Ռոբերտ Քոչարյանի փաստաբանների բողոքի քննությունն ավարտվեց

Վերաքննիչ դատարանում ավարտվեց ՀՀ երկրորդ նախագահ Ռոբերտ Քոչարյանի փաստաբանների բողոքի քննությունը: Փաստաբան Արամ Օրբելյանը լրագրողների հետ զրույցում հայտնեց, որ նիստի ընթացքում քննարկվեցին բոլոր փաստարկները. դատարանի որոշումը կհրապարակվի երկուշաբթի՝ 16:00-ին:

«Պարոն Քոչարյանն այսօր ևս ելույթ ունեցավ, բավական տպավորիչ ելույթ էր: Նա ռեպլիկներին ի պատասխան ներկայացրեց իր դիրքորոշումը: Ակնկալիքները դրական են, կարծում եմ՝ մեր հայցը պետք է բավարարվի, կալանքի որոշումը պետք է վերացվի»,- ասաց նա՝ նշելով, որ իրենց հիմնավորումներն ավելին էին, հակառակ դեպքում պետք է դիմեն հաջորդ ատյանին:

Օրբելյանի խոսքերով՝ կալանքը գործի մի կտորն է, ուստի գործի քննության հետ էլ կան որոշակի հարցեր: Նա նշեց, որ ինչպես առաջին ատյանի դատարանում, այնպես էլ այստեղ գործընթացի հետ կապված որևէ կողմնակալության խնդիր չեն կարող ներկայացնել, քանի չկան որոշումն ու հիմնավորումները, բայց ընթացքը հարթ է եղել:

Լրագրողները հետաքրքրվեցին՝ հնարավո՞ր է երկրորդ նախագահի ելույթից ինչ-որ հատված հրապարակվի: Փաստաբանը պատասխանեց, որ դեռ չեն կարող հրապարակել, քանի որ կալանքի որոշման գաղտնիությունն է տարածվում իր վրա, սակայն պլանավորում են որոշակի փուլում դիմել վարույթն իրականացնող մարմնին՝ որոշակի փաստաղթղթեր, այդ թվում գուցե ելույթի որոշակի հատվածներ, գուցե ամբողջական ելույթը հրապարակելու հարցով, բայց դեռևս նման գործընթաց չկա:

Օրբելյանը հայտնեց, որ նախագահի ելույթում ինչ-որ սենսացիոն բաներ չեն եղել:

«Մեղադրանքի այս ամբողջ ընթացքի գործընթացների մասով տրված են պարզաբանումներ, որոնք որոշակի լույս են սփռում որոշակի գործընթացների վրա: Բայց սենսացիոն բաներ չկային, նա տալիս էր մի շարք պարզաբանումներ, որպես այդ ժամանակ գործող նախագահ, ինչը որոշակի լույս էր սփռում»,- ասաց նա:

Փաստաբանն ասաց, որ իր պաշտպանյալը՝ Ռոբերտ Քոչարյանը, շարունակում է պնդել, որ ինքն անմեղ է: Նրա խոսքերով՝ անձին կալանավորելու համար նրա մեղավորությունը պետք է ապացուցվի, ոչ թե ենթադրություններ պիտի լինեն, այլ բավարար ապացույցներ, մինչդեռ մեղադրող կողմի ներկայացրած փաստաթղթերից որևէ մեկը չի ապացուցում, որ կա պատշաճ վարքագծի խնդիր, ուստի ընդամենը ենթադրել, որ եթե եղել է նախագահ, հետևաբար ունի ազդեցություն, բավարար չէ, որ անձի ոչ պատշաճ վարքագիծը ենթադրվի:

Հարցին՝ նիստի ժամանակ լսո՞ւմ էին դատարանի առջևում իրականացվող ակցիայի ընթացքում հնչեցվող կոչերը, նա պատասխանեց.

«Ինչ-որ ձայն եկավ, բայց քանի որ պատուհանները փակ էին, ոչինչ չի լսվել»:

Ռոբերտ Քոչարյանի պահման պայմաններին անդրադառնալով, հարցին՝ արդյո՞ք այդ պայմաններն առանձնահատուկ են, Օրբելյանը պատասխանեց, որ երկրորդ նախագահն առանձնահատուկ դժգոհություն չունի, բայց պետք է հասկանալ, որ քրեակատարողական հիմնարկ է: Նա հայտնեց, որ տեխնիկական խնդիրներն արդեն լուծվել են, Ռոբերտ Քոչարյանն ունի մարզվելու հնարավորություն, նաև մեկժամյա զբոսանքի և գիրք գրելու: Տեսակցության մասով, ըստ փաստաբանի, կա արգելք, սակայն այդ որոշումը ևս կբողոքարկվի, քանի որ հիմնավորվածության մասով կան որոշակի խնդիրներ: