Պուտինի ատենախոսությունը գրել է միլիարդատեր ռեկտոր Լիտվինենկոն

Ռուսաստանում նախագահական ընտրությունների նախաշեմին գործող նախագահ Վլադիմիր Պուտինի անվան շուրջ սկանդալ է ծագել: Խոսքը վերաբերում է Պուտինի ատենախոսությանը, որը նա պաշտպանել է դեռ 1990-ականներին: Ազատություն ռադիոկայանի ռուսական ծառայությանը տված հարցազրույցում Ընդերքաբանության համալսարանի ռեկտոր, միլիարդատեր Վլադիմիր Լիտվինենկոյի դուստրը հայտնել է, որ Ռուսաստանի նախագահ Վլադիմիր Պուտինի ատենախոսությունն իր հայրը գրել է անձամբ:

Ժամանակին Օլգա Լիտվինենկոն մասնակցել է Պուտինի նախընտրական շտաբի աշխատանքներին, եղել է Սանկտ Պետերբուրգի Օրենսդիր Ժողովի պատգամավոր, սակայն հոր հետ հակասությունների պատճառով 7 տարի առաջ փախել է Ռուսաստանից և բնակվում է Լեհաստանում: Օլգա Լիտվինենկոյի կատարած մի շարք սկանդալային բացահայտումների հիման վրա հետաքննություններ են կատարվել նրա հոր՝ Վլադիմիր Լիտվինենկոյի դեմ: Այժմ Օլգա Լիտվինենկոն փորձում է այնպես անել, որ իր հայրը և նրա մի շարք ընկերներ հայտնվեն «Մագնիտսկու ցուցակում»:

Հայր և դուստր հակամարտության առանցքում է հայտնվել Վլադիմիր Պուտինը: Օլգա Լիտվինենկոն բացահայտել է, թե ինչպես է Պուտինը պաշտպանել իր ատենախոսությունը: Դա տեղի է ունեցել 1997թ., երբ Պուտինը զբաղեցնում էր Ռուսաստանի նախագահի աշխատակազմի ղեկավարի տեղակալի պաշտոնը:

«Հայրս Պուտինի համար անձամբ է ատենախոսություն գրել: 1997թ. մեր ամառանոց պատճենահանման սարք էին բերել: Հայրս արձակուրդ էր վերցրել: Պուտինը երբեք չէր գալիս ամառանոց, երբեք չէր խորհրդակցում հորս հետ ատենախոսության թեմայով: Նման բան չի եղել: Ամեն ինչ գրել է բացառապես իմ հայրը», – հարցազրույցում նշել է Օլգա Լիտվինենկոն:

Վլադիմիր Պուտինի ատենախոսության մեջ գրագողություն են հայտնաբերել դեռևս 2006թ. Վաշինգտոնի Բրուկինգզի ինստիտուտի մասնագետները: Ըստ նրանց՝ Պուտինի աշխատանքի հիմնական մասը արտագրվել է Պիտսբուրգի համալսարանի պրոֆեսորներ Ուիլիամ Քինգի և Դևիդ Քլիլանդի «Ռազմավարական պլանավորում և քաղաքականություն» գրքից՝ տպագրված 1979թ.:

Օլգա Լիտվինենկոյի կարծիքով, Պուտինն իր ատենախոսության դիմաց Վլադիմիր Լիտվինենկոյին ոչ թե գումար է տվել, այլ՝ պաշտոն:

«Հնարավոր է, որ հայրս անվճար է գրել աշխատանքը: Գուցե, նման կերպ նա շնորհակալություն է հայտնել ռեկտորի պաշտոն ստանալու համար: Բացի այդ, ողջ կյանքում նրանց կապել են տարբեր բիզնես շահեր», – նշել է Օլգա Լիտվինենկոն:

Լրատվամիջոցներում բազմիցս քննարկվել են Պուտինի և Լիտվինենկոյի հարաբերությունները: Ընդերքաբանության համալսարանի ռեկտորը երեք անգամ ղեկավարել է Պուտինի նախընտրական շտաբը: Նա ռուսական բուհերի ղեկավարների շրջանում ամենահարուստն է: Վլադիմիր Լիտվինենկոն իր 850մլն դոլարի հասնող կարողությամբ նույնիսկ հայտնվել է Ռուսաստանի ամենահարուստ 200 մարդկանց ցուցակում:

Սյուզաննա Չրաղյան