Եթե հանցակազմ չկա, ինչո՞ւ են Խոսրովի հրդեհից հետո տեղամասերի պետեր ու տնօրենի տեղակալ աշխատանքից ազատվել

SHANTNEWS-ն արդեն տեղեկացրել է, որ կարճվել է Խոսրովի արգելոցում 2017 թվականի օգոստոսի 12-ին բռնկված հրդեհի համար հարուցված քրեական գործը, իսկ անտառի «Խաչաձոր» տեղամասի պետ Պետրոս Հովհաննիսյանի արարքներում հանցակազմ չի հայտնաբերվել:

Ավելի վաղ SHANTNEWS-ը տեղեկություններ էր ստացել այն մասին, որ հրդեհից հետո Պետրոս Հովհաննիսյանն աշխատանքից ազատվել է: Ըստ լուրերի՝ պատճառը աշխատանքային թերացումն է: Այն, որ Պետրոս Հովհաննիսյանն այլևս Խոսրովի արգելոցում չի աշխատում, բնապահպանության նախարարությունից  հաստատեցին: Հարցին՝ եթե հանցակազմ չկա, այդ դեպքում ինչո՞ւ է հեռացվել աշխատանքից, ԲՆ տեղեկատվության և հասարակայնության հետ կապերի վարչության պետ Արմեն Վարդանյանը պատասխանեց, որ Հովհաննիսյանն ազատվել է սեփական դիմումի համաձայն:

Հարցին, թե որևէ խնդիր ունեցե՞լ է կամ արդյոք եղե՞լ է աշխատանքի թերացում, Արմեն Վարդանյանն այսպես պատասխանեց.

«Սեփական դիմումի համաձայն է ինքն ազատվել աշխատանքից: Պատճառաբանություն չկա»:

          Հրաչիկ Դանիելյանը՝ ձախից                                                                                                                                        Լուսանկարում Արայիկ Պետրոսյանն է

Ի դեպ, հրդեհից հետո Խոսրովի արգելոցում չեն աշխատում նաև «Խոսրով» տեղամասի պետ Հրաչիկ Դանիելյանը, ինչպես նաև «Խոսրովի անտառ պետական արգելոց» ՊՈԱԿ-ի տնօրենի՝ պահպանության գծով տեղակալ Արայիկ Պետրոսյանը: Տարածված լուրերի համաձայն՝ Հրաչիկ Դանիելյանն աշխատանքից ազատվել է անձնական խնդիրների պատճառով, թեև հայտնի է  որպես լավ աշխատակից:  Իսկ Արայիկ Պետրոսյանի պաշտոնը արգելոցում վստահել են դաշնակցական Գերասիմ Վարդանյանին:                                                                                                                                                                                       

Հրաչիկ Դանիելյանը և Արայիկ Պետրոսյանը ևս աշխատանքից ազատվել են սեփական դիմումների համաձայն: Չեն պատճառաբանել, թե ինչու: Իսկ այն խոսակցությունները, որ Հրաչիկ Դանիելյանն անձնական խնդիրներ է ունեցել, իսկ Արայիկ Պետրոսյանին ազատել են աշխատանքից, որպեսզի Գերասիմ Վարդանյանին աշխատանքի ընդունեն, հիմնավոր չեն»,- SHANTNEWS-ին ասաց ԲՆ տեղեկատվության և հասարակայնության հետ կապերի վարչության պետ Արմեն Վարդանյանը՝ հավելելով, որ Արայիկ Պետրոսյանն ու Գերասիմ Վարդանյանը միաժամանակ աշխատել են՝ զբաղեցնելով «Խոսրովի անտառ պետական արգելոց» ՊՈԱԿ-ի տնօրենի տեղակալների պաշտոնը:

Այնուամենայնիվ, Արմեն Վարդանյանը հաստատել է, որ երբ Արայիկ Պետրոսյանն ազատվել է աշխատանքից, Գերասիմ Վարդանյանն է դարձել «Խոսրովի անտառ պետական արգելոց» ՊՈԱԿ-ի տնօրենի՝ պահպանության գծով տեղակալը:

 ԲՆ տեղեկատվության և հասարակայնության հետ կապերի վարչության պետ Արմեն Վարդանյանի հետ հեռախոսազրույցն այստեղ.