Հանգուցյալներն այս անգամ, անհասկանալի պատճառներով, որոշեցին չմասնակցել ընտրություններին. Լևոն Բարսեղյան

Հայաստանում ընտրությունների ժամանակ առաջին անգամ չէ, որ դիտարկվում է թեքահարթակների բացակայության կամ կահավորման համատարած խնդիր: Այս մասին, ամփոփելով Երևանի ավագանու` սեպտեմբերի 23-ին կայացած ընտրությունները, նշեց «Թրանսփարենսի ինթերնեշնլ» հակակոռուպցիոն կենտրոնի իրավախորհրդատու Հերիքնազ Տիգրանյանը` հավելելով, որ այս խնդիրները տարիների ընթացքում լուծում չեն ստացել:

Տիգրանյանի խոսքերով` oրվա ընթացքում արձանագրվել են նաև այլ խախտումներ, որոնցից էականը հետևյալ դեպքերն են` մոտ 230 ընտրողի անուն ցուցակում կամ սարքում չի եղել, գրանցման հետ կապված խնդիրների մոտ 700 դեպք է արձանագրվել, ընտրողին օգնելու մոտ 40 դեպք, քվեարկության գաղտնիության խախտման 35 դեպք, 26 ընտրողներ իրենց անվան դիմաց ստորագրություն են նկատել, նրանցից մեկը չի քվեարկել, հեռացել է, իսկ մոտ 20 տեղամասում տեխնիկական սարքի խափանումներ են եղել:

Բանախոսը նշեց, որ մի քանի այլ, ավելի փոքր մասշտաբի խախտումներ ևս գրանցվել են` քարոզչություն, հակաքարոզչություն, դիտորդների ուղղորդման դեպքեր, փոքր տեխնիկական խնդիրներ, որոնք չէին կարող ազդել ընտրությունների արդյունքների վրա: Տիգրանյանն ընդգծեց` որպես ընտրող, այս ընտրություններին, ի տարբերություն նախկինի, չի տեսել թաղային խուժանի ներկայությունը, ովքեր հոգեբանական ճնշում են գործադրում թե՛ տեղամասում, թե՛ տեղամասից դուրս:

Ժուռնալիստների «Ասպարեզ» ակումբի նախագահ Լևոն Բարսեղյանը նշեց` այս անգամ չկային ՀՀԿ-ականների «տասովշիկների» բրիգադները, ներգրավված չէր քրեական խավը, որոնք ծանր հիվանդ տատիկ-պապիկներին «գրկած» բերում էին տեղամաս` անհրաժեշտ քվեն ապահովելու համար: Ազատ ընտրողների նկատմամբ ճնշումներ չկային, դա, Բարսեղյանի մասնավոր գնահատականներով, մոտ 150 հազար քվեի կշիռ է, և եթե դա ավելացնեին, մասնակցության մակարդակը կարող էր ձևակերպվել մինչև 63-65 տոկոս:

«Անցյալ տարի երեք քաղաքական ուժեր էին մասնակցում Երևանի ավագանու ընտրություններին: Մի շարք ուժերի` անցյալ տարվա ընտրություններին չմասնակցելն օբյեկտիվորեն պատճառաբանված չէ, ի՞նչն է պատճառը, որ այն ուժերը, որոնք անցյալ տարի չէին մասնակցում ընտրություններին, այս անգամ որոշեցին մասնակցել»,- հարց ուղղեց նա:

Բարսեղյանն ասաց, որ ընտրությանը չմասնակցողների երկու տեսակ կա. երբ ընտրությանը չմասնակցողը, հնարավոր է, համարում է, որ իր մասնակցությունն իմաստ չունի, ով էլ ընտրվի, տարբերություն չկա, ինքն անտարբեր է, նա հետագայում չի կարող բողոքի կամ քննադատության համար հայտունակ լինել, մյուսները համակարգին վստահում են, կարծում են, որ ով էլ ընտրվի, ընդունելի կլինի:

«Անլուրջ են այն մեկնաբանությունները, որ երեկ ի հայտ եկան և առաջիկա երեք օրերին քաղաքական քաղքենիների հիմնական երգացանկում են լինելու, թե մարդիկ չէին վստահում այս համակարգին, չեկան: Սրան պետք է ավելացնել այն հանգամանքը, որ հանգուցյալներն այս անգամ, անհասկանալի պատճառներով, որոշեցին չմասնակցել ընտրություններին: Տարբեր գնահատականներով` Երևանում ընտրելու իրավունք ունեցող քաղաքացիների 15-20 տոկոսը ՀՀ-ից դուրս էին գտնվում, ուստի կարծում եմ, որ այս ընտրություններին մասնակցության բավական բարձր տոկոս է գրանցվել»,- ասաց նա: