Ինչ փոփոխություններ արվում են ՀԱՊԿ-ում, արվում են Հայաստանի կարծիքը չհարցնելով. Ռուբեն Մեհրաբյան

ՀԱՊԿ-ում կանոնադրական փոփոխությունները Հայաստանի փորձագիտական շրջանակներում ամենատարբեր գնահատականների են արժանացել: Փորձագետներն այս փոփոխությունները մտահոգիչ են համարում: SHANTNEWS.am-ի հետ զրույցում Միջազգային և անվտանգության հարցերի հայկական ինստիտուտի փորձագետ Ռուբեն Մեհրաբյանը նշեց` մտահոգիչն այստեղ այն է, որ ինչ փոփոխություններ արվում են ՀԱՊԿ-ում, արվում են Հայաստանի կարծիքը չհարցնելով:

«ՀԱՊԿ-ում ինչ տեղի է ունենում, տեղի է ունենում միայն ու բացառապես ՌԴ նախագահ Վլադիմիր Պուտինի ցանկությամբ, որին հետխորհրդային մեկ-երկու բռնապետ էլ բնականաբար ծափահարում են` կա՛մ անհատույց, կա՛մ էլ ինչ-որ հատուցման դիմաց, բայց Հայաստանը պետք է հետևի այդ ամենին, սա է ամենից մտահոգիչը: Սա, այո՛, նաև կարող է ներառել «ՀԱՊԿ գործընկերոջ» կարգավիճակ, Ադրբեջանին հրավիրել, էլ ում ասեք հրավիրել, ինչո՞ւ ոչ»,- ասաց նա:

Թեպետ տեսակետ կա, որ ՀԱՊԿ կանոնադրական փոփոխությունների հիմնական հասցեատերն Ադրբեջանն է, Մեհրաբյանը նշեց, որ առայժմ չի ուզում Ադրբեջանի հետ կապված բան ասել, որովհետև այս պահին նրա հետ կապված գործընթաց չկա, բացի այդ, դա խիստ պրոբլեմատիկ է համարում, որովհետև Ալիևի բարեկեցությունը սերտորեն, ուղղակիորեն կապված է Արևմուտքի հետ, և այս քայլը ուղղակի կարող է վտանգել Ադրբեջանի` առանց այն էլ ոչ կայուն դրությունը, որովհետև տեսնում ենք, ամենշաբաթյա պարբերականությամբ տարբեր սկանդալներ են ի հայտ գալիս նրա` կոռուպցիայի մեջ ներգրավված լինելու հետ կապված, նրա աղջիկների կողմից փողերը լվանալու հետ կապված և այլն:

Ըստ Մեհրաբյանի` Ադրբեջանի այս քայլը, բնականաբար, միանգամից բացասական արձագանք կառաջացնի Արևմուտքում, ինչը չի կարծում, որ Ադրբեջանին այս պահին ձեռնտու է` բանականության կանխավարկածից ելնելու դեպքում: Նրա խոսքերով` այստեղ հարցը ոչ թե այն է՝ Ադրբեջանը կլինի՞, թե՞ չի լինի, այլ, թե մենք այս գործընթացի հետ ինչ կապ ունենք:

«Մեր կարծիքը հաշվի չառնելով՝ կարող են ինչ ուզեն, ոնց ուզեն փոխեն, մեզ ամեն անգամ կանգնեցնեն փաստի առաջ, սա է հարցը, և որևէ մեխանիզմ չկա, որտեղ Հայաստանի կարծիքը հաշվի առնեն: Սրա վկայություններից մեկն էլ ՀԱՊԿ-ի գլխավոր քարտուղարի հետ կապված հարցն է, մենք տեսնում ենք` այսօր Հայաստանին պարզապես շանտաժի են ենթարկում»,- նշեց քաղաքագետը:

Մեհրաբյանը կարծում է, որ ՀԱՊԿ գլխավոր քարտուղարի պաշտոնին Հայաստանի համար ոչ ցանկալի թեկնածուի նշանակման դեպքում Հայաստանը, իհարկե, պետք է օգտագործի վետոյի իրավունքը, որովհետև այն ամենը, ինչ տեղի է ունենում ՀԱՊԿ-ում, ինչպես ԱԳ նախարարությունն է ձևակերպել, պարզապես «հակասում է դաշնակցային հարաբերությունների տրամաբանությանը»: Սա, ըստ քաղաքագետի, կարելի է կոչել ամեն կերպ, բացի դաշնակցային հարաբերությունից:

Փաշինյան-Պուտին կայանալիք հանդիպման մասին խոսելիս Մեհրաբյանը նշեց` քանի որ ինքն էլ միայն պաշտոնական հաղորդագրություններից է տեղեկանում, թե ինչ է կատարվում, կարող է միայն տպավորություններից խոսել: Ենթադրվում է, որ հանդիպման ընթացքում անդրադարձ է կատարվելու ՀԱՊԿ գլխավոր քարտուղարի ընտրությանն ու գազի գնին: Հարցին` կարո՞ղ է այս հարցերից որևէ մեկի դեպքում Հայաստանը զիջի՝ մյուսում ինչ-որ ձեռքբերում ունենալու համար, նա պատասխանեց.

«Ես կարծում եմ, որ այս 20 տարվա ընթացքում Հայաստանը զիջել է Ռուսաստանին այն ամենը, ինչ կարելի է, և ինչ չի կարելի, Հայաստանը պարզապես զիջելու տեղ այլևս չունի: Մնացած պայմանավորվածությունները, որոնք ձեռք կբերվեն, եթե ձեռք բերվեն, ապա այդ ամենը պետք է լինի այն հարթության վրա, որտեղ պարզ երևա, թե Հայաստանն ինչ է շահում դրանից»:

Գազի գնի հարցում որևէ զիջման չգնալու պարագայում, ըստ Մեհրաբյանի, պարզապես «Գազպրոմ»-ի հետ կնքված այդ պայմանագիրը Հայաստանը պետք է լուծարի:

«Իսկ ո՞վ է ասել, որ եթե նրանք պատրաստ չեն զիջելու, «Գազպրոմ»-ն այստեղ որպես մոնոպոլիստ պետք է մնա: Այնտեղ բազմաթիվ խնդրահարույց պայմանագրեր կան, որոնք նույնպես պետք է հետաքննվեն, պարզվի, թե ինչի հիման վրա են դրանք կնքվել: Հայաստանն այստեղ բազմաթիվ լծակներ ունի: Ի վերջո, «Գազպրոմ»-ն է Հայաստանի համար աշխատում, ոչ թե Հայաստանը «Գազպրոմ»-ի համար»,- ասաց Մեհրաբյանը:

Հարցին` հնարավո՞ր է դեպքերի նման զարգացումների պարագայում Հայաստանը մտածի ՀԱՊԿ-ին անդամակցումը դադարեցնելու մասին, քաղաքագետը նշեց, որ չի բացառում նաև այդպիսի վարկածը: