ԼՀԿ-ն իր դիրքորոշումն է հայտնել հակակոռուպցիոն ռազմավարության և դրա իրականացման 2019-2022թթ. միջոցառումների ծրագրի նախագծի վերաբերյալ

«Լուսավոր Հայաստան» կուսակցության ղեկավար Էդմոն Մարուքյանը իր ֆեյսբուքյան էջում գրառում է կատարել ՀՀ հակակոռուպցիոն ռազմավարության և դրա իրականացման 2019-2022 թվականների միջոցառումների ծրագրի նախագծի վերաբերյալ ԼՀԿ դիրքորոշման մասին:

Գրառումն ամբողջությամբ՝ ստորև

«Լուսավոր Հայաստան կուսակցության դիրքորոշումը Հայաստանի Հանրապետության հակակոռուպցիոն ռազմավարության և դրա իրականացման 2019-2022 թվականների միջոցառումների ծրագրի նախագծի վերաբերյալ.

Իրավական ակտերի նախագծերի հրապարակման միասնական www.e-draft.am կայքում 2018 թվականի դեկտեմբերի 19-ին Հայաստանի Հանրապետության արդարադատության նախարարությունը հանրային քննարկման է ներկայացրել Հայաստանի Հանրապետության հակակոռուպցիոն ռազմավարության և դրա իրականացման 2019-2022 թվականների միջոցառումների ծրագրի նախագիծը:

Հաշվի առնելով, որ երկրի հասարակական-քաղաքական օրակարգի թիվ 1 խնդիր է շարունակում մնալ կոռուպցիայի դեմ արդյունավետ պայքարը, հանրային քննարկման ներկայացված ռազմավարական փաստաթղթի և դրա իրականացման միջոցառումների ծրագրի վերաբերյալ կուսակցությունն այս փուլում ներկայացնելու է սկզբունքային համարվող մեկ առաջարկություն, որի ընդունման պարագայում կոռուպցիայի դեմ պայքարը կդրվի ինստիտուցիոնալ հենքի վրա, իսկ կոռուպցիայի դեմ պայքարում գրանցած արդյունքներն էլ կարճ ժամանակահատվածում տեսանելի կլինեն:
Խոսքը գնում է անկախ, ունիվերսալ հակակոռուպցիոն մարմնի ստեղծելու մասին, որն օժտված կլինի կոռուպցիայի կանխարգելման, հակակոռուպցիոն կրթության և օպերատիվ-հետախուզություն, հետաքննություն, նախաքննություն իրականացնելու գործառույթներով:

Հայաստանի Հանրապետությունում ժողովրդավարացման, տնտեսության զարգացման և բնակչության կենսամակարդակի բարձրացման գործընթացների արգելակման հիմնական պատճառներից մեկը համարելով կոռուպցիան՝ իր բոլոր դրսևորումներով, կուսակցությունն իր ստեղծման պահից որդեգրել է կոռուպցիայի դեմ անզիջում պայքարելու գործելաոճ:
Արժևորելով միջազգային լավագույն փորձի հիման վրա երկրում կոռուպցիայի դեմ պայքարի գործուն մեխանիզմների ներդնումը՝ կուսակցությունն իր հասարակական-քաղաքական գործունեության ընթացքում հանրային հանձնառություն է ստանձնել և բազմիցս հանդես եկել երկրում կոռուպցիայի դեմ պայքարի ինստիտուցիոնալ համակարգ ներդնելու օգտին: Այդպիսի համակարգ ունենալու կարևորության մասին անդրադարձ է կատարվել նաև կուսակցության նախընտրական ծրագրերում, ինչպես նաև այդ մասին հանրության տարբեր շերտերի հետ ակտիվ քննարկումներ ունեցել համապետական և տեղական ընտրությունների նախընտրական քարոզչության ընթացքում:

Դեռևս 2017 թվականի խորհրդարանական ընտրությունների ժամանակ «Լուսավոր Հայաստան», «Հանրապետություն» և «Քաղաքացիական պայմանագիր» կուսակցությունները, հանդես գալով «Ելք» դաշինքի կազմում, նախընտրական ծրագրի «Պայքար կոռուպցիայի դեմ» բաժնում նախատեսել էին անկախ, ունիվերսալ հակակոռուպցիոն մարմնի ստեղծում: Իսկ 2018 թվականի դեկտեմբերի 6-ին «Լուսավոր Հայաստան» կուսակցությունն առանձին մասնակցելով արտահերթ խորհրդարանական ընտրություններին՝ իր նախընտրական ծրագրում նույնպես հատուկ անդրադարձ էր կատարել կոռուպցիայի դեմ պայքարին և ներկայացրել կուսակցության ունեցած մոտեցումները, որոնք առավելապես կապված են հանրային կառավարման մարմինների գործունեության թափանցիկության, հաշվետվողականության և բարեվարքության կատարելագործման ժամանակակից մեխանիզմների ներդրմանը և կիրառմանը, դատական համակարգի անկախությանն ու արդարադատության անխուսափելիության ապահովմանը, ավելորդ վարչարարության դեմ շարունակական պայքարին և պետական վարչական անձնակազմերի օպտիմալացման ժամանակակից մեխանիզմների ու պետական հակակոռուպցիոն կրթական ծրագրերի ներդրմանը՝ նպատակ ունենալով բարձրացնելու բնակչության իրավագիտակցությունը և իրազեկման մակարդակը:
«Լուսավոր Հայաստան» կուսակցությունը, շարունակելով «Ելք» դաշինքի կազմում, հասարակության առջև ստանձնած հանձնառությունը, ներկայումս նույնպես կարևորում է կոռուպցիայի դեմ պայքարում ապակենտրոնացված անարդյունավետ համակարգից անցումը դեպի կենտրոնացված արդյունավետ համակարգի` ինստիտուցիոնալ լուծումը համարելով անկախ, ունիվերսալ հակակոռուպցիոն մարմնի ստեղծումը:

Ուստի, «Լուսավոր Հայաստան» կուսակցությունն անհրաժեշտ է համարում Հայաստանի Հանրապետության հակակոռուպցիոն ռազմավարության և դրա իրականացման 2019-2022 թվականների միջոցառումների ծրագրի նախագծում նախատեսել անկախ, ունիվերսալ հակակոռուպցիոն մարմնի ստեղծումն ու օր առաջ դրա գործարկումը` կանխարգելիչ և քննչական երկու առանձին մարմիների փոխարեն:

Շնորհակալություն համագործակցության համար»,- գրել է Մարուքյանը:

https://www.facebook.com/marukyan.edmon/posts/2432749790130067?__xts__[0]=68.ARAZ3EYeNqBfK-Nurhoc2jQlq3q6WD0EYv5ZycjdsaLTBmU0eW-ItuCVE6PtshBWt1KH_dXMB8VNsfhnhphb4mF6w7KZI_55LDYEBl5f6qwAh9fvBv2ygn3dczfSRoTtdPh8f_91jhFCevjItBuzFxq5fIJXXGpkgdwedKeQ5gbk54YbRqU9bd-_7ZWNW-XBG0zGK1FWGMlDhHpIf06y0mIUA4a94TAsXULcCPIsV6JZ4–yTkGRYGVAXcZ56oujQKTCChmxGi8NRWUnbWpqrWvzZ_aKmiaJF0Es56_4tNxiLBK7u7wCFCjRpd0BWnioYuzSTtZH2b9MhdvI0WKYef-ifQ&__tn__=-R