Հովիկ Աղազարյանը բանկի աշխատողին համեմատել է երշիկ վաճառողի հետ

ԱԺ-ում հարցեր են ուղղվել Ֆինանսավարկային և բյուջետային հարցերի մշտական հանձնաժողովի նախագահի ԼՀԿ թեկնածու Մանե Թանդիլյանին:

«Իմ քայլը» խմբակցության պատգամավոր Հովիկ Աղազարյանն անդրադարձել է վարկերի տոկոսների բարձր լինելուն.

«Երբ որ վարկավորվում են քաղաքացիները, բացի հիմնական տոկոսադրույքից, որը շատ պարզ է՝ 12.15 տոկոս, կան նաև զուգահեռաբար տարատեսակ տխրահռչակ վճարումներ, մասնավորապես՝ սպասարկման վարձ, տրամադրման վճար: Ի՞նչ եք կարծում՝ հնարավորություն կունենա՞ ձեր հանձնաժողովը միջամտելու այդ ոլորտին, վերացնելու նմանատիպ բացասական երևույթները, որովհետև արդյունքում տոկոսադրույքը դառնում է  շատ բարձր»,- հետաքրքրվել է Աղազարյանը:

«Այո՛, կա նոմինալ տոկոսադրույք, որը հրապարակվում է, և գիտենք, թե ինչքան է, բայց կա նաև էֆեկտիվ տոկոսադրույք, որ մեջ մտնում են տարբեր տեսակի, ձեր նշած սպասարկումները, միջնորդավճարները, և դրա արդյունքում էֆեկտիվ տոկոսադրույքն ավելի բարձր է: Բանկն ունի այս մասին քաղաքացիներին տեղեկացնելու հստակ պարտավորություն: Բանկային ոլորտն այն քիչ մրցակցային ոլորտներից է ՀՀ-ում, ես համաձայն եմ, որ բարձր է տոկոսը, բայց միևնույն ժամանակ նրանք ունեն պարտավորություն զգուշացնելու, ֆինանսական հաշտարարի համակարգ կա, որին կարելի է դիմել, եթե որևէ բան անհասկանալի է: Իհարկե, կարելի է բարելավել, և մենք ձեզ հետ միասին կքննարկենք՝ կա՞ արդյոք հնարավորություն այնպես անել, որ այդ տոկոսադրույքներն իրականում այդքան բարձր չլինեն»,- ասել է Թանդիլյանը:

«Իմ քայլը» խմբակցության պատգամավորի հաջորդ հարցը վերաբերել է բանկային ծովահենությանը: Աղազարյանն ասել է, որ դա կոնկրետ իր հետ պատահել է: Քաղաքացին գնում է բանկ, որևէ վարկ վերցնելու, ներկայացնում է իր բոլոր տվյալները, բանկը մերժում է: Քաղաքացին դուրս է գալիս բանկից, գնում է վարկային կազմակերպություն, նորից հայտը լրացնում է, վարկային կազմակերպությունը հաստատում է 500 հազար դրամանոց վարկը, ու այդ վարկը տրամադրում է այն բանկից, որտեղ քաղաքացուն մերժել են: Արդյունքում, բացի տոկոսադրույքներից, սպասարկման վարձից, տրամադրման վարձից, վերցնում են 30 տոկոս միջնորդավճար: Աղազարյանը հետաքրքրվել է, թե արդյոք Թանդիլյանը տեղյա՞կ է այս խնդիրներից և ի՞նչ պատկերացումներ ունի լուծումների մասով:

«Այդ վարկային կազմակերպությունն իր ռիսկերն ունի և, հետևաբար, հնարավոր է, որ բանկը չտրամադրի, որովհետև պատրաստ չէ այդ ռիսկերը վերցնելուն և տվյալ քաղաքացիներին սպասարկելուն, որոնք ավելի ռիսկային են: Միևնույն ժամանակ պետք է ասեմ, որ դա ամենախնդրահարույց հատվածը չէ՝ կան կազմակերպություններ, որոնք քաղաքացիներին տանում են վարկային կազմակերպություններ կամ բանկեր՝ վարկեր ստանալու: Այ սա արդեն անթույլատրելի է: Այսինքն՝ իրենք քաղաքացիների համար վարկ են վերցնում: Քաղաքացիներն ուղղակիորեն հայտնվում են թակարդում: Պետք է տարբեր մեխանիզմներ գտնել, որ մեր քաղաքացիները կարողանան ավելի պաշտպանված լինել»,- ասել է Թանդիլյանը:

Աղազարյանը նկատել է, որ, օրինակ, երբ բուժծառայության համար մարդուն գումար է անհրաժեշտ լինում, հարազատը, որը վերցնում է այդ գումարը, չի կարդում, թե մանր տառերով ինչ է գրված պայմանագրում:

«Ինքն անմիջապես վերցնում է այդ 400 հազարը՝ չիմանալով, որ հետո պետք է վճարի 1 մլն դրամ և ավելին: Հետևաբար, մենք պետք է պաշտպանենք մեր քաղաքացիներին: Հետաքրքիր կլիներ՝ բանկի ծառայողը գնար խանութ և երշիկ գներ, և երշիկ վաճառողն ասեր՝ մի հատ հըլը ինձ վճարեք էդ թույլտվության համար, նոր ես ձեզ երշիկ վաճառեմ»,- եզրափակել է Հովիկ Աղազարյանը, ինչին էլ Թանդիլյանն արձագանքել է, որ դրա լուծումն իրականում բժշկական ապահովագրությունն է, այլ ոչ թե վարկային կազմակերպությունները, քանի որ նրանց համար նշանակություն չունի, թե մարդն ինչ վարկ է վերցնում:

«Պատկերացրե՛ք, այդ հնարավորությունն էլ չլիներ, այդ ընտանիքն ավելի վատ վիճակում կհայտնվեր, մեր խնդիրն է պաշտպանել քաղաքացուն»,- արձագանքել է Թանդիլյանը: