Գյումրիի Մուշ 2/2 թաղամասի հրապարակի սալաքարերը, շինարարությունը դեռ չավարտած, փշրվել են

Մուշ 2/2 թաղամասի կառուցվող հրապարակի համար փակցված ցուցանակը վկայում է, որ կառուցման վերջնաժամկետ էր սահմանված 2018 թվականի դեկտեմբերի 1-ը։ Շինարարը չի հասցրել ավարտել կամ գործի մոտ կեսն է արել ու կոնսերվացրել ոչ միայն ցուրտ եղանակի պատճառով: Անցած տարվա մայիսից սկսած գործը չեն կարողացել ավարտել, ու պատճառը դարձյալ նախագիծն է: Մայիսից մինչև դեկտեմբեր նախագիծը փոփոխությունների է ենթարկվել:

«Ուշանում էր, նախագիծը պիտի փոխվեր, որովհետև ընտեղ հաշվի չէին առել ո´չ ջրագծերը, ո´չ կանալիզացիան, հետո, երբ սկսեցի աշխատել, հասա այդ հատվածին, նոր արդեն պարզ եղավ, որ չի կարելի էդ ջրագծի վրա բետոնիզացիա անել»,- SHANTNEWS.am-ի հետ զրույցում ասել է «Վահրադյան» շինընկերության աշխղեկ Վարուժան Մուրադյանը։

Փոխված նախագիծը ուշացած տեղ է հասել այն ժամանակ, երբ Գյումրիում շինարարություն անել հնարավոր չէր: Փոփոխությունը վերաբերել է ոչ միայն կոմունիկացիային, այլ  ջրավազանի ձևին:

Նոր նախագծով ջրահավաք ավազան հրապարակը չի ունենալու, չորս եռանկյունաձև հատվածներում միայն լինելու են ժայթքող  շատրվաններ։ Շինարարը դժգոհում է, իսկ քաղաքի գլխավոր ճարտարապետը նախագծային ուշացումները աշխատանքների ձգձգման լուրջ պատճառ չի  համարում:

«Այնտեղ ոչ թե նախագծային փոփոխությունների հարցն  էր, այլ այնպիսի լուծումներ կային, որ նրանց համար երևի նորություն էր, այսինքն` մենք այն, ինչ կառուցում էինք, իրենք իրենց գործունեության ընթացքում չէին կառուցել, դրա համար մի քիչ բարդություններ կային, բայց մենք մի քիչ պարզեցրեցինք նախագիծը»,- պարզաբանել է Գյումրիի գլխավոր ճարտարապետ Հենրիկ Գասպարյանը։

Եթե նախագիծն էլ չէ պատճառը, այս դեպքում, ըստ շինարարի, նախահաշիվն է, որը դեռ  չուներ: Սա էլ ժամկետների խախտման է  տանում: Մի քանի օր է, ինչ շինարարությունը վերսկսել են առանց որոշ հստակեցումների, ինչպես նաև քիչ աշխատուժով:

Երեք հեկտար տարածք զբաղեցնող հրապարակում եզրաքարերի ու սալիկների տեղադրման, հարակից հատվածների  բարեկարգման համար շինընկերության աշխղեկը վստահեցնում է, որ 8 բանվորով էլ կհասցնեն:

Շինարարությունը հրապարակում վերսկսել են թերությունները վերացնելով` մայթերի բազալտե սալիկները սկսել են փշրվել, անորակ են եղել։

«Որը փշրվել է, պիտի փոխվի, ու արտադրողն ինքն է ասել, որ իրենք պատասխանատու են։ Որը դեֆեկտով է, հանվում է»,- խնդիրներին անդրադառնալով` ասել է շինարարության պատասխանատուն։

Խոտանված սալիկներն ավելին են, քան շարվածները: Քանդածները կուտակել են ու սպասում են նորով փոխանակմանը: Կառուցմանը զուգահեռ ընթացող թերությունների վերացումը հաշվի առնելով, հավանաբար, շինարարության ավարտի ժամկետներ դեռ չեն հստակեցնում:

Անավարտների շարքից է նաև Մուշ և Անի թաղամասերն իրար կապող նոր կառուցվող փողոցը: Այն փողոցաշինական մեծ ծրագրի մի հատվածն է: Մոտ մեկ կմ երկարության անավարտ փողոցը դեկտեմբերին հանդիսավորությամբ բացեցին՝ խոստանալով, որ մայթերի շինարարությունը կշարունակեն գարնանը:

«Նախնական նախագծով նախատեսված էր նման ծավալների աշխատանք, պետք էր հիմնականում երթևեկելի մասը կառուցել, որպիսի ապահովեինք երթևեկությունը։ Միակողմանի մայթ էր, հետագայում ՎԶԵԲ-ի ծրագրով արդեն ավելացումներ կատարվեցին»,- ասել է Հենրիկ Գասպարյանը։

Պատվիրատուն հետո է որոշել նախագծում բան փոխել ու կառուցել երկկողմ մայթ, ինչի պատճառով շինարարությունը հետ է ընկել, բայց լուսավորությունը լինելու է միակողմանի: Շինարարին արդեն ժամկետ է ասված մինչև այս ամսվա վերջ ավարտել մայթերի կառուցումը: