Երբ որևէ կառույցում դեպք է տեղի ունենում, նշանակում է՝ այդ կառույցը չի՞ աշխատում. Սանասարյանը՝ ՊՎԾ աշխատակիցների ձերբակալման մասին

ՀՀ պետական վերահսկողական ծառայության պետ Դավիթ Սանասարյանը փետրվարի 28-ին կառավարության նիստից հետո լրագրողների հետ զրույցում նշեց՝ դիալեզի հետ կապված ամբողջ շուկան դիտարկվելու է:

Արձագանքելով քննադատությանը, թե ընդամենը երկու ընկերության հետ են աշխատում դիալիզի բուժման համար, Սանասարյանը կոչ արեց տեսնել՝ «Արմենիա» ԲԿ-ն, «Էրեբունի» ԲԿ-ն ինչ ֆիրմաների հետ են աշխատում:

«Հանրապետական հիվանդանոցը դիալեզի ամենամեծ պացիենտներն ունի: Մենք անհանգստանում ենք ԲԿ-ների կոնկրետ դիալիզի հիվանդներո՞վ, թե՞ առհասարակ, եթե խնդիր կա, ինչո՞ւ չենք վերհանում, չենք լուծում, ինչո՞ւ ենք թողնում, որ «Արմենիա» ԲԿ-ին այլ կազմակերպություն սպասարկի: Մեր խնդիրը շատ կոնկրետ է, ոչ թե այս կամ այն ֆիրման կմատակարարի, դա մեր լիազորությունների մեջ չի մտնում: Մեր խնդիրը «Գնումների մասին օրենք»-ի տառը պահպանելն է, և մենք պահպանում ենք՝ անկախ նրանից՝ որևէ պաշտոնյա՝ ներկա կամ նախկին, կամ որևէ անձ, բիզնես դա ցանկանո՞ւմ է, թե՞ ոչ: Մենք դա անելու ենք, գործընթացները հերթականությամբ անելու ենք՝ դիալեզի հետ կապված ամբողջ շուկան նայելու ենք»,- ասաց նա:

Լրագրողները հետաքրքրվեցին՝ ՊՎԾ աշխատողները փոխկապակցվա՞ծ են եղել այդ գործընթացի հետ, Սանասարյանը կոչ արեց՝ այդ հարցով դիմել իրավապահ մարմիններին:

Խոսելով ՊՎԾ աշխատակիցների, ձերբակալված Ադյան եղբայրների մասին՝ Սանասարյանն ասաց, որ նրանք հորեղբոր տղաներ են, ինքն է նշանակել նրանց` հաշվի առնելով նրանց մասնագիտական կարողությունները: Նա հիշեցրեց՝ Դավիթ Ադյանն անգամ ԱԱԾ չի հրավիրվել, շարունակում է իր ուսումնասիրությունները Բժշկական համալսարանում: Ձերբակալված մյուս աշխատակցի՝ Գևորգ Խաչատրյանի մասին նա ասաց՝ Խաչատրյանը լավագույն մասնագետներից է, որ առհասարակ տիրապետում է բժշկական սարքավորումներին: ՊՎԾ պետը, խոսելով իր ղեկավարած կառույցի աշխատակիցների՝ չարաշահումներ թույլ տալու հավանականության մասին, նշեց, որ ոչ մի բան չի բացառում, բայց նշեց.

«Այդ մարդկանց ավելացված արժեքի հարկը տեսել ենք, պետությունն օգտվել է նրանց աշխատանքից, և եթե նրանց մեղքը ապացուցվի, նրանք պետք է պատասխանատվության ենթարկվեն: Ցանկացած կառույցում, որ դեպք է տեղի ունենում, նշանակում է՝ այդ կառույցը չի՞ աշխատում, կամ ես պետք է իմանա՞մ՝ որևէ աշխատակից ինչ հնարավոր կապեր կարող է ունենալ: Ես դնում եմ պահանջ, ինձ իրավական գնահատական են տալիս, ասում են՝ այստեղ ֆինանսական խնդիրներ կան: Ես հանձնարարական եմ տալիս գործողություններ իրականացնել, այդ գործողություններն այսօրվանից ավելի ինտենսիվ են դառնալու»:

Սանասարյանն ասաց, որ աշխարհում կոռուպցիայի դեմ պայքարող բոլոր մարմիններում հնարավոր են նման բաներ, ապա հարց ուղղեց լրագրողներին՝ վստա՞հ են, որ ՊՎԾ աշխատակիցները կոռուպցիոն չարաշահումներ են թույլ տվել: Նա կրկին նշեց՝ ձերբակալվածներն օրինակելի աշխատողներ են եղել, և ցանկացած մեղադրանք 100 տոկոսանոց ճշմարտություն չէ:

Նա արձագանքեց նաև դժգոհություններին, թե իրենց մամուլի ծառայությունն իր գործառույթը պատշաճ ձևով չիրականացրեց:

«Եթե կիսատ-պռատ պատասխանեինք, ո՞նց կգնահատեիք: Ես նաև չհասկացա, թե մեր լրատվականի տարածած հաղորդագրությունում էդ ի՞նչն էր անհասկանալի»,- հարցրեց նա:

ՊՎԾ աշխատակիցներին մեղսագրվող արարքի մասին խոսելով՝ Սանասարյանն ասաց, որ խոսքը լուրջ կոռուպցիոն սկանդալի մասին չէ, կարգապահական վարույթի խնդիր կարող էր լինել, ապա շեշտեց՝ նախաքննական մարմինը իր գործառույթն է անում, խոստացավ այդ մասին խոսել հետագայում: