Նյու Յորք հասնելուն պես վարչապետը կշտապի համացանցից տեղեկանալ ընտրությունների նախնական արդյունքների մասին

ՀՀ վարչապետ Նիկոլ Փաշինյանը Նյու Յորք թռիչքից առաջ ուղիղ եթերով դիմել է երևանցիներին:

«Փարիզում եմ: Սպասում եմ Նյու Յորքի թռիչքին»,- գրել է վարչապետը:

Վարչապետն ուրախությամբ արձանագրել է, որ ընտրություններն անցնում են լավ տրամադրությամբ, միջադեպ չկա, հույս է հայտնել, որ լինելու են օրինակելի ընտրություններ: Փաշինյանը նշել է, որ թեպետ վիճակագրությունը փաստում է, որ նախորդ տարի տեղի ունեցած Երևանի քաղաքապետի ընտրությունների համեմատ այս անգամ ակտիվությունը 1-2 տոկոսով քիչ է, սակայն կարծում է` դա բացատրվում է նրանով, որ այս ընտրություններին «Գազել»-ներով տեղամասեր բերել չկա:

«Ես հույս ունեմ, որ մեր քաղաքացիներն ակտիվ մասնակցություն կցուցաբերեն` անկախ «Գազել»-ների գոյությունից: Այս ընտրություններին «Գազել»-ներ, խթաններ չեն լինելու, հույս ունեմ, որ իսկապես շատ ակտիվ կմասնակցեն մեր ընտրողները: Այս ընտրությունը բացառիկ է նրանով, որ բացառապես ձեր որոշումն է լինելու, այս առումով մեծ ինտրիգ է, թե ինչ արդյունքներ են արձանագրվելու ընտրություններում: Դա միայն դուք գիտեք և միայն ձեր որոշումից է կախված` ինչ է լինելու, համոզված եմ, որ ընդհանուր  առմամբ քվեարկությունը և ձայների հաշվարկը կանցնի սիրո և համերաշխ մթնոլորտում, չնայած իրավապահները ծառայություն են իրականացնում, չի կարող այլ տրամաբանության ներքո անցնել»,- ասել է նա:

Վարչապետը նշել է, որ ընդհանուր առմամբ ընտրությունների ընթացքը խաղաղ է, հանգիստ, առանց նյարդային ինչ-որ իրադարձությունների, չնայած մեկ-երկու փոքրիկ միջադեպ է տեղի ունեցել, որոնք այնքան էլ միջադեպ չեն, սակայն հույս է հայտնել, որ հընթացս դրանք էլ կկարգավորվեն: Վարչապետը տեսակետ է հայտնել, որ բոլոը հասկացել են` ՀՀ քաղաքացու իշխանությունը անառարկելի և անբեկանելի է, և ՀՀ քաղաքացու ազատ կամարտահայտմանը չի կարող որևէ բան սպառնալ:

Նա կրկին դիմել է երևանցիներին, կոչ արել անպայման գնալ տեղամասեր, կատարել իրենց ընտրությունը, հիշել, որ սա պատմական հնարավորություն է, ամեն ձայնը վճռորոշ է, ամեն քաղաքացի պետք է իր ձայնը հստակ բարձրացնի, իր խոսքը ասի` հասկանալով, որ դա միայն այսօրվան չի վերաբերում, այլև միջնաժամկետ և ռազմավարական հեռանկարին:

«Մեզ մոտ ամեն ինչ լավ է, եղանակը Փարիզում անձրևոտ է մի փոքր, բայց թռիչքային եղանակ է: Մենք շուտով կթռչենք Նյու Յորք: Երբ վայրէջք կատարենք, ընտրությունների նախնական արդյունքները կլինեն, և ես, օդանավից իջնելով, կշտապեմ ինտերնետ մտնել և տեսնել, թե ինչ է տեղի ունեցել Երևանում: Ամենակարևորը, որ կարգի, տրամադրությունների, օրինականության հետ կապված խնդիրներ չլինեն, ժողովուրդը ինչ որոշի, մենք խոնարհ ենք: Ես կվերադառնամ 29-ին, քանի որ Նյու Յորքից հետո մեկնելու եմ Դուշանբե` ԱՊՀ երկրների ղեկավարների գագաթնաժողովին: Հուսով եմ` ամեն ինչ նորմալ կլինի, կարգին կլինի, Հայաստանը կլինի նույն բարձր և ինքնավստահ տրամադրությամբ, ինչ տրամադրությամբ ես այսօր հեռացա Երևանից»,- նշել է վարչապետը: