Դեն Բիլզերյանի դեմ հետախուզման հայտարարությունից բարդույթների հոտ է գալիս. Ալեքսանդր Լապշին

Հայտնի իսրայելցի բլոգեր Ալեքսանդր Լապշինը ֆեյսբուքյան իր հերթական գրառման մեջ անդրադարձել է վերջերս տարածված տեղեկությանն այն մասին, որ Ադրբեջանի իշխանությունները հետախուզում են հայտարարել ամերիկահայ մեծահարուստ Դեն բիլզերյանի նկատմամբ:

«Երբ ես կարդացի, որ Ղարաբաղ այցելելու համար Ադրբեջանի դատախազությունը հետախուզում է հայտարարել ամերիկացի միլիոնատեր, շոումեն, կանանց սիրելի, թղթախաղերով տարված ու  կատակասեր այդ մարդու նկատմամբ՝ դա ինձ զվարճացրեց: Գեղեցիկ, մարզված, քաղաքականությունից հեռու ու Կալիֆորնիայի իր տանն արքայավայել ապրող տղան, որին սիրում են բոլոր գեղեցիկ կանայք, ու որի հետ մոտ հարաբերություններ ունի ամերիկյան գրեթե ողջ էլիտան՝ այդ թվում և Դոնալդ Թրամփը»,- գրում է Լապշինը:

Այս ամենը թվելուց հետո ռուս բլոգերն այս գործողությունները կապում է այդ երկրի ու հատկապես այդ երկրի ուժային կառույցներում աշխատող անձանց ու եղած բարդույթների հետ: Ուշադրություն է հրավիրում հատկապես այն բանի վրա, որ Արցախ այցելելու համար հիմնականում հատուկ ուշադրության են արժանանում հաճելի արտաքին ունեցող անձինք, որոնք, իր բնորոշմամբ, այդ մարդկանց ամբողջական հակապատկերն են:

«Այստեղից բարդույթների հոտ է գալիս: Ես որ անձամբ եմ ճանաչում մի քանի այնպիսի մարդկանց, որոնք ղեկավարում են այդ երկիրը, մասնավորապես ուժային կառույցներն ու դատախազությունը: Դրանք շատ վատ արտաքինով, թոռոմած ու կախված որովայններով մարդիկ են, հաստավիզ, թեփակոլոլ օձիքներով ու շքանշաններով լցված կրծքավանդակով անձինք են: Դենի հրեշավոր հակապատկերներ են: Այստեղ ակնհայտորեն չէր կարող չազդել ֆիզիոլոգիական նախանձի գործոնը: Այլ կերպ ինչպե՞ս բացատրել տասնյակ հազարավոր բիզնեսմենների ու քաղաքական գործիչների այցելությունը Ղարաբաղ: Այդ բարդույթավորված անձինք ընտրել են ամենաանվտանգ ու գեղեցիկ բլոգեր տղամարդկանց՝ ինձ, Վլադ Մոսեսովին և Դեն Բիլզերյանին»,- գրում է Լապշինը:

Վերջում, հետգրությամբ նշում է, որ եթե իր գեղեցկության համար ինքն իրեն չգովի, ապա ուրիշ ոչ ոք չի գովի, իսկ գեր մարդկանց դեմ ոչինչ չունի, քանի որ բազմաթիվ հրաշալի ու հումորով այդպիսի մարդկանց է ճանաչում:

Լապշինը անուն առ անուն դիմում է Ադրբեջանի դատախազությունում աշխատոեղ մի քանի անձանց՝ խորհուրդ տալով նրանց հնարավորինս շուտ հեռանալ այդ երկրից, քանի որ, իր խոսքով, վաղ թե ուշ մի օր նրանք էլ կարող են հայտնվել բանտերում:

«Ադրբեջանի Գլխավոր դատախազության հարգելի քննիչներ՝ գնդապետներ Քամալ Թալիբով, Վուգար Նասիբով և ձեր ղեկավար Ռուստամ Ուսուբով: Գիտեմ, որ դուք այդտեղ մեղադրանք եք հորինել Դենի դեմ, ձեր ոճն ու բառապաշարը զգացվում է: Հարցաքննության ժամանակ ասել եմ՝ կկրկնեմ, թողեք այդ գործն ու հեռացեք Ադրբեջանից: Այդտեղ ամեն ինչ վատ է ու ավելի վատ է լինելու: Վերջում ձեզ էլ են փակելու նույն Քուրդահանում: Դուք խելացի մարդիկ եք,  համոզված եմ, որ այդպես էլ կվարվեք»,-եզրափակել է Լապշինը: