված օրերի ընթացքում: Ստեղծագործական անձնակազմը խոստանում է՝ հեռուստադիտողներին հետաքրքիր անակնկալներ են սպասվում: Այդ անակնկալների մասին ավելի մանրամասն «Հորիզոն» լրատվական ծրագիրը կպատմի:

SHANTNEWS.am-ն էլ կշարունակի ներկայացնել նկարահանման հրապարակներում տիրող մթնոլորտն ու կզրուցի ձեզ համար արդեն այդքան սիրելի ու հարազատ դարձած դերասանների հետ: