Բուհական համակարգում ակնկալվող փոփոխությունները ժամանակ են պահանջում. Արայիկ Հարությունյան

Հիմա մենք շատ լավ հիմքեր ենք դրել, որպեսզի առաջիկայում հանրակրթության ոլորտում փոփոխություններ կարողանանք տեսնել: Այս մասին «Շանթ» հեռուստաընկերության եթերում հեռարձակվող «Հեռանկար» վերլուծական ծրագրի ընթացքում հայտարարել է ՀՀ ԿԳ նախարարի պաշտոնակատար Արայիկ Հարությունյանը:

«Փոփոխություններն արդեն իսկ տեսանելի են որոշ առումներով՝ կոռուպցիայի առումով, նույն ապաքաղաքականացման առումով, ծրագրերի փոփոխության առումով, վերապատրաստումների առումով: Այնպես որ, բոլոր ուղղություններով աշխատանք տարվում է»,- հայտարարել է նա:

ԿԳ նախարարի պաշտոնակատարն անդրադարձել է նաև ԵՊՀ-ին վերաբերող որոշ հարցերին՝ մասնավորապես նրան, որ Մայր բուհում շատ բան չի փոխվել, ու տեղի չի ունեցել նաև ռեկտորի փոփոխություն՝  նշելով, որ որոշ փոփոխություններ, այդուհանդերձ, եղել են:

«Այո՜, ռեկտորը չի փոխվել, բայց ամեն ինչ ժամանակի խնդիր է, և բարդ համակարգերի ժամանակ լինում են բարդ որոշումներ, ընդ որում՝ մի քիչ էլ ժամանակ են պահանջում»,- ասել է Հարությունյանը:

Իր խոսքերով՝ հիմա յուրաքանչյուր դասախոս կարող է իր բողոքները ներկայացնել, ինչը նախկինում չէր կարող անել, որովհետև սպառնալիք կար, որ իրեն կազատեն, ուսանողներն էլ ազատ պայքարում են իրենց իրավունքների պահպանման համար:

«Իհարկե, կան որոշ բացասական դրսևորումներ: Այսօր ես մի քանի հարյուր, թե հազար ստորագրություն պետք է ստանամ, այդպիսի տեղեկություն եմ ստացել, իբրև, ի աջակցույթուն գործող ուսանողական խորհրդի, բայց ունեմ նաև տեղեկություններ, որ այդ ստորագրողների մի մասը, գոնե, տեղյակ չի եղել՝ ինչի համար է ստորագրում: Սա էլ կշտկենք, ժամանակի խնդիր է»,- ասել է նա:

Հարցին, թե արդյո՞ք ներկայիս ուսանողական խորհուրը դեռևս հին գաղափարներով է գործում՝ Արայիկ Հարությունյանը դրական պատասխան է տվել՝ հավելելով, որ իրենք չեն ցանկանում միջամտել ներհամալսարանական գործերին:

«Մենք օրենսդրական առումով և կարգավորումների առումով կարող ենք միջամտել: Եթե նայենք բուհական ինքնավարության և ուսանողական խորհուրդների տեսանկյունից ՝ ուսանողներն իրենք պետք է որոշեն, թե ինչպիսի ուսանողական խորհուրդ են ուզում ունենալ: Օրինակ՝ Բրյուսովի անվան լեզվագիտական համալսարանի ուսանողները հավաքվեցին, մեծամասնությամբ համաժողով անցկացրին և ուսանողական խորհուրդ ընտրեցին»,- ասել է նա:

Նա նկատել է, որ, այդուհանդերձ, ուսանողական խորհուրդներն ուսանողների համար միջոց են՝ հասկանալու իրենց պարտականություններն ու պաշտպանելու իրենց իրավունքները: