Նախագծային փոփոխությունների պատճառով ծրագիրն ուշանում է․ Գյումրիում սոցիալական բնակարանների վերանորոգման սուբվենցիոն ծրագիրը հետաձգվում է

Այս տարի Գյումրիից կառավարություն ներկայացրած սուբվենցիոն փաթեթում  ներառվեցին պիլոտային ծրագրեր։ Համաֆինանսավորվող երկու ծրագրերն էլ  կարևոր սոցիալական բաղադրիչներ ունեն։ Դրանցից մեկը բնակարանային ապահովմանն է ուղղված, մյուսը՝ շենքերում էներգաարդյունավետության բարձրացմանը։

88-ից հետո առաջին շենքերը, որոնք կառուցվեցին Մուշ թաղամասում ամբողջովին բետոնյա կառուցատարրերից են կազմված։ Երկրաշարժից հետո հապճեպ կատարված բնակարանաշինության ընթացքում հաշվի չեն առնվել տեղի բնակլիմայական պայմանները։ Տասնամյակների ընթացքում բետոնյա սալերի քայքայման պատճառով շենքերում էներգաարդյունավետությունը նվազել է, բնակարաններում ջերմություն ապահովելը բնակիչների համար ծախսատար է:

Խիտ բնակեցված թաղամասի շենքերի բնակիչների համար տարիներով անլուծելի հարցը հայտնվեց համայնքային  խնդիրների լուծման առաջնահերթ ծրագրերում։ Այս տարվա սուբվենցիոն փաթեթով առաջին անգամ սկսվեց բազմաբնակարան շենքերի ջերմամեկուսացման ծրագիրը: Գյումրիի «Անի» և «Մուշ» թաղամասերում պիլոտային ծրագրում ընդգրկվեց 3 շենք։

«Այս տարվա համար մենք ընտրել ենք երեք շենք։ Առաջինը  Պարույր Սևակի փողոցի  թիվ 1 շենքն է, մյուսը Եղիշե Չարենցի փողոցի  7-րդ շենքն է, ևս մեկ շենք էլ ծրագրում է ընդգրկվել  Մուշ 2 թաղամասում։ Մենք ընտրել ենք այն շենքերը, որոնք ավելի շատ կարիք ունեն էներգաարդյունավետության բարձրացման, հիմնականում բետոնյա  շենքեր են, որտեղ կարիք կար ջերմամեկուսացման խնդիրների կարգավորման»,- նշում է Գյումրիի գլխավոր ճարտարապետ Հենրիկ Գասպարյանը։

Ընդհանուր, 800 միլիոն դրամ արժողության ծրագրում 200 միլիոնը համայնքի ներդրումն է, ըստ պայմանագրի՝ որոշակի ֆինանսական պարտավորություններ ունեն նաև բնակիչները, որոշ աջակցություն ցուցաբերել է նաև ՄԱԿ-ը, մնացածը  կառավարության համաֆինանսավորումն է: Մուշ  2 թաղամասում բազմաբնակարան շենքի արտաքին պատերին ամրացվում են 10 սմ հաստության պենոպլաստե շերտեր, իսկ պատուհանների շուրջ տեղադրվում են ապակեբամբակյա խորանարդներ, որոնք ունեն հատուկ նշանակություն:

«Այս դեպքում եթե շենքում հրդեհ բռնկվի, ապա չի տարածվի ամբողջ շենքում։ Հենց այդ նպատակով էլ մենք պատուհանների շուրջն ամրացնում ենք 30 սմ լայնքով և 10 սմ հաստության ստեկլովատե շերտ,-ասում է շինընկերության աշխղեկ Լյովա Սարգսյանը։

Մեկ շենքում ջերմամեկուսացում կկատարվի ընդհանուր 4800քմ մակերեսում: Արտաքին պատերը կունենան նաև  ցեմենտ-ավազային շերտով սվաղ: Իսկ դրանց  դիմացկունությունն ապահովելու համար շինարարները կիրառում են հատուկ տեխնոլոգիա:

Որոշ հատվածներում շենքի հիմնային հատվածում  նոր բազալտե քարերով, մոտ երկու մետր բարձրության որմնախարիսխ է շարվել, արտաքին պատերից բացի,  ջերմամեկուսացվել են շենքի նկուղները, որոնք հիմնական պատճառ էին միջանցիկ քամիների և խոնավության առաջացման, ինչից հիմնականում տուժում էին առաջին հարկերը։

Էներգաարդյունավետության բարձրացման ծրագրում ներառված է նաև շենքերի տանիքների նորացումը։ Մուշ թաղամասի ջերմամեկուսացվող բազմաբնակարան շենքում 2400 քմ տանիքի ազբոշիֆրերը փոխարինվել են մետաղապրոֆիլով, նորացվել են փայտյա հենասյուներն ու նրբատախտակները, տանիքը  ևս  ջերմամեկուսացվել է:

Գյումրին այս տարի կառավարություն է նեկայացրել նաև համայնքային ենթակայության սոցիալական բնակարանների վերանորոգման ծրագիրը, որը ևս համարվում է փորձնական: Նախատեսվում է  համայնքի և կառավարության համատեղ միջոցներով վերանորոգել ու հատկացնել  բնակարանի կարիք ունեցող ընտանիքներին։ Խոսքը համայնքային ենթակայության 16 բնակարանների մասին է: Սուբվենցիոն ծրագրի համամասնությունը հայտնի է,  ֆինանսական հատկացումների չափը ևս, բայց ծրագիրը դեռ չմեկնարկած դադարեցվել է, պատճառն էլի նախագծային խնդիրներն են։

«Մենք ավելի թեթև էինք պատկերացնում աշխատանքները, բայց երբ որ շինարարն արդեն սկսեց գործը կատարել, պարզվեց, որ էնտեղ  արդեն կոմունիկացիաների հետ խնդիրներ առաջացան, սանհանգույցների հետ խնդիրներ եղան, դրա համար էլ նախագիծը նորից մենք վերանայեցինք»,-պարզաբանում է Գյումրիի գլխավոր ճարտարապետը։

Գլխավոր ճարտարապետը հավաստիացնում է, որ  անհրաժեշտ նախագծային փոփոխություններն արդեն կատարվել են, բայց 16 բնակարաններում   վերանորոգումները երբ կվերսկսվեն, ժամկետներ չնշեց։ Հայտնեց նաև, որ նախագծում փոփոխությունները ենթադրում են հավելյալ ֆինանսական միջոցների ներգրավում։ Բայց շենքերի ջերմամեկուսացման ծրագիրն էլ անավարտ կմնա։   Աշխատանքները շինարարը ցուրտ եղանակներին կդադարեցնի։