Նախկին իշխանությունների նկատմամբ ատելությունը տարածվեց նաև ՀՅԴ-ի ու ԲՀԿ-ի վրա. Ալիկ Սարգսյան

ՀՀ նախկին ոստիկանապետ, ՀՀԿ խմբակցության անդամ Ալիկ Սարգսյանը սեպտեմբերի 26-ին լրագրողների հետ զրույցում, անդրադառնալով խորհրդարանը ցրելու վերաբերյալ ՀՀ վարչապետ Նիկոլ Փաշինյանի հայտարարությանը, նշեց.

«Ես, ամեն դեպքում, այս խմբակցության անդամ եմ: Մի քիչ ռեալ գնահատեք: Իսկ ի՞նչ կարծիքի եք, ես հիմա պիտի առաջինը գոռայի, ասեի` շուտ ԱԺ-ն լուծարեք: Ուզում եք իմանաք` էդ ինձ համար տաք է, թե սառը: Որ ուզում եք իմանալ, ինձ համար միևնույն է. ես հաճույքով կապրեմ իմ սովորական մարդկային, քաղաքացիական կյանքով, ինձ էս ԱԺ շենքն առանձնապես ոչ մի բան չի տալիս, չարչարանքից բացի։ Էսօրվա օրով ստեղ եմ, կարող էի մի տեղ հանգիստ իմ ժամանակը անցկացնել: Դա խնդիր չէ, բայց մի շտապեք, դրա մեջ էլ վտանգներ կան: Ես չեմ ուզում, որ սա տարերային բնույթ կրի և արվի ինչ-որ մեթոդներով, որ մեր երկիրը տանի ցնցումների: Որպես հայ մարդ` ես դա իրավունք ունե՞մ զգալ ու չուզել»:

Անդրադառնալով խնդրի լուծման նախընտրելի տարբերակին` Սարգսյանը նշեց, որ կցանկանար` բանակցությունների շնորհիվ այս հարցը լուծվի, ու երկիրն իր բնական հունով գնա, իսկ թե հետո ինչպիսի խորհրդարան կունենանք, սա, Սարգսյանի խոսքերով, իր քննարկելու թեման չէ:

«Ես չեմ քննարկում, Աստված ձեզ հետ, հետո այդ մասին կխոսենք առանձին, էս անգամ` ինչ-որ այգում, սուրճ խմելիս: Մենք Երևան քաղաքի ընտրություններում տեսանք, որ ժողովուրդը գնաց այն ուժի հետևից, որին հավատում է, այսինքն` նախկին իշխանությունների նկատմամբ ատելությունը հավասարաչափ տարածվեց նույն Դաշնակցության և «Բարգավաճ Հայաստան» կուսակցության վրա, այսինքն` բոլոր այն կուսակցությունները, որ ժամանակին եղել են ՀՀԿ-ի կողքին, թիմ են կազմել, արժանացան այդ վերաբերմունքին: Դրանից պետք է հետևություններ անել»,- ասաց նա:

Սարգսյանի խոսքերով` եթե իշխող կառավարության աշխատանքում թերություններ կան, որից որևէ մեկն ապահովագրված չէ, ապա վատ չի լինի, որ այդ մասին հնչի ԱԺ ամբիոնից: Ինքը` նախկին ոստիկանապետը, իր հերթին նշեց, որ իշխանությունների ուղուն, մեր երկրի նորմալ զարգացմանը վնասող որևէ քայլ չի անելու, և եթե նույնիսկ ՀՀԿ-ն այդպիսի բան անի, որին չի էլ հավատում, ապա վստահաբար կարող է պնդել` ինքն այդ ցուցակում չկա:

Հարցին` հնարավո՞ր է քաղաքականությունից դուրս գա, նա պատասխանեց.

«Շատ հնարավոր է, ձգտում եմ քաղաքականությունից դուրս գալ, սպասում եմ դրան օր առաջ»: