Ուղղությունը՝ Երևանի ավագանու ընտրություններ. ո՞ր ուժերն են պատրաստվում մասնակցել ընտրապայքարին

Քաղաքական ուժերը շարունակում են Երևանի ավագանու ընտրություններին մասնակցության հայտ ներկայացնել: Օգոստոսի 16-ին ՀՀ կառավարություն կներկայացվի Երևանի ավագանու լիազորությունների ժամկետը կրճատելու մասին նախագիծը:

Ըստ այդմ՝ լիազորությունների ժամկետը կրճատելուց հետո ավագանին իրավունք չունի նշանակելու տեղական հանրաքվե, անվստահություն հայտնելու քաղաքապետին, կատարելու պաշտոնների նշանակումներ, ընդունելու կամ փոփոխելու Երևանի սեփականություն համարվող գույքն օգտագործման տրամադրելու և օտարելու տարեկան ծրագիրը:

Համաձայն «Երևան քաղաքում տեղական ինքնակառավարման մասին» օրենքի 17-րդ հոդվածի՝ կառավարությունը կրճատում է ավագանու լիազորությունների ժամկետը, եթե քաղաքապետի ընտրության օրակարգով նիստը գումարելուց հետո՝ երկշաբաթյա ժամկետում, քաղաքապետի թեկնածու չի առաջադրվում կամ առաջադրված մեկ թեկնածուն չի հավաքում անհրաժեշտ թվով ձայներ:

Ավագանին իր լիազորությունների ժամկետը կրճատելուց հետո շարունակում է իր լիազորությունների իրականացումը մինչև նորընտիր ավագանու առաջին նիստը:

Կառավարությունը ավագանու լիազորությունների ժամկետը կրճատելու մասին որոշման հետ մեկտեղ նաև նշանակում է ավագանու արտահերթ ընտրություններ. դրանք անցկացվում են ավագանու լիազորությունների ժամկետի կրճատումից հետո՝ ոչ շուտ, քան 30, և ոչ ուշ, քան 40 օրվա ընթացքում: Երևանի ավագանու ընտրությունն, ամենայն հավանականությամբ, տեղի կունենա սեպտեմբերի կեսերին:

Ո՞ր ուժերն են հայտարարել Երևանի ավագանու ընտրություններին մասնակցելու մտադրության մասին

«Արդարություն» կուսակցության քաղաքական խորհուրդը որոշել է մասնակցել Երևան քաղաքի ավագանու առաջիկա ընտրություններին: Այստեղ միաժամանակ որոշել են հնարավոր համագործակցության հարցով բանակցել քաղաքական այլ ուժերի հետ:

«Ժառանգություն» կուսակցության վարչությունը ևս որոշում է կայացրել մասնակցել Երևանի ավագանու ընտրություններին:

«Ծառուկյան» դաշինքի ընտրական ցուցակը գլխավորում է խմբակցության անդամ, ԲՀԿ քաղաքական խորհրդի քարտուղար Նաիրա Զոհրաբյանը, ում հաջորդում են Պետրոս Ղազարյանը և Արման Աբովյանը:

ՀՀԿ-ն դեռ չի շտապում հաստատել Երևանի ավագանու ընտրություններին իր մասնակցությունը: Shantnews.am-ի հետ զրույցում ՀՀԿ կազմակերպչական հանձնաժողովի նախագահ Ռուբեն Թադևոսյանը նշել է, որ դեռ այդ մասին որոշում չունեն, քանի որ գործադիր մարմնի անդամների մեծ մասը գտնվում են արձակուրդում:

Երևանի ավագանու առաջիկա ընտրություններում «Հայոց համազգային շարժում» կուսակցության ցուցակը կգլխավորի «Ծառուկյան» խմբակցության պատգամավոր Արարատ Զուրաբյանը:

Երևանի ավագանու ընտրություններին մասնակցել-չմասնակցելու հարցը թեժ քննարկումների թեմա է դարձել ՀՅԴ-ում: Ոմանք առաջարկում են չմասնակցել ՏԻՄ ընտրություններին՝ կադրային և ֆինանսական ռեսուրսների բացակայության պատճառով, մյուսներն էլ հակված են մասնակցել և հաղթահարել նվազագույն շեմը:

Սոցիալ-դեմոկրատ հնչակյան կուսակցությունը ևս կմասնակցի Երևանի ավագանու ընտրություններին: Այս մասին կուսակցությունը հաղորդագրություն է տարածել: Կուսակցության վարչությունը բանակցություններ է սկսում հնարավոր դաշնակից քաղաքական ուժերի հետ՝ միաժամանակ ունենալով ընտրություններին միայնակ մասնակցելու և սեփական քաղաքապետի թեկնածու առաջադրելու տարբերակ:

Երևանի ավագանու ընտրություններին մասնակցության հայտ ներկայացնող առաջին ուժերից էր «Քաղաքացիական պայմանագիր» կուսակցությունը, որի վարչության նիստում փակ քվեարկությամբ որոշվել է՝ Երևանի քաղաքապետի թեկնածուն լինելու է դերասան Հայկ Մարությանը:

Ի դեպ, օգոստոսի 10-ին աշխատանքային այցով Նոյեմբերյանում գտնվող ՀՀ վարչապետ, «Քաղաքացիական պայմանագիր» կուսակցության ղեկավար Նիկոլ Փաշինյանը Shantnews.am-ի թղթակցի հետ զրույցում հայտնել է, որ իրենց կուսակցությունը, հնարավոր է, դաշինքով մասնակցի ընտրություններին, բայց հնարավոր է, որ դա չլինի ԵԼՔ դաշինքը, այլ լինի բոլորովին նոր դաշինք: Փաշինյանը նշել է, որ հաստատ է մեկ բան՝ իրենք հանդես են գալու իրենց թեկնածուով:

Ճարտարապետ Անահիտ Թարխանյանը ֆեյսբուքյան իր էջում կատարած գրառմամբ տեղեկացրեց՝ առաջադրվել է Երևանի քաղաքապետի թեկնածու: «Իմ խորին երախտագիտությունն եմ հայտնում «Երևանի հանրություն» նախաձեռնություն ձևավորած հասարակական կազմակերպությունների գործընկերներին և «ԳԱԼԱ» կուսակցությանը ինձ Երևանի քաղաքապետի թեկնածու առաջադրելու համար։ Ես ջանք չեմ խնայի արդարացնելու Ձեր և երևանցիների սպասումները և վստահությունը»,- նշել է նա:

Լրատվամիջոցների հրապարակումների համաձայն՝ Երևանի ավագանու ընտրություններին մասնակցելու ցանկություն ունեն նաև Արաբկիր համայնքի նախկին ղեկավար Հովհաննես Շահինյանը և Հայ ազգային կոնգրեսը, որի ցուցակը գլխավորելու է Երևանի նախկին քաղաքապետ Վահագն Խաչատրյանը:

Ըստ մամուլի հրապարակումների՝ «Ելք» դաշինքի անդամ «Հանրապետություն» և «Լուսավոր Հայաստան» կուսակցությունները մտադիր են Երևանի ավագանու ընտրություններում առաջադրել ՀՀ արդարադատության նախարար Արտակ Զեյնալյանին:

Ամենայն հավանականությամբ Երևանի ավագանու ընտրություններին կմասնակցի նաև գործող ավագանու «Երկիր ծիրանի» խմբակցության ղեկավար Զարուհի Փոստանջյանը, ով Երևանի քաղաքապետի ընտրության առաջին փուլում առաջադրված միակ թեկնածուն էր:

Պատրաստեց Անուշ Թորոսյանը