Վրաստանում վերջին անգամ ուղիղ նախագահական ընտրություն է. կրքերը թեժանում են

Հոկտեմբերի 28-ին Վրաստանը ուղիղ ձևով վերջին անգամ պետք է ընտրի թվով 5-րդ նախագահին: Մրցապայքարի մեջ են Սաակաշվիլիի իշխանության տարբեր տարիների արտգործնախարարներ՝ իշխող «Վրացական երազանք-դեմոկրատական Վրաստան» կուսակցության աջակցությունը ստացած անկախ թեկնածու Սալոմե Զուրաբիշվիլին և «Ուժը միասնության մեջ է» միասնական ընդդիմության թեկնածու, «Միացյալ ազգային շարժման» անդամ Գրիգոլ Վաշաձեն: Քվեարկությունը կկայանա նաև 39 երկրներում: Երեկ իրենց ընտրությունն արդեն կատարել են  արտերկրում խաղաղապահ առաքելություն իրականացնող  վրացի զինծառայողները:

Վաղն արդեն պարզ կդառնա, թե ինչ ընտրություն կանի Վրաստանի հասարակությունը՝ սպառնալիքների, ճնշման, կաշառքի,  փոխադարձ մեղադրանքների, սենսացիոն բացահայտումների ֆոնին ընթացող նախընտրական փուլից հետո: Սառը ցնցուղի ազդեցություն թողեց համացանցում երկրորդ փուլի նախընտրական շրջանում «անսպասելի» հրապարակված տեսահոլովակը, որտեղ Սաակաշվիլին դեռևս իր իշխանության տարիներին՝ 2008թ․ վրաց-ռուսական պատերազմի հանգամանքները քննող հանձնաժողովի նիստին հայտարարել էր.

«Այո, Հարավային Օսիայի ուղղությամբ ռազմական գործողություններ սկսելու որոշումը Վրաստանն է կայացրել: Սա ծանր որոշում էր, որը, սակայն, կընդուներ ժողովրդի ու երկրի առջև պատասխանատվություն կրող ցանկացած ժողովրդավար պետություն»:

Փաստ, որի մասին Վրաստանում տեղյակ էին բոլորը, բայց պատերազմից շատ չանցած, համարձակություն էր ունեցել խոստովանել արդեն նախկին ԱԳՆ Սալոմե Զուրաբիշվիլին:

Նախընտրական երկրորդ փուլն աչքի ընկավ նոր բացահայտումներով, կաշառք տալու փոխադարձ մեղադրանքներով, քաղաքական ախոյանների նկատմամբ կոմպրոմատներով, ֆիզիկական հաշվեհարդարներով, Զուրաբիշվիլիի և նրա երեխաների հասցեին ուղղված սպառնալիքներով, երբ վերջինիս որդին ստիպված ժամանեց Վրաստան՝ մոր կողքին լինելու համար:

Յուրահատուկ էր Իվանիշվիլիի՝ 2 հազար վարկատուի բանկային վարկերը՝ մինչև 2 հազար լարի, իր՝ Քարթու բանկով մարելու ժեստը, որն անմիջապես գնահատվեց որպես ընտրակաշառք: Ընդդիմությունը պարզաբանեց, որ ժողովրդին Իվանիշվիլիի «լավությունը» սովորական բանկային գործընթաց է, երբ ռուտինական կոչվող վարկերը բանկերը տարեվերջին դուրս են գրում՝ մարում են վարկատուի հաշվից:

Հեռուստաեթերը ողողվեց երկկողմ «մեղադրանքներով և բացահայտումներով», իշխանությունները մի ամբողջ սյուժե նվիրեցին՝ ապացուցելու Սաակաշվիլիի երբեմնի կապը Վրաստանի չեչեն ահաբեկիչ Ահմեդ Չատաևի հետ, որը Թբիլիսիում 2017թ․  ահաբեկչություն էր ծրագրել և ուժայիննների հատուկ գործողություների հետևանքով սպանվել Թբիլիսիում վարձած տանը:

«Դժոխքին մեկ սատանա էր պակասում, այն էլ ավելացավ», այս մասին երեկ «Շաբաթվա պոլիտրա» ամենօրյա վերլուծական հաղորդման ժամանակ Ռուսթավի 2 ՀԸ-ի եթերից սարկազմով հայտարարեց հաղորդավարը՝ նկատի ունենալով «անջատողական» Վահագն Չախալյանի ներգրավվածությունը Ախալքալաքի քարոզարշավին:

Ի դեպ, ծրագրի համավարողն էր ՀԸ-ի տնօրեն Նիկա Գվարամիան: Նույն հաղորդման ընթացքում ընդդիմության թեկնածու Գրիգոլ Վաշաձեն, խոսելով իր ծրագրած փոփոխությունների մասին, հիշատակեց Ջավախքը. «Վրաստանում կվերջանա Հենզել Մկոյանների քրեական «իշխանությունը», որոնք իրենց հնդկաչին առաջնորդներ են զգում ու ղեկավարում տարածաշրջանը»:

Իր հերթին, վարչապետ Մամուկա Բախտաձեն վստահեցրել է, որ Վրաստանում կայանալիք նախագահական ընտրությունների երկրորդ փուլը կանցկացվի օրենքի տառին, բոլոր չափանիշներին համապատասխան: Կոչ է արել ընտրողներին լինել հնարավորինս ակտիվ: Նրա գնահատմամբ՝ նախընտրական քարոզարշավը համապատասխանել է չափանիշներին: Այդուամենայնիվ, զգուշացրել է հասարակությանը․

«Ոչ ոք չպետք է պատրանք ունենա, թե ինչ-որ մեկը կարող է դիսոնանս բերել մեր կյանք»,- ասել է նա:

Հավանաբար․ նա նկատի է ունեցել թեկնածու Վաշաձեի 7 հոգանոց ուկրաինացի քաղտեխնոլոգներից Վիտալի Շկլյարովի հայտարարությունը, թե երկրորդ փուլից հետո Վրաստանում տեղի կունենա «իսկական ժողովրդավարական փոփոխությունների հեղափոխություն»: Ուկրաինական կայքի անհայտ հեղինակի տեղադրած գաղտնագրված աուդիո նյութերից մեկում Սաակաշվիլին Գրիգոլ Վաշաձեի շտաբի պետի հետ զրույցում մի քանի անգամ կրկնում է հեղափոխություն բառը՝ խորհուրդ տալով իրենց թեկնածուի չընտրվելու դեպքում գործընթացները տեղափոխել հրապարակ:

Եվ վերջում, մի հետաքրքիր դիտարկում «Վրացինֆորմ»-ի գլխավոր  խմբագիր Առնո Խիդիրբեգիշվիլիի կողմից.

«Վրաստանի նախագահ է եղել ազգայնական Գամսախուրդիան, կոմունիստ Շևարդնաձեն, ֆաշիստ Սաակաշվիլին, խարդախ Մարգվելաշվիլին, սակայն «պոզավոր չեկիստ» դեռ չի եղել»:

Խմբագիրն ակնհայտ ակնարկում է Վաշաձեի առաջին կնոջ փախուստը սիրեցյալի հետ: