Ուզում ենք, որ մեր ներկայությունը նպաստի բանավեճի սկզբունքի պահպանմանը. Լևոն Շիրինյան

ՀՀ ԱԺ ընտրություններում «Քրիստոնեա-ժողովրդական վերածնունդ» կուսակցության առաջին համարով հանդես եկող Լևոն Շիրինյանը խոսել է քաղաքական ուժերի միջև ստեղծված նախընտրական լարված հարաբերությունների ու պայքարի բնույթի մասին՝ բնորոշելով այն որպես փոքր-ինչ արտասովոր:

«Առաջին օրը, կարծես, դուրս են գալիս (սովորական քաղաքական պրոցեսի ձևաչափից-խմբ.), բայց ես դա կապում եմ Հայաստանում ձևավորված ավանդույթի հետ: Եվ, քանի որ մենք ներկայացել ենք՝ մենք ուզում ենք, որ այդ ներկայությունը լինի նաև զսպիչ հանգամանք՝ բանավեճը, խոսույթը տեղափոխել կոնցեպցիաների մեջ, տեսական լուծումների մեջ, առաջարկների մեջ, և առաջարկների՝ կյանք իջեցնելու մեխանիզմների միջև»,- ասել է Լևոն Շիրինյանը:

Նա հայտարարել է, որ իրենք անելու են ամեն բան՝ այդ նպատակին հասնելու համար ու նաև «պարտադրելու» են մյուս ուժերին՝ հետևել բանավեճի սկզբունքներին:

«Բարձրանանք և մոռանանք վատ ավանդույթները»,- ասել է նա:

Լևոն Շիրինյանն անդրադարձել է նաև Արցախի հարցի շուրջ քաղաքական տարբեր ուժերի՝ միմյանց հասցեին հնչեցրած արտահայտություններին՝ մասնավորապես դավաճանության վերաբերյալ՝ նշելով, որ արդեն գոյություն ունեցող իրավիճակին ու մտածելակերպին հակադրվում է նոր մոտեցում, ինչն էլ հակասությունների պատճառ է դառնում:

«Կա մի սուր հարց. երկրի զարգացման կոնցեպցիայի հետ է կապված էդ բոլորը: Որովհետև յուրաքանչյուրը հասկանում է վիճակը, որ բավարար չէր Հայաստանի զարգացման այն կոնցեպցիան, լիբերալիզմի կամ ազատականության գործադրման այն չափն ու ձևը, որ գործադրվում էր: Եվ պարզ է արժեքային համակարգով, որովհետև չեք կարող լինել ազատական, և համաշխարհային լիբերալ տեսությունն անտեսել, դա հնարավոր բան չէ: Եվ դրան հակադրվում է ազգային հոսանքը, ո՛չ ազգայնական հոսանքը, առողջ տեսակետով, որ մենք պետք է մեր հարցերով զբաղվենք, և էստեղ բախումներ են առաջանում: Գուցե էդ պարագայում կարելի է դավաճանի մասին խոսել-չխոսել, բայց դավաճանությունն ինքնին դա չէ, որ կա, այլ կոնցեպցիայի մեջ է դավաճանությունը»,- պարզաբանել է նա:

Առավել կոնկրետ հարցին՝ թե արդյո՞ք մենք այժմ ունենք «Վասակ Սյունիներ», Լևոն Շիրինյանն չի բացառել, սակայն, նշել է, որ խուսափում է նման երևույթներից ու դրանց մեկնաբանումից:

«Կարող է և կան, բայց ես դրանից խուսափում եմ, որովհետև մենք այլ նպատակ ենք հետապնդում: Ինչի՞: Մենք ուզում ենք այս ընտրություններում ազգային պահպանողական հոսանքն արդի մեկնաբանությամբ: Օրինակ՝ ինչպես Հարավային Կորեան վարվեց Կիմ դե Ջունի ժամանակ՝ քաղաքականության հիմք տեղափոխել «Կոնֆուցիականությունը», նրա փիլիսոփայությունը, բարոյականությունը և ժողովրդավարությունը, այդ ընկալման շրջանակներում»,- ասել է ԱԺ պատգամավորի թեկնածուն:

Իր խոսքերով՝ իրենց կուսակցությունն, ըստ էության, քաղաքական կառույց չէ ու այդպիսին դարձել է ընտրություններին մասնակցելու համար:

«Սա շարժում է, հոգևոր վերելք է, և հայրենակերտման մարդկանց համախումբ է»,- ասել է նա: