Քարոզարշավի ավարտին` թվեր, տվյալներ ու կանխատեսումներ

Հայաստանում կայանալիք խորհրդարանական ընտրությունների քարոզչության շրջանն ավարտվեց: Վաղը լռության օր է: SHANTNEWS.am-ն ընտրություններին ընդառաջ ի մի է բերել դրանց վերաբերող որոշ տվյալներ:

ՀՀ ոստիկանության հրապարակած տվյալներով` ՀՀ ընտրողների ռեգիստրում ընդգրկված ընտրողների ընդհանուր թիվը 2 մլն 575 հազար 939 է:

Արտահերթ ընտրություններին մասնակցում է 11 քաղաքական ուժ: Քվեաթերթիկում այդ ուժերի հերթական համարներն են.

1. ՀՀԿ,
2. «Քաղաքացու որոշում» կուսակցություն,
3. ՀՅԴ,
4. «Իմ քայլը»,
5. «Լուսավոր Հայաստան» կուսակցություն,
6. «Քրիստոնեա-ժողովրդական վերածնունդ» կուսակցություն,
7. «Ազգային առաջընթաց» կուսակցություն,
8. «Մենք» դաշինք,
9. ՕԵԿ,
10. «Սասնա ծռեր»,
11. ԲՀԿ:

Վերջիններս ՀՀ կենտրոնական ընտրական հանձնաժողով են ներկայացրել հայտարարագրեր իրենց գույքի և եկամուտների մասին: SHANTNEWS.am-ն առանձնացրել է՝ ի՞նչ դրամական միջոցներ են հայտարարագրել ընտրապայքարին մասնակցող կուսակցություններն ու դաշինքները:

Կենտրոնական ընտրական հանձնաժողովը ներկայացրել է ԱԺ արտահերթ ընտրությունների քվեարկության կարգը. ընտրողին կտրամադրվի 11 քվեարկության թերթիկ և մեկ քվեարկության ծրար: Քվեարկությունից առաջ պետք է համոզվել, որ առկա են բոլոր 11 քվեաթերթիկները՝ հերթական համարները ստուգելով:

Սոցիոլոգներն ու քաղտեխնոլոգները կարծում են, որ այս ընտրությունների ֆավորիտը նախապես պարզ է, մնացած ուժերը երկրորդ և երրորդ տեղերի համար են պայքարում: Քաղտեխնոլոգ Կարեն Քոչարյանը նշում է` ընտրություններին մասնակցող նոր քաղաքական ուժերի մի մասն ընտրությունների է գնում ոչ թե խորհրդարան անցնելու, այլ կայանալու համար:

Տեղեկատվական անվտանգության փորձագետ Սամվել Մարտիրոսյանը, անդրադառնալով քարոզարշավի ընթացքում քաղաքական ուժերի կողմից Facebook սոցիալական ցանցի օգտագործմանը, ասում է.

«Ընդհանուր առմամբ, քանի որ քարոզարշավը շատ կարճ էր, փաստացի, օֆլայնային կամ ռեալ հանդիպումները բավական քիչ են եղել, որովհետև պարզապես ցայտնոտի մեջ էին որոշ կուսակցություններ, և այդպիսով շատ լուրջ բան դրված էր ցանցի վրա: Հեղափոխությունը, փաստացի, մարդկանց ներգրավեց դեպի Facebook, և մարդիկ բնականաբար պատրաստ են քարոզարշավի մաս լինել»:

Մարտիրոսյանի գնահատմամբ` այս քարոզարշավին ռեալ մարդիկ ավելի շատ էին ներգրավված, քան ֆեյքերը:

SHANTNEWS.am-ն արդեն ներկայացրել է նաև ընտրություններին մասնակցող քաղաքական ուժերի` կուսակցությունների և դաշինքների կարգախոսները և տարբերանշանները:

Քարոզարշավի ավարտին քաղտեխնոլոգներն առանձնացրել են նաև քաղաքական ուժերի թույլ տված թերացումները: Արմեն Բադալյանի գնահատմամբ` արդեն ավարտին մոտեցող քարոզարշավի ընթացքում քաղաքական ուժերի թույլ տված հիմնական կոպիտ թերություններն էին միջակությունը և վարկանիշային ընտրապայքարի բացակայությունը: Նրա կարծիքով` նման միջակ ուժերով չենք կարող ապագայում բարձր մակարդակի խորհրդարան ունենալ:

Կարեն Քոչարյանը կարծում է, որ դեկտեմբերի 9-ին կայանալիք խորհրդարանական ընտրություններին մի շարք քաղաքական ուժերի մասնակցության շնորհիվ ընտրության լայն հնարավորություն է ապահովված: Քաղտեխնոլոգը նշում է նաև, որ ընտրություններին մասնակցող ուժերի շանսերին անդրադառնալիս` սոցիոլոգիական հարցումներն առավել օբյետիվ պատկեր չեն կարողանում տալ, որովհետև հաշվի չի առնվում ռեյտինգային հատվածը:

Արտահերթ խորհրդարանական ընտրությունները տեղի կունենան դեկտեմբերի 9-ին: Քվեարկությունը կսկսվի ժ. 08:00-ին, կավարտվի 20:00-ին:

Ընտրողներն իրենց ընտրատարածքներում վարկանիշային ընտրակարգով առաջադրված թեկնածուների մասին տեղեկություններ կարող են ստանալ այստեղ: