«Լուսավոր Հայաստան» խմբակցության պատգամավորի հարցը վարչապետին առյուծի անեկդոտն է հիշեցրել

«Լուսավոր Հայաստան» խմբակցության անդամ Արկադի Խաչատրյանը խորհրդարանում վարչապետին հարց է ուղղել՝ եթե կառավարությունն առանցքային մոտեցում ունի ծրագրերի նկատմամբ, ինչու՞ չափելի ցուցանիշներ չկան ծրագրում: Նա հարցրել է նաև, որ եթե որևէ նախարարություն այսպիսի ծրագիր ներկայացնի կառավարությանը, այն կընդունվի՞, թե՞ ոչ:

«Ես ուզում եմ շատ կոնկրետ մի հարցի պատասխան ստանալ՝ երբ որ մենք ասում ենք 2023 թվականին Հայաստանում ծայրահեղ աղքատություն չպետք է լինի, դա չափելի՞ է, թե՞ չափելի չէ: Շատ կոնկրետ ցուցանիշ է, ավելի կոնկրետ չի լինում՝ պետք է ծայրահեղ աղքատություն չլինի: Հիմա, եթե գրենք, որ աղքատությունը պետք է 7 տոկոսով կրճատվի, ձեր խմբակցությունն ի՞նչ էր անելու՝ ասելու էր կառավարությունն ասել է 7 տոկոս, բայց 5 տոկոսո՞վ է կրճատել, շատ վատ է, անմիջապես թող հրաժարական տա», – ասել է Փաշինյանը:

ՀՀ վարչապետը հավելել է, որ «Լուսավոր Հայաստան» խմբակցությունից որոշ հարցեր և ելույթներ լսելիս առյուծի անեկդոտն է հիշում.

«Ասում է, որ անապատում առյուծը հետևիցդ ընկած լինի, ի՞նչ կանես. ասում է` ծառը կբարձրանամ, հետո ասում է`ծառ չկա, ասում է`սարը կբարձրանամ, ասում է`չէ, սար չկա, ասում է` չհասկացա՝ դու իմ կողմից ե՞ս, թե՞ առյուծի, հիմա ձեր ուզածն ի՞նչ է, որ էդ փոփոխությունը լինի՞, թե՞ որ չլինի:

Ձեր հարցերի կոնտեքստում նա եմ զգում, որ դուք վախում եք ոչ թե  նրանից որ այդ ծրագիրը չի իրականանա, այլ  որ՝  կիրականանա: Եթե դրանից եք վախում ճիշտ եք անում», – ասել է Փաշինյանը, ինչին պատգամավորը արձագանքել է, որ շատ են ուզում, որ իրականացվի, ավելին՝ աջակցելու են իրականացմանը: Չափելիությունը հնարավորություն է տալիս հասկանալ ակնկալիքները ինքանով կիրականան, թե ոչ:

Ինչ վերաբերում է նրան, թե ինչպիսի՞ն կլինի արձագանքը, եթե նախարարությունները նման ծրագիր ներկայացնեն կառավարությանը, վարչապետն ասել է.

«Կառավարությունը երբ որ կընդունի ծրագիրը, կընդունվի սրանից բխող միջոցառումների ցանկը: Դա կառավարության ծրագիրն է, եթե դա լիներ կառավարության ԱԺ ծրագիր, ես ձեզ կհասկանայի, ԱԺ-ն պետք է դրան վերաբերվի որպես կառավարության ծրագրի: Այդտեղ չի կարող լինել մեկնաբանություն, որ մենք որևէ դիտողության կամ քննադատության քամահրանքով ենք վերաբերում: Քավ լիցի, էդպիսի բան չկա և չի կարող լինել»:

Պատգամավորը կարծիք է հայտնել ԱԺ-ի վերահսկողության մեխանիզմների վերաբերյալ, ինչին էլ վարչապետը պատասխանել է.

«Ես համաձայն չեմ, որ կառավարությունը հաշվետու չի լինելու Աժ-ին: Նախ մենք ունենք կառավարության տարեկան զեկույցը, ունենք բյուջեի կատարողական, բյուջեի նախագիծ, հարցուպատասխանի ռեժիմ, խմբակցությունները կարող են հարցապնդումներով հանդես գալ: Այնպես որ, խորհրդարանը վերահսկողության այնքան մեխանիզմներ ունի, որ եթե ցանկանա վերահսկել, հանգիստ ու անկաշկանդ կվերահսկի»: