Կրթությանը վերաբերող ի՞նչ նախագծեր են դրված շրջանառության մեջ

Այսօր հրավիրված նիստի ժամանակ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Միքայել Հայրապետյանը խոսել է այն մասին, թե այս պահին ինչ օրենսդրական նախաձեռնություններ են դրվել շրջանառության մեջ։

«Շրջանառության մեջ դրված է ուսանողների ուսման վճարների մասով օրենսդրական նախաձեռնությունը՝ ԲՀԿ պատգամավոր Տիգրան Ուրիխանյանի նախաձեռնությամբ»,- ասել է Հայրապետյանը:

«Քանի որ այդ օրինագիծը ներկայացվել էր կառավարությանը և ստացել դրական եզրակացություն, և ես էի ԱԺ-ում ներկայացնում, երկու բառով ուզում եմ ասել, թե դա ինչին էր վերաբերում: Քանի որ «Բարձրագույն կրթության մասին» օրենքում կա կետ, որի համաձայն` ուսանողները պետք է կիսամյակային կտրվածքով վճարեն վարձավճարը, բայց այնտեղ թողնվում էր նաև կետ, որ կարող են վճարել նաև ամսական: Պարոն Ուրիխանյանն առաջարկում էր եռամսյակային տարբերակը: Մենք այդ տարբերակը հանեցինք ԲՈՒՀ-երի հետ խորհրդակցելու արդյունքում: Այսինքն՝ օրենքում դա կար, բայց իմպերատիվ բնույթ չուներ: Այդ նոր նախագծով այն ավելի իմպերատիվ բնույթ է ստանում, ուղղակի ուսանողն այն ժամանակ դիմում էր ԲՈՒՀ-երին և որոշակիորեն ԲՈՒՀ-ի հայեցողությանն էր թողնվում: Չնայած պետք է անկեղծորեն նաև ասեմ, որ չկա որևէ ԲՈՒՀ, որը չի ընդառաջել՝ գոնե այս վերջին ամիսների ընթացքում ամսական կտրվածքով իր վարձը վճարելու»,- ասել է Հովհաննիսյանը՝ նաև հավելելով, որ եթե անգամ խնդիրներ եղել են, ԿԳՆ-ն միջամտել է, և դրանք կարգավորվել են:

Ըստ ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի տեղակալի՝ փոփոխության արդյունքում ամսական կտրվածքով վճար կատարելը պարտադիր բնույթ է ստանում: Որոշակի խնդիրներ ԲՈՒՀ-երի հաշվապահական մարմինների համար ստեղծվում են, բայց ճիշտ կանխատեսելու և բյուջեն պլանավորելու պարագայում, դրանք կլուծվեն:

Հաջորդ նախաձեռնությունը հենց Հովհաննիսյանինն է:

«Դա օրերս սոցիալական ցանցերում անընդհատ քննարկվող թեմաներից մեկն է: Այսպես կոչված ավարտական աշխատանքների՝ ռեֆերատների, կուրսայինի, դիպլոմայինի, ատենախոսությունների վճարովի ծառայություններ մատուցելու  մասին է, որն, իսկապես, լուրջ խնդիր է կրթության որակի ապահովման համար: Ես հասկանում եմ, որ իմ առաջարկած փոփոխությամբ խնդիրն ամբողջապես չի կարող լուծվել, որովհետև մենք չունենք մեր ձեռքում արգելելու օրենսդրական լուրջ գործիքներ, բայց  խնդիրը վերաբերում է գովազդի օրենքում փոփոխությանը: Այդ օրենքում փոփոխության միջոցով և Վարչական օրենսգրքում փոփոխություններ կատարելով` մենք ուղղակի սահմանափակում ենք դրանց գովազդը, որովհետև այսօր բազմաթիվ են այդ գովազդները, նրանք հանգիստ գովազդում են իրենց արտադրանքը»,- պարզաբանել է Հովհաննիսյանը:

Ըստ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի՝ ամբողջական լուծման տարբերակ իրենք մտածել են, որը ԲՈՒՀ-ում հակապլագիատ գործիքի ներդրում է ենթադրում:

«Նոր հեծանիվ հորինել պետք չէ, պետք է ուղղակի այդ գործիքը հայաֆիկացնել, հայկական բազան շատացնել և մի քանի տարի հետո ուղղակի անիմաստ կդառնա այդպիսի ծառայությունների մատուցումը, որովհետև այդ գործիքն ուղղակի կհայտնաբերի բոլոր տեսակի արտագրությունները և գրագողությունները»,- ասել է Հովհաննիսյանը: