Նոր Հայաստանի դաշնակից են բոլոր այն մարդիկ, ովքեր աշխատանքը համարում են մարդկային ամենաբարձր առաքինությունը. ՀՀ վարչապետ

ՀՀ վարչապետ Նիկոլ Փաշինյանը Արարատի մարզկենտրոնում սեպտեմբերի 22-ին հանդիպեց բնակիչների հետ: Նա նշեց, որ տպավորված է 84-ամյա Քնարիկ Մնացականյանի և նրա 90-ամյա ամուսնու հետ հանդիպմամբ: Վերջիններս 7 000 մ խաղողի այգի ունեն և արդեն քանի տարի այդ այգուց ռեկորդային՝ 25 տոննա բերք են ստանում և մթերում:

«Ես նրան հարցնում եմ` Քնարիկ մայրիկ, բա ո՞վ է օգնում ձեզ, ասում է` աշխատողներ ունենք, կազմակերպում ենք, ընդունում ենք աշխատանքի, այգին մշակում են: Վերջում պարզվեց, որ տարվա ընթացքում 84-ամյա Քնարիկ Մնացականյանը և 90-ամյա ամուսինը 20 աշխատատեղ են ապահովում: Մի գործարան, որ 20 աշխատատեղ բացելու է լինում, էլ Կառավարություն են դիմում, արտոնություններ են ուզում, շնորհակալություն են ուզում: Այս կինը և ամուսինը նույն խնդիրներն ունեն, ինչպես բոլորը` ջրի, պարարտանյութի, բերքահավաքի, մոլախոտի, ամեն պրոբլեմ, բայց էս կնոջ հետ կանգնած զրուցում եմ ու նա չի ասում` գիտես ինչ, վարչապետ ես, այս պրոբլեմը լուծիր: Ես նրա հայացքի մեջ կարդում եմ հետևյալը` «դու ով ես, որ իմ պրոբլեմը լուծես, ես ինքս իմ պրոբլեմը կլուծեմ» »,- ասաց նա:

Վարչապետը հայտնեց, որ ի դեմս Քնարիկ Մնացականյանի` գտել է մի շատ կարևոր դաշնակցի, որը չի պատրաստվում սպասել, որ ինչ-որ մեկն իր պրոբլեմը կլուծի, չի էլ պատրաստվում նստել տանը: Նրա խոսքով՝ այստեղ խնդիրը փողը չէ, այլ ինքնագնահատականը է, աշխատանքից հաճույքը, բերկրանքը ստանալը: Փաշինյանը հայտարարեց` ապագա Հայաստանի, նոր Հայաստանի դաշնակից է համարում բոլոր այն մարդկանց, ովքեր աշխատանքը համարում են մարդկային ամենաբարձր առաքինությունը, ովքեր չեն սպասում` մեկը իրենց ողորմություն կտա, այլ գիտեն` կարող են վեր կենալ, իրենց բարիքը ստեղծել իրենց աշխատանքով, կազմակերպչական ընդունակությամբ: Վարչապետն ընդգծեց՝ Հայաստանը մի երկիր է, որտեղ կարող են 20 աշխատատեղ ստեղծել` առանց գովազդելու, առանց պատվոգրերի, առանց մեդալների:

«Ես հավատում եմ, որ դուք հզոր եք, որ ուզեք, սարեր շուռ կտաք, դա է կարևոր: ՀՀ քաղաքացին ձեռք պարզող չի, որ ասի` ինձ կես կիլո բրինձ տվեք, հինգ հատիկ լավաշ, 5 հազար դրամ, որ գնամ, ձեր օգտին քվեարկեմ: ՀՀ քաղաքացին ձեռք տվող քաղաքացի է, որ ընկածին օգնի: Մենք պետք է իրար բարձրացնենք, սա է ամենակարևոր փոփոխությունը: Մեր երկրում պետք է ամենաբարձրը գնահատվի աշխատող, բարիք ստեղծող մարդը, շեշտը դրվի կրթության, աշխատանքի վրա: Աշխատելն ամոթ չէ, ժողովուրդ, չաշխատելն է ամոթ»,- նշեց Փաշինյանը:

Վարչապետն Արտաշատում հայտարարեց, որ հունվարի 1-ից կենսաթոշակի նվազագույն չափն ավելացվելու է և հավասարեցվելու է նվազագույն սպառողական զամբյուղին: Նա ընդգծեց` նվազագույն թոշակն ավելանալու է, որ մարդն իր սննդի հարցը կարողանա լուծել:

«Այսօր մեր կառավարությունը այդ հարցն է լուծում ձեզ համար: Հունվարի 1-ից 18 հազար դրամ կենսաթոշակը կդառնա 25 հազար դրամ»,- ասաց նա: