Սարգիս Խանդանյանի գլխավորած պատվիրակությունն աշխատանքային այցով Սլովակիայում է

Սլովակիայի Հանրապետության Ազգային խորհրդի արտաքին հարաբերությունների հանձնաժողովի նախագահ Մարիան Քերիի հրավերով ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանի գլխավորած պատվիրակությունը հունիսի 20-22-ն աշխատանքային այցով գտնվելու է Բրատիսլավայում: Պատվիրակության կազմում ընդգրկված են ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահի տեղակալ, Հայաստան-Սլովակիա բարեկամական խմբի անդամ Թագուհի Ղազարյանն ու արտաքին հարաբերությունների մշտական հանձնաժողովի անդամ Էդուարդ Աղաջանյանը:

Այցի ընթացքում խորհրդարանականները հանդիպել են Սլովակիայի Ազգային խորհրդի փոխխոսնակ Յուրայ Բլանարի, Արտաքին հարաբերությունների հանձնաժողովի նախագահ Մարիան Քերիի, հանձնաժողովի եւ Սլովակիա-Հայաստան բարեկամության խմբի անդամների հետ:

Հանդիպումներին մասնակցել են նաեւ Սլովակիայում ՀՀ արտակարգ եւ լիազոր դեսպան Արմեն Պապիկյանն ու պատվո հյուպատոս Բագրատ Հակոբյանը:

Հանդիպումների ընթացքում գոհունակությամբ արձանագրվել է Հայաստանի եւ Սլովակիայի միջխորհրդարանական հարաբերությունների զարգացման դրական դինամիկան: Սարգիս Խանդանյանն ընդգծել է, որ Սլովակիան Հայաստանի կարեւոր գործընկերներից մեկն է Եվրոպայում, եւ որ Հայաստանը խորապես շահագրգռված է ընդլայնել համագործակցությունը Սլովակիայի հետ փոխադարձ հետաքրքրություն ներկայացնող բոլոր ոլորտներում, ինչպես երկկողմ ձեւաչափով, այնպես էլ Եվրոպական Միության հետ հարաբերությունների շրջանակում: Սլովակ գործընկերները կարեւորել են միջխորհրդարանական շփումների ակտիվացումն ու ՀՀ ԱԺ պատվիրակության այցը Սլովակիա: Նրանք կարեւորել են նաեւ Հայաստանի` Եվրամիության հետ վիզաների ազատականացման հարցը եւ աջակցության պատրաստակամություն հայտնել:

Հայ խորհրդարանականները գործընկերների խնդրանքով հանգամանալից ներկայացրել են Լաչինի միջանցքի արգելափակման հետեւանքով ստեղծված իրավիճակը` անընդունելի համարելով միջանցքում Ադրբեջանի կողմից անցակետի տեղակայումը: Հանդիպումներում անդրադարձ է կատարվել տարածաշրջանի անվտանգային մարտահրավերներին, Ադրբեջանի կողմից Հայաստանի նկատմամբ իրականացվող ագրեսիվ քաղաքականությանը, վերջինիս կողմից ՀՀ ինքնիշխան տարածքների գրավմանը: ՀՀ ԱԺ պատվիրակության անդամները կարեւորել են Սլովակիայի դերը Հայաստանի սահմանին ԵՄ քաղաքացիական դիտորդական առաքելության տեղակայման հարցում:

Սարգիս Խանդանյանը բարձր է գնահատել Սլովակիայի Ազգային Խորհրդի` 2004 թվականին Հայոց ցեղասպանությունը ճանաչող եւ դատապարտող բանաձեւի ընդունումը եւ շնորհակալություն հայտնել սլովակ գործընկերներին 2020եւ2021 թվականներին Լեռնային Ղարաբաղի հակամարտության վերաբերյալ երկու բանաձեւերի ընդունման համար: