Բելգիայում այսօր քննարկվելու է ցեղասպանության ժխտումը քրեականացնող օրինագիծը. Հայոց ցեղասպանությունը ներառված չէ

Այս չորեքշաբթի՝ ապրիլի 24-ին, Բելգիայի դաշնային խորհրդարանը պիտի քննարկի և քվեարկի մի օրինագիծ, որ քրեականացնում է ցեղասպանության ժխտումը, սակայն այս օրինագծում Հայոց ցեղասպանությունն ընդգրկված չէ: Բելգիայի հայերի Կոմիտեի անդամ Հարութ Շիրինյանը SHANTNEWS.am-ի հետ զրույցում նշեց՝ Հայոց ցեղասպանությունն այս օրինագծում չընդգրկելու պատճառը շատ պարզ է. օրինագիծը բխում է ԵՄ-ից եկած առաջարկից, որտեղ նշվում է՝ բոլոր անդամ երկրները օրենսդրության մեջ պետք է ունենան ժխտողականության դեմ օրենք:

«Օրենքը պետք է ներառի այն ցեղասպանությունները, որոնք միջազգային դատարանների որոշումների են արժանացել՝ իբրև ցեղասպանություն, սակայն այս հանգամանքը պարտադիր չէ, անդամ երկրներն ազատ են՝ օրինագծում ընդգրկելու ցեղասպանությունները, որ ունեցել են միջազգային դատարանի որոշում, և որ չեն ունեցել նման որոշում: Հայոց ցեղասպանությունը միջազգային դատարանի որոշում չի ունեցել, չնայած 1919թ. Ստամբուլի դատարանը դատապարտել է Օսմանյան կայսրության ղեկավարներին, որ որոշել են Ցեղասպանություն իրականացնել: Պետք է նշել, որ այդ դատարանի մաս էին նաև Ֆրանսիան և Մեծ Բրիտանիան, իբրև աշխարհի մեծ ուժեր, բայց այդ դատարանը միջազգային դատարան չի համարվում, ու դժբախտաբար, Բելգիան որոշել է սահմանափակվել ԵՄ առաջարկով ու չընդգրկել այն ցեղասպանությունները, որ միջազգային դատարանի որոշում չունեն: Այսինքն՝ օրենքը ներառում է միայն Ռուանդայում՝ թութսիների դեմ, նախկին Հարավսլավիայում՝  բոսնիացիների դեմ, իմանալով, որ հրեաներն արդեն իրենց ցեղասպանության ժխտման դեմ օրենք ունեն, որ գործում է Բելգիայում»,- ասաց նա:

Շիրինյանի գնահատմամբ՝ անընդունելի է Բելգիայի պես երկրում տարբերություն ու խտրականություն դնել Ցեղասպանություն ապրած համայնքների մեջ անընդունելի է, քանի որ չեն կարող դատապարտել ժխտողական ելույթ ունեցող մի շարք մարդկանց՝ առանց ուրիշներին դատապարտելու: Նա նշեց՝ ցավալի է, որ այս օրենքը և Հայոց ցեղասպանության չընդգրկվելը հստակորեն կապ ունի հաջորդ ընտրության հետ, քանի որ գաղտնիք չէ՝ այսօր Բելգիայում ծագումով թուրք քաղաքացիների թիվը մեծ է, բոլոր կուսակցություններն այս հանգամանքին ուշադրություն են դարձնում: Շիրինյանն ասաց՝ կարծում է, որ մի շարք կուսակցություններ, մանավանդ, իշխանական, Հայոց ցեղասպանությունն այս օրինագծից հանեցին, որ չկորցնեն այդ քաղաքացիների ձայները, և քվեարկության ժամանակ դա ազդեցություն չունենա:

«Մեզ համար անընդունելի է, որ այս կարևոր նախագիծը, որ պարունակում է ռասիզմի, այլատյացության, ժխտողականության պայքարի մասին կետեր, քաղաքականացվի և օգտագործվի զուտ ընտրական շահերի համար, մանավանդ՝ այսօր, երբ հայատյացությունը սկսել է հստակ ձևով դրսևորվել ընդհանրապես Եվրոպայում, մասնավորապես՝ Բելգիայում,  կարող ենք հստակ կապ տեսնել ժխտողական երևույթների և հայատյացության մեջ: Այն, որ մարդիկ ցեղասպանության իրականությունն ուրանում են ու ժխտում, ատելության խոսքի դրսևորում է»,- նշեց նա:

Շիրինյանն ասաց՝ Բելգիայի հայ համայնքը դիմել է խորհրդարանի բոլոր անդամներին, որ վերանայեն օրինագիծը, Հայոց ցեղասպանությունը ժխտող ելույթների քրեականացումը ևս ներառեն դրանում, իսկ տեղի հայ համայնքը նախաձեռնել է ստորագրահավաք, որ այսօր համացանցում էլ կարելի է գտնել և միանալ: Կոմիտեի անդամը տեղեկացրեց, որ Հայոց ցեղասպանությունը այդ օրինագծի մեջ ներառելու ուղղությամբ բարձր մակարդակով աշխատանք է տարվում համայնքի ղեկավարության կողմից, կապի մեջ են խորհրդարանի մի շարք անդամների հետ, որոնք Հայ դատի պաշտպան են եղել, այցելել են Հայաստան, Արցախ:

Հայ համայնքի ղեկավարությունը փորձում է այդ պատգամավորների նախաձեռնությամբ փոխել այդ օրինագիծը ու ավելացնել Հայոց ցեղասպանությունը ժխտող ելույթների քրեականացումը: