Հայաստանի քաղաքական երկնակամարում շուտով նոր կուսակցություն կհայտնվի

Այսօր քաղաքագետներ Լևոն Շիրինյանն ու Հայկ Սուքիասյանը, իրավագետ Վարդան Այվազյանը, տնտեսագետ Նարեկ Մկրտչյանը և հասարակական գործիչ Մարիամ Մանուկյանը հայտարարել են, որ ձևավորել են նախաձեռնող խումբ «Հայաստանի քրիստոնյա ժողովրդական կուսակցություն» հիմնադրելու համար: Կուսակցությունը կարճ տարբերակով կանվանվի ՀՔԺԿ:

Կուսակցության հիմնադրման առիթով հրավիրած մամուլի ասուլիսում քաղաքագետ Լևոն Շիրինյանը հայտարարել է, որ թեև հայ ժողովրդի պատմության մեջ շատ կուսակցություններ են եղել, սակայն աշխարհում քրիստոնեությունը առաջինն ընդունած ժողովուրդը չի ունեցել քրիստոնեաժողովրդական կուսակցություն կամ շարժում: Այդ պատճառով էլ որոշել են լրացնել այդ բացը:

«Մենք մտածում ենք, որ թավշյա հեղափոխության արդյունքները անպայման պիտի ռեալիզացվեն, և երկրորդ թավշյա հեղափոխության նպատակները պետք է դառնան ուղենիշային մեր պետականության համար, որպեսզի վերադարձ չլինի երրորդ հանրապետության ճահճին ՝ սատրապության շրջանին»- հայտարարել է Լևոն Շիրինյանը:

Նրա տեղեկացմամբ՝ կուսակցության խորհրդանիշ է ընտրվել աստվածաշնչյան Նոյի ճերմակ աղավնին: Նախաձեռնողների պնդմամբ՝ կուսակցությունը կգործի աջակենտրոն գաղափարական դաշտում, լինելու է Հայ առաքելական եկեղեցու քրիստոնեական աշխարհայացքը կրող, լիբերալ-պահպանողական ուժ:

Նախաձեռնողների համոզմամբ՝ իրենք չեն կարևորում կուսակցական անդամների քանակը և գլխաքանակ ապահովելու մրցավազքին չեն մասնակցելու: Առաջնորդվելու են մեկ սկզբունքով, ով կկիսի իրենց գաղափարախոսությունը, նա էլ կարող է դառնալ իրենց ընտանիքի անդամ:

Լևոն Շիրինյանը նաև հայտարարել է, որ կուսակցությունը, առաջիկայում, անկախ համագործակցության ձևից, պաշտպանելու է թավշյա հեղափոխության առաջնորդ Նիկոլ Փաշինյանի տեսակետները, իսկ խորհրդարանական ընտրություններից հետո առավել կհստակեցնեն՝ գործելու են ընդդիմադիր դաշտում, թե համագործակցելու են իշխանությունների հետ:

«Գործելու ենք 2 սկզբունքով, քաղաքական կոնսենսուս բոլորի հետ խորհրդարանում և սոցիալական գործընկերություն: Հայաստանը օլիգարխիկ պետություն չպիտի լինի, օլիգարխիան պիտի ոչնչացվի, միանշանակ, և այդ կուրսը պաշտպանելու ենք, մշակութային ժառանգությունը պետք է մշակույթի բարձր շերտերով վերականգնվի»- հայտարարել է Շիրինյանը՝ ավելացնելով, որ ամեն ինչ անելու են վերականգնելու հայ ժողովրդի ոսկեդարը, այդ թվում՝ որևէ զիջում չեն ընդունում Արցախի հարցում:

Կուսակցական գաղափարական մանրամասներն ու շատ հարցերի նկատմամբ կուսակցության որդեգրած դիրքորոշումը նախաձեռնող խումբը պատրաստվում է ներկայացնել կուսակցության հիմնադիր վեհաժողովում:

Ի դեպ, կուսակցությունը պատրաստվում է մասնակցել խորհրդարանական արտահերթ ընտրություններին, վստահ, որ կհաղթահարեն անցողիկ շեմը, իսկ եթե չհաղթահարեն, ապա, ըստ Շիրինյանի, կշարունակեն աշխատել ու կնախապատրաստեն երկրորդ հեղափոխությունը:

Ի դեպ, պատասխանելով լրագրողների հարցերին՝ Շիրինյանը հերքել է այն պնդումը, որ իրենք նման անունով կուսակցություն են հիմնում՝ նույնականացնելու համար Խոսրով Հարությունյանի ղեկավարած Քրիստոնեադեմոկրատական կուսակցության հետ, պնդելով, որ Խոսրով Հարությունյանի կուսակցությունը անձնական, մարդ կուսակցություն է, իսկ իրենք գրպանի կուսակցություն չեն ստեղծում: Եվ երկրորդ, ըստ Շիրինյանի, նման անունով մյուս բոլոր կուսակցությունների հիմքում իրականում չկա քրիստոնեական արժեհամակարգ, ու այդ առումով էլ իրենց կուսակցությունը բոլորից տարբերվում է ու միակն է: