Վրացի սկանդալային պատգամավորը պատահմամբ հայտնվել է ֆեյսբուքյան ուղիղ եթերում

Վրաստանի խորհրդարանի ամենասկանդալային օրենսդիրներից Էմզար Կվիցիանին՝ «Հայրենասերների դաշինքից», անսպասելի հայտնվել է ֆեյսբուքյան ուղիղ եթերում:

Հեռարձակումը տևել է ավելի քան յոթ րոպե: Այդ ընթացքում օգտատերերը տեսել են նրան պառկած վիճակում՝  վերմակով ծածկված, գլուխը փաթաթած կարմիր սրբիչով կամ այլ կտորով: Ավելի ուշ մեկնաբանություններ էին արվել պատգամավորի հնարավոր մրսածության մասին:

Կվիցիանին, չկասկածելով, որ սմարթֆոնի տեսախցիկը միացրած է , ինչ-որ բան է սկսել դիտել կամ ընթերցել հեռախոսով՝ մերթընդմերթ ժպտալով:

Կասկածներ 57 -ամյա պատգամավորի մոտ առաջացել են ուղիղ միացման 7-րդ րոպեին, այն բանից հետո, երբ նա՝  համոզվելու համար, որ ուղիղ եթերում է, խնդրել է իրեն բաժանորդներին հաստատել, որ տեսնում ու լսում են իրեն: Պատգամավորն ակնհայտ պատասխան էր ստացել, ժպտացել ու անջատել հեռախոսը:

Մի քանի ժամվա ընթացքում հարյուրավոր մեկնաբանություններ են տեղադրվել: Օգտատերերից շատերին զվարճացրել էր պատգամավորի կարմիր գլխաշորը: Նրանցից  մեկը գրել է.

«Նա ավելի շատ պատրաստ է աջարական պարի, քան քնի»: Մյուսները արձագանքել են փոխըմբռնումով՝ նշելով, որ իրենց հարազատներից շատերը հայտնվել են նման իրավիճակներում՝ բջջային հավելվածներից գլուխ չհանելու պատճառով:

Ներկա դրությամբ ուղիղ եթերի տեսագրությունը հեռացվել է Կվիցիանիի կայքէջից:

Փոքր ակնարկ «Հայրենասերների դաշինքի» և սկանդալային Էմզար Կվիցիանիի մասին

2016թ․ խորհրդարանական ընտրություններում առաջին անգամ մասնակցած, ոչ վաղ անցյալում ձևավորված ամենառուսամետ «Հայրենասերների դաշինք» կուսակցությունը հաղթել է ընտրություններում և խորհրդարան մտել 6 անդամով, այդ թվում՝ վերոհիշյալ Կվիցիանին:

Ավելի վաղ՝ 2006 թ․ Էմզար Կվիցիանին, անհնազանդություն հայտնելով Սաակաշվիլիի իշխանություններին, վրաց-ռուսական սահմանային Կոդորի կիրճում ղեկավարել է իշխանությունների դեմ ուղղված զինված դիմակայությունը: Մատնվելով անհաջողության ՝ Աբխազիայի տարանցմամբ նա հայտնվել էր ՌԴ-ում:

Վրաստանում իշխանափոխությունից հետո 2014 թ․ վերադարձել էր Վրաստան: Ձերբակալվել էր և զինված պետական հեղաշրջման կազմակերպման մեղադրանքով դատապարտվել 12 տարվա ազատազրկման: Մեկ տարի անց՝ 2015-ին, Վերաքննիչ դատարանի որոշմամբ ազատ է արձակվել հենց դատարանի դահլիճից:

Իններորդ գումարման խորհրդարանում Կվիցիանին մի քանի անգամ դարձել է հակամարտությունների ու քաշքշուկների նախաձեռնող: Նա օրենսդիրից «սեռական կողմնորոշում» և «գենդերային ինքնություն» տերմինները բացառելու նախաձեռնության հեղինակն էր, և պահանջել է նաև հասարակական վայրերում արգելել մահմեդական կանանց հիջաբ կրելը: