Դատավորի թեկնածուների ներկայացման որոշումը կկայացվի ոչ թե գաղտնի, այլ բաց

ՀՀ կառավարությունը սեպտեմբերի 27-ի նիստում հավանություն տվեց «Հայաստանի Հանրապետության դատական օրենսգրքում» լրացումներ և փոփոխություններ կատարելու մասին» սահմանադրական օրենքի և «Պետական տուրքի մասին» օրենքում լրացում կատարելու մասին» նախագծերին:

Նախագիծը ներկայացնելով՝ ՀՀ արդարադատության նախարարի տեղակալ Արթուր Հովհաննիսյանը նշեց, որ Դատական օրենսգիրքը հստակ ընթացակարգեր է սահմանում, թե ինչպես են դատավորի թեկնածուներն առաջադրվում հանրապետության նախագահի նշանակմանը:

«Օրենսգիրքը հստակ հերթականություն է նախատեսում, թե ում պետք է առաջադրեն հանրապետության նախագահին: Եթե, օրինակ, ռեզերվում կա նախկին դատավոր, առաջնահերթը նրան պետք է առաջարկեն, հետո նոր դպրոցն ավարտած դատավորներին: Այս օրենսգիրքը հստակ սահմանում է հերթականությունը, սակայն Դատական օրենսգիրքը նաև նախատեսում է, որ դա ԲԴԽ որոշմամբ է կատարվում, այն էլ` գաղտնի քվեարկությամբ: Լինում են դեպքեր, երբ գաղտնի քվեարկությամբ օրենքով նախատեսված հերթականությամբ անձն ուղղակի չի առաջադրվում հանրապետության նախագահի նշանակմանը, դրա համար մենք առաջարկում ենք, որ նման դեպքերում որոշումը կայացվի ոչ թե գաղտնի, այլ բաց: ԲԴԽ անդամները կարող են դեմ քվեարկել միայն այն հիմքով, երբ դա հակասում է օրենսգրքով նախատեսված հերթականությանը: Այսինքն` մենք հստակեցնում ենք, թե երբ կարող է անձը չառաջադրվել հանրապետության նախագահի նշանակմանը», – ասաց նա:

Բացի դրանից՝ ըստ փոխնախարարի, Դատական օրենսգիրքը սահմանում է, որ Վճռաբեկ դատարանի և Վերաքննիչ դատարանի դատավորի նշանակման համար առաջխաղացման ենթակա դատավորների թեկնածուների ցուցակի համալրման, նախկին դատավորների կողմից դատավորների թեկնածուների ցուցակում ընդգրկվելու նպատակով ներկայացված դիմումների ուսումնասիրման համար անձը պետք է ներկայացնի նաև սահմանված չափով պետական տուրքի վճարման անդորրագիրը, մինչդեռ պետական տուրքի օրենքով այս տեսակի դրույթներ նախատեսված չեն, այժմ նախատեսվում է նման դրույթ` վճարման չափը սահմանելով 20 հազար դրամ:

ՀՀ տնտեսական զարգացման և ներդրումների նախարար Արծվիկ Մինասյանը հետաքրքրվեց` ինչո՞վ է հիմնավորվում փակ քվեարկությունը բաց դարձնելու փոփոխությունը: Հովհաննիսյանը նշեց.

«Քանի որ մինչև քվեարկությունը քննարկվում է հարցը` արդյո՞ք անձը համապատասխանում է Դատական օրենսգրքով նախատեսված այդ հերթականությանը, նրա հե՞րթն է, որ առաջադրվի, այս քննարկման արդյունքում, երբ քվեարկություն է կատարվում, եթե կոնկրետ դեմ քվեարկողներ կան, հստակ իրենց դիրքորոշումը պիտի հայտնեն, թե ինչու են դեմ: Հակառակ պարագայում, երբ գաղտնի ենք դնում, պարզ չէ` որ դատավորն ինչ մտահոգություն ունի, հարցը մտնում է փակուղի, անհասկանալի է մնում, թե ինչու, ինչ հերթականության խախտման մասին է խոսքը, որ ԲԴԽ-ն ձայների մեծամասնությամբ դեմ է քվեարկում»: