«Հատուկ դասարան»-ի ընկեր Դավիթն ու Աբելը. SHANTNEWS-ի զրույցը նկարահանման հրապարակից

Վիլեն Սարգսյանն այս օրերին օրվա հիմնական մասը «Հատուկ դասարան»-ի նկարահանման հրապարակներում է անցկացնում: Դերասանների հետ զրույցը նկարահանումների արանքում, կարճատև դադարի ընթացքում ենք հասցնում: Հեռուստանովելի առանցքային կերպարներից մեկին՝ ընկեր Դավիթին մարմնավորող Վիլեն Սարգսյանն անկեղծանում է` ինքն ու Դավիթը շատ քիչ ընդհանրություններ ունեն:

Ընկեր Դավիթին մարմնավորող դերասանը երեխաներին կրթելու փորձ պարզվում է՝ ունեցել է, երբ մագիստրատուրայում սովորելիս է եղել:

«Ուսուցչի աշխատանքը շատ դժվար ու պատասխանատու աշխատանք է, այսինքն՝ պետք է ունենաս անսահման մեծ համբերություն, օվկիանոսի չափ համբերություն: Իսկ ես իրականում համոզված եմ, որ չեմ կարող մտնել այդ պատասխանատվության տակ: Վիլենն ունի համբերություն, բայց երեխաների հետ աշխատելու համար չէ դժվար: Ես փորձ ունեմ երեխաների հետ աշխատելու, երբ մագիստրոս էի, պրակտիկա էի անցնում: Ես չկարողացա, դա բարդ աշխատանք է իրականում: Երեխաներին կրթելու, դաստիարակելու ընթացքը իմը չէ: Սրա համար պետք է տաղանդ ունենալ, որպեսզի կարողանալ լինել մանկավարժ, ի ծնե պետք է մանկավարժ լինել»,- ասում է Վիլեն Սարգսյանը:

Նրա գնահատմամբ՝ հավաքական կերպար է ընկեր Դավիթը, ծայրահեղ դրական, բայց միևնույն ժամանակ՝ նաև թերություններով: Դերասանը փորձում է ավելի շատ ներկայացնել իր մարմնավորած կերպարի երկակիությունը թե որպես մարդ, որ ունի թերություններ և որպես ուսուցիչ, որ փորձում է օգնել աշակերտներին: Դա է, ըստ դերասանի, հենց գրավում իրեն: Վիլեն Սարգսյանը համոզված է՝ երկրորդ եթերաշրջանն էլ անկանխատեսելի կլինի, իսկ հարցին, թե ո՞րը դարձավ «Հատուկ դասարան»-ի հաջողության գրավականը, Վիլենն այսպես է պատասխանում.

«Սա առնչվում է բոլորիս, որովհետև դպրոցի մասին է, դեռահասների մասին է, հասանելի է բոլորին: Ամենագլխավորն այս սերիալում այն է, որ մենք ցույց ենք տալիս, թե որը պետք է լինի ուսուցչի գործառույթը, ուսուցիչը ոչ թե էստեղ տալիս է զուտ ինֆորմացիա, ոչ թե զուտ կրթում է, այլև դաստիարակում: Գլխավոր գաղափարներից է նաև միմյանց օգնելու պատրաստակամությունը: Պետք է կարողանալ օգնել այն դեռահասներին, որոնք հայտնվել են անդունդի եզրին, պետք է օգնել նրանց կողմնորոշվելու համար»,- նշում է Վիլենը:

Իսկ հեռուստասերիալում անդունդի եզրին հայտնված կերպարներից է նաև Աբելը: Այս կերպարը մարմնավորում է Լյովա Խուրշուդյանը: Նրա հետ ևս զրուցում ենք:

Ըստ դերասանի՝ դեռահասները մեր հասարակության չկողմնորոշվածներն են, Աբելն էլ այդ դեռահասներից է, որ փորձում է գտնել իր տեղը կյանքում:

 «Իմ կերպարը կոնկրետ հայաթի վատ տղան է, որը ընկնելով փորձությունների մեջ, տարբեր պատմությունների միջով անցնելով, ընկնել-ելնելով, սովորում է կյանքը: Ես էլ եմ Աբելի պես կարծում՝ պետք է դժվարությունը փորձել ու ժամանակին գիտակցել և հետ կանգնել այդ ամեն ինչից»,- ասում է Լյովա Խուրշուդյանը:

Դերասանը նկատում է՝ հատուկ դասարանում սովորող աշակերտները «ինչպիսին պետք է չլինելու» օրինակներն են: Այս հեռուստասերիալում հենց դա է նաև կարևորը, որ ցուցադրվում է, թե ինչպիսին չպետք է լինել ու ինչ իրավիճակում կհայտնվես, եթե քեզ այդպես պահես:

Լյովա Խուրշուդյանը դեռ Երևանի թատրոնի և կինոյի պետական ինստիտուտում է սովորում: «Հատուկ դասարան»-ը նաև երիտասարդ դերասանների համար իր հատուկ նշանակությունն ունեցավ: Նրանցից շատերն առաջին անգամ են նկարահանման հրապարակներում, հիմա արդեն շնորհիվ այս հեռուստասերիալի փորձառու են դարձել: Այդ փորձառությամբ էլ երկրորդ եթերաշրջանում կփորձեն արդարացնել հեռուստադիտողների սպասելիքները:

Իսկ երկրորդ եթերաշրջանին երկար սպասել ստիպված չեք լինի: Եվս մի քանի օր, և «Հատուկ դասարանը» կթակի ձեր հեռուստաէկրանները: Մինչ այդ «Հորիզոն»-ն ու SHANTNEWS.am-ը կշարունակեն լինել նկարահանման հրապարակներում ու զրուցել արդեն սիրելի ու հարազատ դարձած դերասանների հետ, որ նրանց նաև կադրից դուրս ճանաչեք ու տեսնեք, թե ինչպես են սիրելի հեռուստասերիալի՝ ձեզ հայտնի տեսարանները շունչ առնում: