Նախաքննությունը կլինի, կպարզվի՝ ով է. Փաշինյանը՝ քրգործով անցնող բարեկամի մասին

Գյումրիի քաղաքապետ Սամվել Բալասանյանը ՀՀ վարչապետ Նիկոլ Փաշինյանին տեղեկացրեց՝ Գյումրիում 12 կմ քանդել են, 2 հրապարակ քանդված վիճակում է, հիմա ժամանակավոր լուծում են տվել, որ մարդիկ կարողանան քայլել այդ ճանապարհով, մինչև շինարարությունն ավարտվի:

«Կհրավիրեք այն ճարտարապետներին, ում հետ աշխատել եք, խնդիր կդնեք, կհետևեք: Երբ շինարարություն է արվում, դա չի նշանակում, որ կյանքը պետք է կանգ առնի, չեմ ասում՝ պետք է զրոյից նոր մայթ կառուցվի, բայց պետք է հաշվի առնել՝ մարդը որտեղով է քայլելու: Մենք կարող ենք, իհարկե, ասել՝ բոթասներ հագեք, բայց մարդն այս ճանապարհով հարսանիք էլ կարող է գնալ, ծնունդ էլ»,- ասաց նա:

Բալասանյանը խոստացավ՝ ունենալու են հրաշք փողոցներ:

«Եկեք՝ իրավիճակի էդ հին ընկալումներից դուրս գանք. եթե խնդիրը հասել է ինձ, վաղուց պետք է հասներ ձեզ: Թող ճարտարապետը ցույց տա՝ մարդիկ որտեղո՞վ են քայլելու, այդ ճանապարհը պետք է լինի արժանապատիվ: Այո, մեր զրույցի ժամանակ Դուք ճիշտ էիք ասում, պարո՛ն Բալասանյան, շինարարություն է, մարդիկ էլի բողոքում են, բայց գուցե մի բան սխալ ենք անում»,- ասաց Փաշինյանը:

Բալասանյանը հայտնեց, որ հիմա կենտրոնում շինարարություն են անում՝ սկզբում մայթը, ապա փողոցը, հետո հաջորդ մայթը, ուրիշ տարբերակ չեն տեսել առայժմ, քանդման ժամանակ կոմունիկացիաների են հանդիպում, որոնց մասին չգիտեն էլ:

Վարչապետը տեղեկացրեց, որ աշխատանքի ժամկետ է սահմանված մինչև հունիսի 30-ը, պայմանավորվել են, որ պրոբլեմները կգույքագրվեն, պրոբլեմը լուծելու համար պետք է հասկանան՝ ի՞նչ պրոբլեմ ունենք:

Փաշինյանին դիմեցին ՊԵԿ պարգևավճարների հարցով, հետաքրքրվեցին՝ արդյո՞ք նորմալ է, որ մի գերատեսչությանը հատկացվող պարգևավճարն ավելին է, քան մի ամբողջ համայնքին տրվող գումարը:

«Այո, եթե հաշվի առնենք, որ այդ գերատեսչության վրա խնդիր է դրված 40 մլրդ և ավելի պետեկամուտներ հավաքագրել, որ պիտի ծախսվի, այդ թվում՝ Գյումրիում: Այո, դա տրվել է՝ ի պատասխան այն գործողության, որի արդյունքում այս տարի պետբյուջեի 40 մլրդ գերակատարում ենք անելու, որի արդյունքում ուսուցիչների աշխատավարձն է բարձրանալու, այդ թվում՝ գյումրեցի, զինվորականների աշխատավարձն է բարձրանալու, այդ թվում՝ գյումրեցի, 310 կմ ճանապարհ ենք նորոգելու, այդ թվում՝ Գյումրի բերող, 10 մլրդ դրամի սուբվենցիոն ծրագրում 595 մլն-ը Գյումրիի համար է: Մենք, այո՛, պետք է այդ խնդիրը լուծենք, բայց մի գործողությամբ չենք լուծելու, այլ մտածված գործողություններով: Կարող ենք ամեն ինչ կտրել, արդյունքում կոլապսի մեջ կհայտնվենք, դրա համար կարգավորումներով կգնանք առաջ»,- ասաց նա:

Լրագրողները հետաքրքրվեցին՝ ո՞վ է Նիկոլ Փաշինյանի այն ազգականը, որի նկատմամբ իր իսկ ցուցումով քրեական գործ է հարուցվել: Նա պատասխանեց.

«Նախաքննությունը կլինի, կպարզվի՝ ով է»: