Գործարկվել է ընդունելության fs.emis.am էլեկտրոնային համակարգը՝ օտարերկրյա և սփյուռքահայ դիմորդների համար

ՀՀ բարձրագույն և հետբուհական մասնագիտական կրթական ծրագրեր իրականացնող ուսումնական հաստատություններում 2025-2026 ուսումնական տարվանից օտարերկրյա դիմորդների ընդունելությունը կատարվում է էլեկտրոնային եղանակով՝ fs.emis.am համակարգի միջոցով:

Էլեկտրոնային հարթակի միջոցով փաստաթղթերի հայտագրման գործընթացը մանրամասն ներկայացված է դիմորդի համար նախատեսված ուղեցույցում: Ըստ այդմ՝ նախևառաջ պետք է գրանցվել համակարգում. գրանցման ակտիվացումից հետո հնարավորություն կտրվի կատարել հետագա հաջորդական քայլերը.

• Մուտք գործել fs.emis.am կայք, սեղմել «Մուտք» կոճակը: Կբացվի պատուհան՝ համակարգ մուտք գործելու կամ գրանցվելու համար։ Սեղմել «Գրանցում» կոճակը, մուտքագրել էլեկտրոնային փոստի հասցե, գաղտնաբառ, այնուհետև կրկնել արդեն իսկ մուտքագրած գաղտնաբառը (բոլոր դաշտերը ենթակա են պարտադիր լրացման)։
• Տվյալները մուտքագրելուց հետո էկրանին կհայտնվի հաղորդագրություն՝ «Հաշիվը ակտիվացված է»:
• Ձեր կողմից նշված էլեկտրոնային փոստին կուղարկվի նամակ Կրթական տեխնոլոգիաների ազգային կենտրոնի կողմից. եթե մուտքային նամակներում այն չգտնեք, ստուգեք նաև «Սպամ» բաժինը։
• Սեղմել «Ակտիվացնել» կոճակը և մուտք գործեք ընդունելության համակարգի կայք։ Էկրանին կերևա հաղորդագրություն այն մասին, որ Ձեր հաշիվն ակտիվացված է, հետևաբար գրանցումն ավարտված է։
• Օգտահաշիվ մուտք գործելու համար կայքի գլխավոր էջում անհրաժեշտ է սեղմել «Մուտք» կոճակը, այնուհետև նորից «Մուտք» դաշտը՝ մուտքագրելով այն տվյալները, որոնցով գրանցվել եք համակարգում:
• Օգտահաշվի միջոցով հետագայում կարող եք հայտ ներկայացնել որևէ ուսումնական հաստատություն, հետևել դրա ընթացքին, իրականացնել այդ հայտի հետ կապված մի շարք գործողություններ՝ ըստ անհրաժեշտության փոխելով ընտրված բուհը, մասնագիտությունը, գաղտնաբառը և այլն։
• Ընդունելության համար նախատեսված տվյալները լրացնելուց հետո անհրաժեշտ է մուտքագրել պարտադիր համարվող բոլոր տվյալները, կցել պահանջվող փաստաթղթերը՝ ամեն դաշտից հետո պարտադիր սեղմելով «Պահպանել» կոճակը։ Լրացված հայտը պահպանվում է դիմորդի անձնական էջի «Հայտեր» բաժնում: Դիմորդը կարող է հայտը չեղարկել կամ խմբագրել:

fs.emis.am Էլեկտրոնային հարթակում ներկայացված են բուհերը և կրթական ծրագրերը, մասնագիտությունների ցանկը, կրթական աստիճանները:

Համակարգից օգտվելու քայլերն առավել մանրամասն դիմորդի ուղեցույցում՝

• Ինչպե՞ս գրանցվել օտարերկրյա դիմորդների ընդունելության համակարգում
• Ինչպե՞ս կատարել ընտրությունը՝ ըստ մասնագիտության
• Ինչպե՞ս ընտրել և դիմել բուհ
• Ինչպես փոխել գաղտնաբառը կամ էլեկտրոնային փոստի հասցեն
• Ինչպե՞ս վերականգնել գաղտնաբառը
• Ինչպե՞ս չեղարկել կամ խմբագրել հայտը

Դիմելու ժամկետներ

• Անվճար առկա ուսուցմամբ բակալավրի կրթական ծրագրով (հայագիտական, մանկավարժական և արվեստի բնագավառի մասնագիտություններ) սփյուռքահայ դիմորդների ընդունելության համար՝ մինչև 2025 թ. օգոստոսի 22-ը ներառյալ,
• Վճարովի առկա ուսուցմամբ բակալավրի ու անընդհատ և ինտեգրացված կրթական ծրագրերով, այդ թվում՝ նախապատրաստական դասընթացում ընդունելության համար՝ մինչև 2025 թ. սեպտեմբերի 30-ը ներառյալ,
• Վճարովի առկա ուսուցմամբ մագիստրոսի կրթական ծրագրով, այդ թվում՝ նախապատրաստական դասընթացում ընդունելության համար՝ մինչև հոկտեմբերի 10-ը ներառյալ,
• Վճարովի հեռակա ուսուցմամբ բակալավրի և մագիստրոսի կրթական ծրագրերով ընդունելության համար՝ մինչև մինչև հոկտեմբերի 16-ը ներառյալ,
• Վճարովի հետբուհական՝ ասպիրանտի կրթական ծրագրով ընդունելության համար՝ մինչև 2025 թ. նոյեմբերի 14-ը ներառյալ:

Դիմորդները ներկայացնում են հետևյալ փաստաթղթերը՝

• անձնագրի պատճենը,
• սփյուռքահայ դիմորդների համար` ծննդյան վկայականի պատճենը` նոտարով վավերացված կամ մկրտության վկայականի պատճենը,
• կրթական աստիճանի վերաբերյալ ավարտական փաստաթղթի պատճենը (գնահատականներով)` թարգմանված և նոտարական, իսկ առանձին երկրների դեպքում` նաև միջազգային վավերացմամբ (ապոստիլ),
• բժշկական տեղեկանք` ընդհանուր առողջական վիճակի մասին (սույն տեղեկանքը կարող է տրված լինել նաև Հայաստանի Հանրապետության բժշկական կազմակերպությունների կողմից),
• միասնական քննությունների վկայագիր,
• 3×4 չափսի 4 լուսանկար,
• ինքնակենսագրություն (CV)` հայերենով, ռուսերենով կամ անգլերենով,
• հետբուհական մասնագիտական կրթություն ստանալու համար՝ ընտրած մասնագիտության թեմայով գիտական ռեֆերատ` 20 էջի սահմաններում, հայերենով, ռուսերենով կամ անգլերենով:

Լրացուցիչ տեղեկությունների համար դիմել ՀՀ ԿԳՄՍ նախարարություն.

• սփյուռքի հետ կապերի բաժին (հեռ. +374 10-599-647)
• արտաքին կապերի բաժին (հեռ. +374 10-599-646)
• Կրթական տեխնոլոգիաների ազգային կենտրոն (հեռ. +374 10-578455)
• էլ. փոստ՝ [email protected]