Փողոցաշինական ծրագիրը Գյումրիում ձգձգվում, իսկ որոշ հատվածներում դադարեցվել է

Վարկային ու դրամաշնորհային ծրագրով Գյումրիի փողոցների վերակառուցման աշխատանքները մի մասում դանդաղել են, որոշ հատվածներում՝ դադարեցվել: Պատճառները նույնն են, իսկ հետևանքները դեռ չեն վերացվել: Նախագծային թերություններից բացի՝ մեղքի բաժին ունեն նաև շինարարները: Որոշ հատվածներում անորակ աշխատանքի պատճառով կրկնակի աշխատանք է կատարվելու: Բայց, ընդհաուր առմամբ, ծրագիրը ժամկետներից շեղվում է հիմնականում պատվիրատուի, հանրային ծառայությունների  օպերատորների և նախագծողի չհամաձայնեցված աշխատանքի պատճառով:

Երկու ամսում շինարարներին հաջողել է ընդամենը քանդել քաղաքի կենտրոնը: Փողոցներում հողային զանգվածներ են, անանցանելի մայթերում չշարած եզրաքարեր։ Բայց դրանց համար փորած փոսերն արդեն երկու ամիս է՝ կան, եզրաքարեր տեղադրում են որոշ հատվածներում մեկ-երկու բանվորով:

«Էն թափը չենք կարողանում ապահովել, ոնց որ գործը սկսել էինք ու մեր ծախսերը կրճատելու համար քչացնում ենք աշխատակիցներին»,- բանվորների պակասն այսպես է ներկայացրել «ԱԱԲ պրոյեկտ» շինընկերության աշխատանքների ղեկավար Կարեն Մարտիրոսյանը։

Գործի ծավալները համեմատաբար մեծ են և աշխատանքն էլ ինտենսիվ միայն Երևանյան խճուղում: Պատվիրատուն՝ քաղաքապետարանը, շինարարին նոր պահանջ է ներկայացրել ՝ մոտ 5 մետրով լայնացնել  քաղաքի մուտքն հանդիսացող փողոցը : Սա  թերություններով կազմված նախագծում ներառված չի եղել։

Նման փոփոխությունները խնդրի առջև են կանգնեցրել բոլոր շինարարներին։ Կոմիտաս փողոցում շինարարներն են քանդման աշխատանքների ժամանակ կամուրջ են հայտնաբերում, որը  պատվիրատուի գծագրերում չի եղել և նույն կերպ էլ նախագիծն է կազմվել: Թե ինչ  կա գետնի տակ կամ ինչ վիճակում է քաղաքի ստորգետնյա տնտեսությունը, պատվիրատուի կամ նախագծողի փոխարեն բացահայտում են շինարարները: «Սիսիան» շինընկերությունը Տիգրան Մեծ փողոցում աշխատանքները դադարեցրել է:

Խնդիրների մասին նրանք SHANTNEWS.AM-ի հետ չխոսեցին՝ սպասում են, թե  մարզպետարան ուղարկած իրենց դիմումին ինչ ընթացք կտան:

Վերահսկողության աշխատանքային խմբի ղեկավար, Գյումրիի մարզպետի տեղակալ Արա Մելիքջանյանն ընդգծում է՝ այդ խնդիրներն առաջ են եկել պատվիրատուի մեղքով: «Ճաննախագիծ» ընկերությանը, հետո էլ շինարարներին տրվել են թերություններով կազմված նախագծեր։

«Երբ նախագծողի հետ խոսում ենք, ասում է՝ ես որևէ խնդիր չունեմ, ինձ ասել են՝ այս եղանակով նախագծումն արա, ես այդ նախագծումն արել եմ»,- պարզաբանեց ստեղծված իրավիճակը Արա Մելիքջանյանը։

Այժմ վերանախագծում է ընթանում:  Շինընկերությունները դրան են սպասում, այդ պատճառով կենտրոնական փողոցները քանդված վիճակում են մնացել: Մանր-մունր աշխատանքներով չեն կարող փողոցաշինական աշխատանքները ժամկետներում հասցնել: 210 օր աշխատանքների ավարտի վերջնաժամկետը բոլորին էր վերաբերում, բայց բոլորի համար իրավիճակը մեկն է՝ ժամկետները խախտվել են՝ ի վնաս ծրագրի: