Լինելու ենք այսօրվա իշխանության առանցքային ու հիմնական գաղափարական ընդդիմախոսը. Խաչատուր Քոքոբելյան

«Մենք հայտարարել ենք, որ «Ազատ Դեմոկրատները» մասնակցելու են ընտրություններին: Մենք նույնիսկ մինչև ընտրությունների օրը որոշելը և ԱԺ-ի արձակումը, հայտարարել ենք, որ անհրաժեշտ են ԱԺ նոր ընտրություններ»,- ասել է «Ազատ Դեմոկրատներ» կուսակցության  նախագահ Խաչատուր Քոքոբելյանը:

Խոսելով ընտրություններին մասնակցելու ձևաչափից՝ Քոքոբելյանը նշեց, որ գաղտնիք չէ, որ այս պահին ընթանում են բանակցային գործընթացներ գրեթե բոլոր քաղաքական ուժերի հետ, որոնք գտնվում են իրենց գաղափարական դաշտում.

«Անհատականություններ կան քաղաքական դաշտում, որոնք ներկայացված չեն որևէ քաղաքական ուժում, բայց իրենք ոչ պակաս դերակատարներ են ու, ընդհանրապես, ազատականները միշտ չէ, որ կուսակցականացված են լինում»,- շեշտեց Խաչատուր Քոքոբելյանը՝ հավելելով, որ ամեն ինչ հաշվի առնելով իրենք չեն ուշացնի.

«Կարծում եմ, առնվազն վաղը մենք արդեն կազդարարենք, թե ինչ ձևաչափով ենք մասնակցում: Այս պահին՝ բանակցային գործընթացների որոշ դետալներից ելնելով ՝ կոռեկտ չեմ համարում խոսել վերջնական ձևաչափի մասին: Միայն կարող եմ ասել, որ շատ արդյունավետ բանակցություններ են ընթանում և վստահաբար կարող եմ ասել, որ արդյունքում մենք մեր քաղաքացիներին կներկայացնենք մի այնպիսի թիմ, որտեղ կլինեն ազատական դաշտի մարդիկ, որոնք բացառապես գաղափարական դաշտում են հանդես եկել և հասարակությունը ճանաչում է նրանց»,- ասել է «Ազատ Դեմոկրատներ» կուսակցության նախագահը:

Խաչատուր Քոքոբելյանը չցանկացավ անուններ տալ, թե ում հետ են կոնկրետ բանակցում, բայց նշեց, որ «Հանրապետություն» կուսակցության հետ բանակցությունները շատ արդյունավետ են ընթանում:

«Ձայնահավաքության չենք գնում, մենք գնում ենք քվեներ վաստակելու: Քանի որ զուտ ձայնահավաքությամբ զբաղվողները, որպես կանոն, քաղաքական գործընթացներից պետք է դուրս մնան: Այդ առումով մենք գաղափարական մոտեցումները շատ կարևոր ենք համարում: Հստակ կարող եմ ասել, որ ՀՀ քաղաքացին չի տեսնի մեզ մոտ մի մարդ, որը կառաջացնի զարմանք, որ մեր գաղափարական դաշտից դուրս կլինի»,- ասել է Խաչատուր Քոքոբելյանը:

«Ազատ Դեմոկրատներ»-ի նախագահը նաև նշեց, որ զարմանում է, երբ տեսնում է, թե ինչպես են մյուս քաղաքական ուժերը հերթով հայտարարում, որ ԱԺ-ում լինելու են երկրորդ ուժը.

«Խորհուրդ եմ տալիս այդ ուժերին շուտ-շուտ ասեն, արագ-արագ, որ չմոռանան: Թե ով է լինելու ԱԺ-ում երկրորդ ուժը, թող մեր քաղաքացին որոշի: Ես կարող եմ հստակ ասել, որ մենք լինելու ենք այսօրվա իշխանության առանցքային ու հիմնական գաղափարական ընդդիմախոսը»,- նշել է Խաչատուր Քոքոբելյանը:

Մանրամասները՝ տեսանյութում: