Մարդիկ Երևանից գալիս են հատուկ Գյումրի ներկայացում դիտելու և ոչ միայն քյալլա ուտելու․ Արա Խզմալյան

Ապրիլի 24-ից մայիսի 10-ը Գյումրին հյուրընկալում է հայկական ու միջազգային հայտնի թատերախմբերի ու սիրված արտիստների։ Դրամատիկական թատրոնի հարկի տակ տեղադրված մեծադիր պաստառներն խոսում են այն մասին, որ քաղաքը 17 օր ապրելու է թատերական կյանքով։ Այս փառատոնը Հայաստանում անցկացվող առաջին մեծամասշտաբ միջազգային միջոցառումն է, որին մասնակցելու համար Գյումրի կժամանեն ավելի քան 500 արտիստներ, թատերական արվեստի ներկայացուցիչներ։

«Ընտրված թատրոնները Հայաստանի լավագույն  թատերախմբերն են, փառատոնին  ներկայացումներով գալիս են Հայաստանի մարզերից։ Կապանից են գալիս, ինքս գնացել եմ Կապան, դիտել եմ ներկայացումը և խնդրել եմ տնօրենին, որ այս ներկայացումը բերեն Գյումրի։ Ներկայացում է գալիս Վանաձորի թատրոնից, Հայաստանի գրեթե բոլոր թատերական կազմակերպությունները մասնակից են միջազգային այս փառատոնին»,- Գյումրիի «Մտորումների թատրոնում» հրավիրված մամուլի ասուլիսին նշեց Գյումրիի միջազգային թատերական փառատոնի պրոդյուսեր Տիգրան Վիրաբյանը։

 Միջազգային  փառատոնը կարևոր առաքելություն ունի՝ հանրահռչակել հայկական թատերարվեստը, գնահատել մարզային թատրոնների ներուժը։ Միջազգային փառատոնին  հայկական թատերախմբերից բացի մասնակցության հայտ են ներկայացրել  արտերկրի հայտնի թատրոնները, որոնցից երկուսը միայն կխաղան  աճեմյանական բեմում, մյուսները կմասնակցեն այլ ձևաչափով։ Աշխարահռչակ այլ  թատերախմբերի ներկայությունն այս տարի հնարավոր չեղավ ապահովել, պատճառները տեխնիկական են, բեմերի  հագեցվածության  անհամապատասխանությունն էր խնդիրը։

ՀՀ ԿԳՄՍ նախարարի տեղակալ Արա Խզմալյանը խոստացավ ուշադրության կենտրոնում պահել  դրամատիկականի լուսաձայնային ու տեխնիկական հագեցվածության հարցը։ Փառատոնի անցկացումը Գյումրիում համարում է մշակութային կյանքի ակտիվացման լավագույն հնարավորությունն ու ազդակը։

«Մի շրջան կար՝ ես գրեթե ամեն շաբաթ օր գալիս էի Գյումրի ներկայացում դիտելու, որովհետև ներկայացումները բեմադրվում են  մայրաքաղաքի – Գյումրիի, Գյումրիի այլ համայնքների ստեղծագործողների միջև։ Մարդիկ Երևանից գալիս են հատուկ Գյումրի ներկայացում դիտելու և ոչ միայն քյալլա ուտելու համար»,- նշեց ԿԳՄՍ փոխնախարար Արա Խզմալյանը։

Գյումրիի  դրամատիկական թատրոնի հանդեպ վերաբերմունքն ու գնահատականն այսպիսին է` այն քաղաքի մշակութային դիմագիծն ընդգծող կարևոր կառույցներից է։ Գաղտնիք չէ, որ գրեթե բոլոր ներկայացումների հանդիսատեսը միայն գյումրեցին չէ, մարդիկ գալիս են այս քաղաք լավագույն բեմադրությունների համար։ Թատրոնի ու կինոյի քաղաքում՝ հին թատրոնի շենքում, 1912 թվականին բեմադրվել է առաջին օպերան՝ «Անուշ»-ը։ Հենց այդ պատմական շենքի ճարտարապետական հորինվածքն էլ դարձել է միջազգային փառատոնի լոգոտիպը։

«Մեր մեծերն այդ թատրոնի շենքով են թատերական կյանքը պատկերացնում Գյումրիում, և էս զարդանախշերը, որն այժմ էլ կա «Թումոյի» շենքի դիմային հատվածում, խորհրդանշում է, որ Գյումրին թատերական  ավանդույթների առաջամարտիկն է Հայաստանում։ Հայ թատրոնում Գյումրիի դերը էական  մեծ նշանակություն ունի և իր վիզուալ տեսքով էլ շատ թատերային է։ Կարևորում եմ էս սիմվոլի ներմուծումը թատերական փառատոնի կյանք»-լոգոտիպի մտահղացման մասին խոսեց Տիգրան Վիրաբյանը։

Ներկայացումները կլինեն  դրամատիկական թատրոնի մեծ և փոքր բեմերում, նաև բացօթյա բեմարահարթոկներում։ Փառատոնի մեկնարկը կտրվի  ապրիլի 24-ին  Երևանի Հրաչյա Ղափլանյանի անվան դրամատիկական թատրոնի խորհրդանշական «Մեծ լռություն» ներկայացումով։ Իսկ Գյումրիի թատրոնը փառատոնին ներկայացումներով հանդես չի գա, փոխարենն այդ օրերին հյուրախաղերով կլինի Հայաստանի մարզերում։