Մինասի «Գիշեր» և «Ցերեկ» որմնանկարների վերականգնման համար դրամահավաք կսկսվի

Մինաս Ավետիսյանի որդին` Արման Ավետիսյանը երեկ` լրագրողների հետ հանդիպմանը, բարձրացրեց նկարչի «Գիշեր» և «Ցերեկ» որմնանկարների փրկության հարցը, իսկ Գյումրիում արդեն SHANTNEWS.am-ի թղթակցի հետ հանդիպման ընթացքում ներկայացրել է «Մինաս Ավետիսյան» հիմնադրամի նոր քայլերը:

Հիմնադրամը դրամահավաք կսկսի նկարչի «Գիշեր» և «Ցերեկ» որմնանկարների վերականգնման համար:

Մինասի որդին նման որոշում է կայացրել որմնանկարների փրկությունը պետական ֆինանսավորմամբ կատարելու մի քանի անհաջող փորձերից հետո:

Հիշեցնենք` Մինասի որմնանկարները գտնվում են Գյումրիի նախկին Գալավանոմետրերի գործարանում և դրանց տեղափոխումն այս տարածքից  հրատապ է: «Ցերեկ» աշխատանքից շատ ավելի քիչ բան է մնացել:

30 տարի առաջ վերականգնման առաջին աշխատանքներն են եղել: Որմնանկարները հատուկ պաշտպանիչ թաղանթով են ծածկել ու հենց սա է օգնել, որ 30 տարի անց որմնանակարների առանձին հատվածներ դեռևս պահպանված են: Որմնանկարները պահպանվող հուշարձանների ցանկում են, բայց պահպանություն ասվածը, այս դեպքում, ընդամենը թղթի վրա գրված ցանկություն է: Նկարների ծեփաշերտը թափվում է:

Մշակույթի նախարարությունը մի քանի անգամ մերժել է հիմնադրամի որմնանկարների համար ֆինանսավորում հատկացնելու խնդրանքը: Հիմա արդեն «Մինաս Ավետիսյան» հիմնադրամի նախագահ Արման Ավետիսյանն այլ ուղղությամբ է միջոցներ փնտրում. որոշել  է դրամահավաքով հարցը լուծել:

«Սա արդեն ժողովրդական օգնության խնդիր է: Եթե առաջ ինչ-որ կերպ ապավինում էի կառավարության և մշակույթի նախարարության օգնությանը, ապա այս դեպքում մի քիչ մոլորված եմ: Նախարարությունը, չեմ հասկանում` գործո՞ւմ է, չի՞ գործում, ինչ որոշում կկայացնի, երբ կկայացնի: Դրամահավաք միգուցե սկսենք, որովհետև այս որմնանկարները պատկանում են ժողովրդին: Ժամանակը շատ քիչ է, ցավոք սրտի: Կարծում եմ` պատկան մարմինները, այն բոլոր մարդիկ, ում հետաքրքիր են Մինասի ստեղծագործությունները, պետք է, որ արձագանքեն»,- SHANTNEWS.am-ի հետ զրույցում նշել է Արման Ավետիսյանը:

Դրամահավաքին մասնակցել ցանկացողներ արդեն կան: Մանուկ Մարգարյանը նմուշահավաք է, առաջինն է, որ պատրաստակամություն է հայտնում մասնակցել դրամահավաքին ու օգնել Մինասի գործերը փրկել: Իր անձնական հավաքածուում Մինասի բնօրինակ այլ գործեր ունի: Սեփական միջոցներով վերականգնելու հնարավորություն ունի, բայց ասում է, սա պահպանվող արվեստի գործ է ու խնդիրը պետական ֆինանսավորմամբ պետք է լուծվի:

«Մեծ սիրով, իմ ուժերով երկու որմնանկարն էլ կվերականգնեմ ու կվերցնեմ իմ հավաքածուում, բայց սրանք պետական պահպանվող արվեստի գործեր են և հնարավոր չէ, որ հատկացվեն անհատին: Սրանք փոքր գրաֆիկական կամ գեղանկարչական գործեր չեն, այլ աշխատանքներ են, որոնք միլիոնավոր դոլարներ արժեն: Այն, որ որմնանկարները  բարձիթողի վիճակում են, աշխատանքները չի արժեզրկում: Այս որմնանկարներից յուրաքանչյունը մի քանի միլիոն դոլար արժի»,- ասել է նմուշահավաք Մանուկ Մարգարյանը.

Հիմնադրամի խորհրդի նախագահը հաշվարկել է, որ որմնանկարները վերականգնելու համար 20-25 հազար դոլար է անհրաժեշտ: Որմնանկարի տեղափոխման վայրն էլ արդեն ունեն աչքի տակ: Մինասի հայրենի  Ջաջուռ գյուղի թանգարան կտեղափոխեն.  որմնանկարի չափերին համապատասխան տարածք կա: