Մարդիկ ինձ շատ լավ են վերաբերվում, և չեմ կարող ասել, որ այստեղ թուրքերին ատում են. Ումութ Օզմեն

Հուլիսի 24-ին հայ-թուրքական սահմանը հատած և կալանավորված 16-ամյա Ումութ Օզմենն արդեն ազատության մեջ է: Նա այսօր շրջել է Երևանում, շփվել մարդկանց հետ, լուսանկարվել: Ավելի վաղ հայտնել էինք, որ հայ-թուրքական սահմանը հատած 16-ամյա տղայի գործը կարճվել է: Ինչպես հայտնի է, 16-ամյա թուրք տղային տուն տանելու համար սեպտեմբերի 24-ին Հայաստան է ժամանել տղայի  հայրը:

SHANTNEWS.am-ի նկարահանող խումբն այսօր զրուցել է թե՛ Ումութի, թե՛ նրա հոր՝ Մուսթաֆա Օզմենի հետ: Նրանք այսօր երեկոյան արդեն իրենց երկրում կլինեն:

Մեզ հետ զրույցում Մուստաֆա Օզմանն ասաց, որ իր մտքով երբեք չէր անցնի, որ իր տղան կարող է սահմանը հատել:

«Այդ օրը մեծ մայրս զանգեց և ասաց, որ Ումութ Ալին չկա, փնտրել եմ ամենուր և չեմ գտել, մտահոգված էր: Կարծեցի՝ ինչ-որ տեղ է գնացել, որտեղից զանգելու հնարավորություն չունի: Հետո մտածեցի, որ ինչ-որ մի կենդանի, օրինակ՝ օձ է խայթել:

Հետո գնացինք սահմանային հատված, որտեղ մեր բանակը տեսախցիկներ է դրել, այդտեղ ճշտեցին, որ տղաս հատել է սահմանագիծը, այդ ժամանակ, անկեղծ եմ ասում, ուրախ էինք, քանի որ իմացանք, որ ողջ է: Հետո գնացել ենք նահանգապետարան, նրանք կապ հաստատեցին պետական մարմինների հետ, նրանք էլ Հայաստանի հետ և իմացանք, որ մեր տղան լավ է»,- պատմում է տղայի հայրը:

 

Ումութ Օզմենն էլ նշեց, որ ինքը լսել է, որ հայերն ու թուրքերն իրար հետ են ապրել Կարսում:

«Առաջին 15 օրն էր շատ դժվար ինձ համար: Հետո ինձ այստեղ ամենևին վատ չեմ զգացել, ինձ լավ են վերաբերվել: Երբ բռնվեցի, այդ պահին ասում էի՝ երանի չլիներ այդ պահը, բայց հիմա ասում եմ՝ լավ է, որ Երևանը տեսա, մարդկանց հետ ծանոթացա: Ինձ համար Երևանը հրաշալի քաղաք է, մարդիկ շատ լավ են վերաբերվում, և չեմ կարող ասել, որ այստեղ թուրքերին ատում են: Ես սիրահարված եմ Երևանին»,- ասում է Ումութը:

Հիշեցնենք, որ ավելի վաղ ՄԱԿ-ի փախստականների հարցերով գերագույն հանձնակատարի հայաստանյան ներկայացուցչության խնդրանքով Մարդու իրավունքների պաշտպանի ներկայացուցիչն այցելել էր «Աբովյան» ՔԿՀ-ում պահվող, հուլիսի 24-ին հայ-թուրքական սահմանը հատած Թուրքիայի Հանրապետության Կարսի մարզի բնակիչ, 16-ամյա Ումութ Ալի Օզմենին։