Հայաստանը 2050թ. կարող է 5 միլիոն բնակչություն ունենալ. Հակոբ Արշակյան

ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը նոյեմբերի 24-ին հրավիրած ասուլիսում, ամփոփելով նախարարության վերջին վեց ամիսների գործունեությունը, ևս մեկ անգամ հայտարարել է` իր կողմից բազմաթիվ անգամ հնչեցված կարգախոսը, որ Հայաստանի բնակչությունը պետք է 2050 թվականին լինի 5 միլիոն, ամենևին անիրատեսական ծրագիր չէ, ու նախարարությունը այդ ուղղությամբ լուրջ վերլուծություն է անցկացրել:

Նախարարի պաշտոնակատարն օրինակ է բերել 1960-90 ական թվականներին Հայաստանում գրանցված բնակչության աճի ցուցանիշները: Ըստ նրա` դա չի եղել բնական աճի շնորհիվ , այլ եկել է ներգաղթի արդյունքում: Նախարարությունը վերլուծել է, թե ինչու են այն թվականներին մարդիկ եկել Հայաստան, ու պարզել, որ Հայաստանն այդ տարիներին եղել է բարձր տեխնոլոգիական զարգացման ու ինդուստրիալ ապագա ունեցող երկիր, տասնյակ գիտահետազոտական ինստիտուտներով, ինչի արդյունքում եղել է բավական գրավիչ երկիր, ու շատ տաղանդավոր մարդիկ Հայաստան են տեղափոխվել, քանի որ այստեղ ունեցել են բարձր վճարվող ու գնահատվող աշխատանք:

Հակոբ Արշակյանի համոզմամբ, եթե Հայաստանում օբեկտիվ պատճառներով այդ զարգացումը չընդհատվեր, ապա այսօր Հայաստանի բնակչությունը կլիներ Սինգապուրի բնակչության չափ՝ մոտավորապես 5 միլիոն:

«Մենք անընդհատ խոսում ենք տաղանդի մասին և ասում, թե ինչպես պետք է տաղանդի արտահոսքը կանխել, որովհետև շատ կարծիքներ կան, թե ինչու են մարդիկ այստեղից գնում: Ես կարող եմ ասել, որ տաղանդը գնում է այնտեղ, որտեղ կա ապագայի տեխնոլոգիա, որտեղ կա ինովացիա, որտեղ կա գիտահետազոտություն»,- նշել է նախարարի պաշտոնակատարը` ավելացնելով, որ իրենց խնդիրն է` այնպես անել, որ մանավանդ երիտասարդ գիտնականը, մասնագետը կամ ինժեները ավարտելուց հետո չգնան երկրից ու առավել գրավիչ աշխատանք չփնտրեն դրսում:

Նախարարության բանաձևը հետևյալն է՝

1. Երկրի տարածքում ունենալ միջազգային շատ ընկերություններ,

2. Ստեղծել միջավայր, որտեղ երիտասարդ մասնագետը կկարողանա ստեղծել իր` այսպես կոչված «ստարտափ» ընկերությունը,

3. էականորեն բարձրացնել գիտության ու կրթության որակը:

Նախարարի պաշտոնակատարի պնդմամբ` առաջին քայլերից մեկը պետք է լինի այն, որ բուհերը կարողանան ինքնուրույն ձևավորել ստարտափ ընկերություններ, որպեսզի ուսանողը ոչ թե աշխատանք փնտրի դրսում, այլ հետաքրքրություն ունենա բուհի ներսում, ինչպես նաև պետք է ձևավորել նպաստավոր ներդրումային միջավայր միջազգային հեղինակավոր ընկերությունների համար:

Այս խնդիրները հաշվի առնելով` նախարարի պաշտոնակատարը հայտարարել է, որ Հայաստանի կառավարությունն իր առջև նպատակ է դրել զարգացնել արհեստական բանականության, կիբերանվտանգության ու կիսահաղորդիչների բարձր տեխնոլոգիական ուղղությունները, որոնց կիրառման ոլորտներն են ռազմական արդյունաբերությունը, մեքենաշինությունը, ռոբոտաշինությունն ու 5G կապի տեխնոլոգիաներն ու առողջապահությունը:

«Մենք ունենք նպատակ` դառնալ առաջատարը այս ուղղություններով և նշված կիրառություններով»,- հայտարարել է Արշակյանը` ավելացնելով, որ վերջին վեց ամիսների ընթացքում իրենք նպաստել են, որ Հայաստան գան երկու նոր ընկերություններ, որոնք ընդհանուր առմամբ մտադիր են Հայաստանում մոտ 30 միլիոն դոլարի ներդրում անել:

Հակոբ Արշակյանի համոզմամբ` եթե այս տեմպերով շարունակեն, ապա մինչև 2050 թվականը Հայաստանի բնակչությունը կհասնի 5 միլիոնի, քանի որ Հայաստանում կստեղծվի նպաստավոր դաշտ` մեծ ներգաղթ ապահովելու համար:

Մանրամասները` տեսանյութում: